MATIUS 17 - ALLAH NIHYET MEM TUNGWATU NYA

Yesus luei nitta

¹ Njap muhwindagom bu lene Yesus buwak Petrus kin Yohanes Yakobus nya di nikindig-nikinjoi nya ba, kui sut yok ug ei mbigdip gom anai bibor biyongkom.

² Tirigi yoni iba igyai nghuisi jik kep Yesus lene ingat lo, Noni luei nitta ba, niimaisi piga kei dem kep mpia comti ba, Nide sinsun sieng-siau bitiei kei.

³ Leu api yoni ingat bu lo, ingat Musa Elia nya di ikwei mbrap bit Yesus.

⁴ Lene Petrus pai bak Yesus “Tuhan e, nyeni ningon llei sut gi ningat rin bit je. Gino ajoi sut ne nohok ig jibei ningai ba, hi mem Nani hi mem Musa lene hi mem Elia.”

⁵ Tirigi Petrus kes nihyet bigyo rino bumbuhui ttou di piga kei gom juk kwei binggai yok. Leu api nihyet gom tibim kwei leu bumbuhui dima bitri tut “No dini ne Dipmot di dingon ngakei rin ba, dijoi sut Noni. Ma jimiap kep Noni nihyet!”

⁶ Tirigi yo di igya kui Yesus imiap nihyet dima lene ittin tut nindig bibor bitti ba, iba ingwak bikik dihyei.

⁷ Noro Yesus kwei ngget yok bicuk yok “Jikiju hak ug ba, jittin tut bu au.”

⁸ Yoni icap nggok nyen bingat lo, ingat tungwatu hi bi noro ingat Yesus Nongkom he.

⁹ Tirigi ijuk kep kwei leu mbigdip dima lene Yesus sok kep yok ngkiem ser “Ma jitri tut mun di jingat bou jiyai him dima au bibou Munggwom Tungwatu Nipmot kiju hanyen leu nimai eisi ug e.”

¹⁰ Ihig ser Noni “Nggon rino guru Puig Yahudi nicukti nya ipai sut Nabi Elia bipia suar noni kwei bibie i?”

¹¹ Yesus buhup “Gima igbit rin lewo Nabi Elia mitau kwei bibie leu binhyepo nyohou dimig mun nyeng hagom bikei hanyen.

¹² Noro dipai bije bipia Nabi Elia ttau kwei su noro tungwatu nya ingat igbit noni bi. Ibibon noni ugwai-gwai bit leu ingon kanti. Nok gima cem tungwatu nya mibibon Munggwom Tungwatu Nipmot ugwai-gwai.”

¹³ Lene ingon kan bipia Yesus pui sut Yohanes di tur tungwatu nya ei minyeiti ri.

Yesus jji ninnei rom leu mot gom ningonti

¹⁴ Mpe dino Yesus nya ikwei ttau kep tungwatu ningot ndig lene tungwagom kwei ba nibiau bicom mpia ei Yesus nimig him,

¹⁵ bahara “Andigpoi e, ma angondut dipmot dini ug e! Lewo nibuwei bon noni nindig bibor apino cut-cut nyen ei hum kin minyeiti.

¹⁶ Duusap noni kwei bidindo noni bak yo di igya kui Na noro bit bon ibindei ba, kei hanyen kan bi.”

¹⁷ Yesus buhup “Mei! Jiba jingon com Da haigtu bi ba, jingon tindak e? Suar diya tut je ba, doom dingon tut je njap pig bu i? Ausap apmot kwei biDa!”

¹⁸ Lene Yesus ba nihyet bijji ninnei rom gom leu mot dima ningonti. Tirigi Noni pai nok rino mot pima kei hanyen hak.

¹⁹ Leu api yo di igya kui Yesus ikwei ngat Nongkom titer ba, ihig ser nyahan “Nggon rino nyeni nijji ninnei rom dima leu ningonti kan bi i?”

²⁰ Yesus buhup “Lewo jiba jingon com Da haigtu bi. Ma jiyok ngon kep bipia gino jide niba ningon com Dati dem kep sawi ngan di bigbibor ne dem mem jicuk nungug dini bijipai ‘Ason leu mpia dini ug ei mpia ttou nsi dinu!’ Lene midem igbit jicukti ri. Jiyai mun nyeng hagom di nipou ne bit bon jiyai kan bi nya lene dem! [

²¹ Noro ninnei rom di nok gini ne iba nadi kin niyem njita bi mem nituti poi bijji.]”

Yesus pai sut Nonti nimaisi mbigom kin bu

²² Tirigi yo di igya kui Yesus idem yam ei Galilea lene noni pai biyok “Jei bi lene ibou poi mikes Munggwom Tungwatu Nipmot ei tungwatu nya indati.

²³ Yoni mikos Noni noro njap ningai bu lene Noni mikiju hanyen leu nimai eisi.” Gima rino yo di igya kui Noni ingon ngguk tut nindig bibor.

Yesus go belasten gau Nonti mem Tuhan De Ig

²⁴ Mpe dino Yesus kin yo di igya kui Noni ikwei krau Kapernaum lene yo di igya tindei belasten mem Tuhan De Ig ikwei hig ser Petrus “Jide guru go belasten gau Nonti mem Tuhan De Ig e?”

²⁵ Lene Petrus buhup “I, go gau Nonti.” Tirigi Petrus ngkwei buug ei ig bei lene Yesus hig singgre noni bibie “Simon e, apai igbit angon kanti tut gini ug e. Tou nya rigo belasten gau yonti bak nibou ndig dihyeisi dini yok i? Timiei nya e, he ngkiai nya e?”

²⁶ Petrus buhup “Ngkiai nya he.” Yesus binut bu bipai “Nok gima ne timiei nya igo gau yonti bi.

²⁷ Noro ma sibindei ba, yo dima iwok sa au. Aug simper minyei ba, abrim tut wau gom ngat di nimbie him leu api ayok ayai kep mitiei nitig gom di jo ei wau ninsi. Mitiei dima midem mem sigo belasten gau santi. Leu api aba mitiei dima bigo gau side belasten mem Tuhan De Ig.”