MATIUS 14 - ALLAH NIHYET MEM TUNGWATU NYA

Yohanes di tur tungwatu nya ei minyeiti nimaisi

¹ Mpe dima lene Yesus ninghapti tibim ug ei Herodes di ninyeng tak kep hanjop Galilea nitingou nsi.

² Noni pai bak yo di igya kui noni “Yesus ne Yohanes di tur tungwatu nya ei minyeiti pima ri. Noni kiju hanyen leu nimai eisi apino ba Nide nisindemti bibon mindur a.”

³ Herodes pai nok lewo nipou pini jug noni cuk nide tentara nya leu api yuug kat Yohanes bingot noni bingkiem ei ig bui nsi drek dip Herodes nikinjoi Filipus nitnem Herodias.

⁴ Gima hagom cut igkep Yohanes lewo noni sok kep Herodes ninyen bipai “Ma abuwak Herodias nok atnem au lewo gima ne sisar ri.”

⁵ Herodes pi bikos Yohanes lo, noni digit tut mben Yahudi lewo ikan bipia Yohanes ne nabi ri.

⁶ Ningat ne Herodes yai nimai bak Yohanes ei mpe di noni bon pesta kep nide njap nisrekti. Mpe dima lene Herodias nipmisop bihim bibien-bien nyen ei nisut bat nya di idem yam ei dima igyai him lene gima bindei ba, Herodes joi sut noni.

⁷ Gima rino Herodes ba neheng bipreu binoni bipai “Mun nyeng mindei rino ahara da tut lene midiyai bina bit leu angon kanti hak ug.”

⁸ Misop dima nipmem pingok ningonti leu binhyepo buhup bipai “Dijoi sut arop Yohanes di tur tungwatu nya ei minyeiti nibou leu lene attei nitibou ei srierti kwei bida nogindini hak ug.”

⁹ Herodes miap nibuhupti dima lene ningon ngkwei leu nipreu eisi noro gi mbun noni luei ningonti tut kan bi. Lewo noni preu ei bak misop dima ei nisut bat nya yahagom yoho bei tu. Gima rino noni kos tut bipia miyai igbit misop dima nibuhupti.

¹⁰ Gima rino cuk nide tentara nya biyuug ei ig bui nsi birop Yohanes nibou leu.

¹¹ Leu api igyok nitibou ei srierti bittei kwei bak misop dima leu api noni ug yai hanyen bak nipmem.

¹² Lene yo di igya kui Yohanes ikwei kon ningut ba, yuug sut leu api itig leu lene yuug pui sut Yohanes nimaisi bak Yesus.

Yesus kwas njita tut tungwatu nya ibou sribu muhwi

¹³ Tirigi Yesus miap tut Yohanes nimaisi rino Noni bri ut bikes mpia ttou nsi dima leu buug ei mpia ttou nsi hiter di nok ha ngunti biNongkom. Noro tungwatu ningot ndig ikan tut nimbutti lene induk yam leu ide minu ndig nya ba, imbut sir mam bijop bram Noni.

¹⁴ Tirigi Yesus kinyon ei igpong nintig dip lene ngat tungwatu ningot ndig di idem yam ei dima lene ngondut yok lene bindei ba, yo di inggwen ikei hanyen.

¹⁵ Mpia mmunti tu lene yo di igya kui Yesus ikwei pai biNoni “Mpia ttou nsi dini ne ha ngunti rin ba, mpia mmunti tu. Akes yo dini bintek gimahap ba, inggok njita di igyem ei minu mien di gahai dini kou.”

¹⁶ Noro Yesus srep “Nok ug e, imbut au e. Jikwas jide njita hi tut yok hak ug.”

¹⁷ Noro ibuhup “Nyende njita ne roti nindak muhwi kin wau can he.”

¹⁸ Yesus pai biyok “Jittei njita dima kwei biDa.”

¹⁹ Lene Noni cuk tungwatu ningot ndig dima yok bigwam sinsiou ei abris nghousi leu api krau roti nindak muhwi kin wau can dima bitou kep ginyo kug lene pai sigyo kep bak Allah. Lene Noni ki roti kukiau biyai bak yo di igya kui Noni leu api ibitri tungwatu nya.

²⁰ Yahagom igyem njita bindei yok leu lene yo di igya kui Yesus imbus niken ei bansi simnaibrimigcanti ba, hagom ut.

²¹ Gino ikwop yo di igyem njita dima pinai nya he imangti ibou sribu muhwi noro ikwop sop nya kin munggwom nya imangti bi.

Yesus mbut nimig ei minyei ngwa dip

²² Gima leu lene Yesus cuk yo di igya kui Noni ba, ibri ut bibie ba, ibitot minyei ngwa dip ug ei igpong nite dinyo sri bibou Noni kes tungwatu ningot ndig pima bingkwei ug ei ide ig leu ug e.

²³ Niabiati kes yok leu lene Noni mbut bikui ug ei mbigdip gom ba, ngat nadi. Mmun tu lo, gwam biNongkom.

²⁴ Ba, tirigi yo di ibri ut pima yuug ei igpong nahacanti rino muk tti nindig bibor ba, hou di nimig ten bibor hwen ut tut yok lewo ibit hou nimig bi.

²⁵ Son dideu ha yausi rino Yesus ug ngat yok bimbut nimig ei minyei ngwa dip.

²⁶ Hammi tirigi yoni ingat Noni di mbut nimig ei minyei ngwa dip rino inghuisi mpig sut ba, yahara “Njungwes ri!”

²⁷ Noro Yesus mbrua kep yok “Dwai! Dani ne Yesus ri. Ma jittin au!”

²⁸ Lene Petrus hig ser Yesus “Tuhan e, gino Nani rin ne ma asindui sut bidimbut dimig ei minyei ngwa dip hwou ndam Na hak ug.”

²⁹ Lene Yesus buhup “Akwei hak ug.” Gima rino Petrus kinyon leu ut nsi bimbut nimig ei minyei ngwa dip ndam Yesus.

³⁰ Noro tirigi noni ngat hou di nimig ten bibor ei minyei ngwa dip rino ningon ttin. Apino minyei ngwa sindi krup tut bisar minyei noro noni hara “Tuhan e, ateu da o!”

³¹ Yesus su ninda biteu noni leu lene pai “Petrus e, aba angon com Da haigtu bi e? Ahig angon tut Da leu binggon i?”

³² Lene yahacem ibri ut hanyen leu api hou ntus hak.

³³ Gima rino yo di igya kui Yesus di igwam ei ut nsi dima ikuk yok ei nimig him binggei sut bipai “Ningat ne Nani ne Allah Nipmot ri!”

Yesus bindei ba, yo di inggwen ei Genesaret ikei hanyen

³⁴ Tirigi Yesus nya yuug krau igpong nite dinyo bikinyon leu ut ei hanjop Genesaret.

³⁵ Tirigi timiei minu ndig dima ingat Yesus di ttau kwei dima lene isok ighyet mem yo di inggwen nya leu minu ndig nya kin minu mien di gahai nya ba, ibuwak yok kwei ndam Yesus.

³⁶ Ba, ibidip huk Noni leu binhyepo sindui sut yo di inggwen nya bingget Nide sinsun ninggrun he. Apino bikwop yo di ingget Nide sinsun ninggrun yahagom ikei hanyen.