MATIUS 16 - ALLAH NIHYET MEM TUNGWATU NYA

Farisi nya yahara Yesus mem gima bon mindur

¹ Farisi nya kin Saduki nya ibou poi ikwei ngat Yesus bibingon Noni bipai “Abibon mindur di bindo bipia Allah pinak Nani kwei ei niyai him.”

² Noro Noni buhup [“Gino jingat nggrau kimbo mem mpia nicutti lene jipai biyam bipia njap di hyep mpia ngei ri.

³ Ba, gino jingat nggrau kin mpia nghek mem njap bigyoti lene jipai biyam bipia njap di ammani mpia but ri. Tirigi jitou kep mpia-bbed him lene jikan tut nindo-bindoti noro jikan tut bindo kin mun di pek kep mem nijam dini nibindo-bindoti bi!”]

⁴ “Ei nijam dini ne tungwatu nya ingon rom bingkek ndok bibor cem. Jahara Da tut mindur e? Midibon mindur hi ter di ter leu mindur di Nabi Yunus bibon mem je bi.” Yesus pai biyok nok leu api kes yok bimbut leu yok.

Ningginausi tut Farisi nya kin Saduki nya ide roti ninjep

⁵ Mpe dino yo di igya kui Yesus yuug krau igpong nite dima ug lene ingat lo, ipwoi roti hi bi.

⁶ Gima rino Yesus pai biyok “Ma jingon sok kep jenti tut roti ninjep di Farisi nya kin Saduki nya ide.”

⁷ Yoni isimbot kep biyam bipai “Noni sok kep nye nok lewo ipwoi roti hi kwei bi.”

⁸ Yesus kan tut mun di isimbot kep biyam dima leu api hig ser yok “Jisimbot kep biyam tut roti di jipwoi kwei bi tut nggon i? Jiba jingon com Da haigtu bi!

⁹ Jingon dorti tut bigyo e? Jibbwe ser roti nindak muhwi di diki mem ibou sribu muhwi pima tu e? Jimbus niken kui bansi nuut pig i?

¹⁰ Lene notou sut roti nindak muhwindacan di mem ibou sribu bitai pima i? Jimbus niken dima kui bansi nuut pig i?

¹¹ Nggon rino jingon dorti tut dipaisi bi i? Lewo dipai sut roti bi noro tut roti ninjep di Farisi nya kin Saduki nya ide!”

¹² Apino yo di igya kui Yesus ingon dorti tut bipia nihyet di sok kep yok dima ne tut roti ninjep di ibiwir tepun bi noro tut Farisi nya kin Saduki nya ighyet.

Petrus simbot dat Yesus ninyeng

¹³ Yesus nya yuug ei hanjop nsi di dideu minu ndig Kaisaria Filipi leu api Noni hig ser yo di igya kui Noni “Tirigi tungwatu nya ihig yam tut Munggwom Tungwatu Nipmot lene ipai sut Dani tou rin i?”

¹⁴ Yo di igya kui Noni ibuhup “Bihi ipai Nani ne Yohanes di tur tungwatu nya ei minyeiti ri. Bihi ipai Nani ne Nabi Elia ri. Bihi ipai Nani ne Nabi Yeremia e, he igom leu nabi nitimiei nya ri.”

¹⁵ Noni hig ser yok “Noro bit leu jeni ne jipai Dani ne tou rin i?”

¹⁶ Simon Petrus simbot dat “Nani ne Nibou Ndig di teu tungwatu nya biyai niyaijo nijep biyok di Allah Di Niyaijo Nipmot ri.”

¹⁷ Yesus buhup “Simon di Yona nipmot e, angon nggei-hi-nggei lewo mun di nijit-jau di tibim leu ahui him dima ne tungwatu nya ipingok na tut bi noro Dicig ei gwamti pingok angonti tut.

¹⁸ Gima rino dipai bina di Petrus bipia nani ne tig di nddong kei ri. Midita Ditde mbusyamei ei tig di nok cou nipmem dip rin ba, bit bon Bilis kin nide limwa nya ibindei cut mbusyamei dima kan bi.

¹⁹ Midiyai kusin mem Allah Ninyeng Tak Kepti bina leu binhyepo mun di aggai ser ei dihyeisi dini lene Allah ei gwamti ggai ser. Mun di asindui sut ei dihyeisi dini lene Allah ei gwamti sindui sut.”

²⁰ Lene Noni sok kep yok bingkiem ser “Ma jitri tut dinyeng Nibou Ndig di teu tungwatu nya biyai niyaijo nijep biyok bak nindigsi nya au.”

Yesus ningginau yokti tut ninghuisi di wei kin nimaisi di micut igkep Noni

²¹ Leu mpe dima bikui ne Yesus kindi pai brei bak yo di igya kui Noni “Suar Da duug ei Yerusalem leu api nibou mben Yahudi nya kin imam nindig nya kin guru Puig Yahudi nicukti nya migyai ninghuisi wei biDa leu api mijem nimai gau Da noro njap ningai bu lene midikiju hanyen leu dimai eisi.”

²² Lene Petrus buwak noni ter leu api kindi srep “Tuhan e, apai nok au! Allah misindui sut mun dima bicut igkep Nani bi sren!”

²³ Yesus kiek noho ndam Petrus bipai binoni “Na di Bilis e, aug hak leu mpia dini! Ma abigen ser Ditde puig au. Angon kanti dima kwei leu Allah bi noro kwei leu tungwatu nya he!”

²⁴ Lene Yesus pai bak yo di igya kui Noni “Bikwop no di joi sut bit Dani lene ma ningon hek tut mun di bon ninyeng mem nonti au. Noro suar kon nide biei salib bibit Da.

²⁵ Lewo bikwop no di ningon hek tut nonti bikan bipia niyaisi bon ninyeng mem nonti lene niyaisi misar. Noro no di kes niyaisi ei bikan bipia bon ninyeng mem nonti bi lene minyohou niyaijo di jo kikau.

²⁶ Notou mem no di nyeng tut ndigban dihyeisi dini hagom noro bimangkrei nide niyaijoti i? Gini kei mem noni e? Noni miba mindei bipek niyaijoti hanyen leu gi misar i?

²⁷ Lewo Munggwom Tungwatu Nipmot mikwei sut Nicig Nide nikei-kau-keisi kin Nide malaikati nya leu api mibirop hanyen bak tungwatu nya gom gom bit leu nok igyai munti nya.

²⁸ Ma jiyok ngon kep bipia je di jingat rin ei mpia dini jibihi mijimai bi bibou jingat Munggwom Tungwatu Nipmot di kwei nok Nibou Ndig bou jiyai him ug e.”