MATIUS 13 - ALLAH NIHYET MEM TUNGWATU NYA

Nihyet nibiti nindati tut no di hap njita ngan

¹ Njap dima ne Yesus hei leu ig bei buug gwam jug ei igpong nipimat leu binhyepo ngginau tungwatu nya.

² Yo dima ningot ndig induk yam kwei bingwig ttai Noni. Gima rino Noni bri bigwam ei ut nsi lene tungwatu nya igya igyati ei igpong nipimat.

³ Lene Yesus ba nihyet nibiti nindati mang bibor bingginau yok. Noni pai, “Mpe di gom ne tungwagom ug ei nide miai ngwoisi bahap njita ngan.

⁴ Ninda jo kep bahap leu api njita ngan gom-gom cut ariwace ug ei puigsi apino ha nya ikwei puk bingwig.

⁵ Ninda jo kep bahap hi kin bu leu api gom-gom cut ariwace ug ei tigsi di bon dihyei suti bi. Apino dihyei dima bindei ba, njita kioi hei haninyai.

⁶ Mpe dino mpia ngket lene nikioi mbris lewo com nigau ei dihyei jou bi ba, jei bi leu api mui bingwig.

⁷ Lene njita ngan gom-gom cut ariwace ug ei bohousi leu api bohou ceu nikioi ba, mui bingwig.

⁸ Noro njita ngan nindigsi cut ug ei dihyei suti apino nikioi hei ba, ningat ntun him. Ninjem hi ningat sratus gom ntun him. Ninjem hi bu ningat ningot muhwindagom ntun him. Ninjem hi bu ningat ningot ningai ntun him lene bikwop nok.”

⁹ Niabiati Yesus ba nihyet nibit nindati bingginau yok lene pai biyok “Gino jitingou dile lene ma jiyok ngon kep dihyet!”

Yesus ba nihyet nibiti nindati bingginau yok leu binggon i?

¹⁰ Lene yo di igya kui Yesus ikwei hig ser Noni “Nggon rino aba nihyet nibiti nindati bingginau yok i?”

¹¹ Noni buhup “Allah mbot kep mimun tut Ninyeng Tak Kepti bije tu noro Noni mbot kep mimun dima bak yo di hiter bi.

¹² Lewo Allah mikum eisi bak no di ningon dorti apino no dima ningon dorti dor njiriek bu. Noro Noni mitug niken hanyen leu no di ningon dorti bi.

¹³ Diba nihyet nibiti nindati bingginau yok leu binhyepo mbro nok gino ibimian huk ninno lo, ingat mun hi bi ba, mbro nok gino ingig itingou mem nihyet ninno lo, imiap mun hi bi apino ingon dorti bi.

¹⁴ Gima rino mun di tibim ei Nabi Yesaya nuhui him pek kep mem yok, ‘Allah pai bipia mbro nok gino ingig itingou mem dihyet lo, imiap bi ninno. Mbro nok gino imian ser lo, ingat bi ninno,

¹⁵ lewo ingon tindak ser ba, idat kep itingou ser lene imut igyai leu cem tu. Gi bi lene igyai piga ba, itingou tu cem lene ingon dorti hanyen apino ittin ser ide sisar bikiek ndam Da leu binhyepo dibindei ba, ikei hanyen.’ ”

¹⁶ “Noro tut jeni lene jingon nggei-hi-nggei lewo jiyai piga ba, jitingou cem tu.

¹⁷ Ma jiyok ngon kep bipia nipou ne nabi nya kin yo di ingon sren nya imang bibor igyok ingon mem mun di jingat bou jiyai him dini noro ingat bi. Yoni igyok ingon mem mun di jimiap dini noro imiap bi.”

Yesus mbot kep nihyet nibiti nindati tut no di hap njita ngan

¹⁸ “Gima rino ma jintu kep nihyet nibiti nindati tut no di hap njita ngan pima ningginausi.

¹⁹ Njita ngan di cut ug ei puigsi bindo tut yo di intu kep nihyet tut Allah Ninyeng Tak Kepti noro imiap ba, ingon dorti bi. Apino Bilis kwei pos nihyet di cut ug ei ingonti.

²⁰ Njita ngan di cut ug ei tigsi di bon dihyei suti bi bindo tut yo di intu kep nihyet lene iba ingon di kei bingon jo kep.

²¹ Noro nihyet com nigau ug ei ingonti bi apino ingon nddong bi. Tirigi mun di kinei cut igkep yok ba, hiter hwen bit yok drek dip nihyet lene jei bi ingkwei hanyen.

²² Njita ngan di cut ug ei bohousi bindo tut yo di ipwoi nihyet ei ingonti noro ingon ku yonti tut ndigban di mipror yon ba, iba yoho rok mitiei nindig bibor apino gima yok hagom ceu nihyet leu api ningat ntun him bi.

²³ Ba, njita ngan di cut ug ei dihyei suti bindo tut yo di intu kep nihyet bimiap ba, ningat ntun him. Ningat sratus gom ntun bihi him lene ningat ningot muhwindagom ntun bihi him lene ningat ningot ningai ntun bihi him bibikwop nok.”

Nihyet nibiti nindati tut no di hap gandum sisron ngan

²⁴ Yesus ba nihyet nibiti nindati bingginau yok mbigom kin bu bipai “Allah Ninyeng Tak Kepti rinok tungwagom di hap gandum ngan nitu ei nide miai ngwoisi.

²⁵ Noro nide siceu kwei mem himmun tirigi tungwatu nya yahagom ibong mai leu lene hap gandum sisron ngan srig gandum nitu ngan di keiti leu api mbris nyahan ba, ug leu.

²⁶ Tirigi gandum ngan nitu hei bitou su lene gandum sisron cem nikioi hei bisrigsi.

²⁷ Lene nide awak nya ikwei pai binoni ‘Andigpoi e, ahap gandum nitu ei miai ngwoisi bi e? Noro gandum sisron kioi di hei srigsi dima kwei leu hantou i?’

²⁸ Noni buhup ‘Ditde siceu hap ningan dima srigsi.’ Lene ihig ser noni ‘Nug hom gandum sisron kioi di hei srigsi leu e?’

²⁹ Noro noni srep ‘E bi! Leu gino mijohom gandum sisron lene jinda mittei gandum nitu nikioi bihi kin ri.

³⁰ Nnaba hacem hei srig yamti ug e. Tirigi nijam dem mem inju njita ug ei igudanti lene midicuk yo di igyai midyai dima bipia yohom gandum sisron keyam bibie ba, ike kin yam leu api indig kep huma. Leu api ikos gandum nitu ba, inju hagom ei igudanti.’ ”

Nihyet nibiti nindati tut biei sawi ngan

³¹ Lene Yesus ba nihyet nibiti nindati bingginau yok mbigom kin bu bipai “Allah Ninyeng Tak Kepti rinok tungwagom di ndim sawi ngan ei nide miai ngwoisi.

³² Sawi ngan dima bigbibor dor njiriek njita ngan nindigsi hagom noro tirigi hei su lene jei bibor dor njiriek njita nindigsi hagom ba, nok biei leu api ha nya itot yaham ei ninda nyati.”

Nihyet nibiti nindati tut roti ninjep

³³ Yesus ba nihyet nibiti nindati bingginau yok mbigom kin bu bipai “Allah Ninyeng Tak Kepti rinok sop gom di yai roti ninjep ba, biwir tepun ei tong mien gomti apino dwoi binindig.”

Yesus ba nihyet nibiti nindati bingginau yok leu binggon i?

³⁴ Yesus ba nihyet nibiti nindati he bingginau tungwatu nya tut mun nyeng hagom.

³⁵ Tug hon nisinati dima lene mun di tibim ei nabi nuhui him pek kep tu. Ba, nabi pai, “Diba nihyet nibiti nindati bingginau tungwatu nya. Dimbot kep tut mimun di jo nding habiei ei nimbie him kikau kwei bipek ammani kep.”

Yesus mbot kep tut nihyet nibiti nindati tut gandum sisron ngan

³⁶ Tirigi Yesus kes tungwatu nya leu ba, coi ug ei ig bei lene yo di igya kui Noni ikwei hig ser “Ambot kep nihyet nibiti nindati tut gandum sisron nikioi di hei srig gandum nituti pima mem nye.”

³⁷ Yesus buhup “No di hap gandum nitu ne Munggwom Tungwatu Nipmot ri.

³⁸ Miai ngoi ne dihyeisi dini ri. Gandum nitu ne yo di icoi bit Allah Ninyeng Tak Kepti ri. Gandum sisron ne Bilis de limwa nya ri.

³⁹ Siceu di hap gandum sisron ne Bilis ri. Njap di ikos gandum nitu kwei ne Njap Ningwig Honti ri. Yo di igyai midyai ne malaikat nya ri.

⁴⁰ Nohom gandum sisron nikioi bindig kep humti ne hukum di micut igkep tungwatu nya ei Njap Ningwig Honti ri.

⁴¹ Munggwom Tungwatu Nipmot micuk Nide malaikat nya leu binhyepo yuug mbus yo di ibindei dino hiter cut ei sisarti kin yo di isibut bibor nindigsi nya yahagom kwei leu Allah Ninyeng Tak Kepti.

⁴² Leu api Noni micom yahagom ug ei hum njengti di cig-cai. Ei mpia dima ne yoni ipim ba, itug ndei ninghuisi wei.

⁴³ Noro yo di ingon sren nya injeng piga mpia dem kep mpia di com nimig kikau ei Icig Ninyeng Tak Kepti. Gino jitingou dile lene ma jiyok ngon kep dihyet!”

Nihyet nibiti nindati tut brua di jo ei dihyei jou

⁴⁴ “Allah Ninyeng Tak Kepti rinok tungwagom di tig dihyei leu api ngat brua tut mitiei nindig bibor di jo dihyei jou. Gima rino noni ug tri nide ndigban hagom ba, bipek mitiei leu api kwei bipek dihyei hanjop nsi dima.”

Nihyet nibiti nindati tut sriou tiei njep

⁴⁵ “Gima cem Allah Ninyeng Tak Kepti rinok nitri nipek mun cig di nggok sriou tiei njep.

⁴⁶ Tirigi noni ngat gi hi di kei bibor kei lene noni ug tri nide ndigban hagom ba, bipek mitiei leu api kwei bipek sriou tiei njep dima.”

Nihyet nibiti nindati tut yo di icom jala

⁴⁷ “Gima cem Allah Ninyeng Tak Kepti rinok jala di tungwatu nya icom kep wau ei igpongti ba, ibiyai wau hi gom hi gom mang bibor.

⁴⁸ Ide jala mpung tut wau leu api ibrim ug ei igpong nintig dip ba, igwam kep bikwas wau leu yam. Imbus gi kei nya ei bansi leu lene icom gi kinei nya.

⁴⁹ Gima ne bindo tut Njap Ningwig Honti ri. Mpe dima ne malaikati nya mittei yam mem gima imbus yo di isibut nya leu yo di ingon sren nya ikieti.

⁵⁰ Leu api icom yahagom ug ei hum njengti di cig-cai. Ei mpia dima ne yoni ipim ba, itug ndei ninghuisi wei.”

Ningginausi nijep kin ningginausi nitimiei

⁵¹ Lene Yesus hig ser yok “Jimiap tu e?” Lene ibuhup “Andigpoi e, ningon dorti tu!”

⁵² Lene Yesus pai “Bikwop guru Puig Yahudi nicukti di coi bit Allah Ninyeng Tak Kepti rinok nibou ig bei gom di cat mun di nijep kin mun di nitimiei leu nide ig gudanti.”

Timiei minu ndig Nazaret nya ikou sut Yesus

⁵³ Tirigi Yesus kes hon gi tri tut nihyet nibiti nindati tut ningginau yokti lene Noni jo leu mpia dima,

⁵⁴ bingkwei hanyen ug ei nitimieisi. Lene Noni tri tut nihyet ei mben Yahudi ide ig mbusyameisi apino yo di imiap nihyet inga leu tut bihig yam “Tou rino pingok di ningon ki nok gini i? Noni ba nisindemti di notou bibon mindur dini yok i?

⁵⁵ Noni ne tukan biei nipmot rin bi e? Nipmem ninyeng Maria ba, nikinjoi bat nya Yakobus kin Yusuf kin Simon kin Yudas nya bi e?

⁵⁶ Nikwohop bat nya ibong bit nye bi e? Nok gima lene Noni yai ningon di ki dini leu tou i?”

⁵⁷ Gima rino ikou sut Noni. Lene Yesus pai biyok “Tungwatu nindigsi nya yahagom ikon no di nabi ninyeng noro nide bat nya kin nide ig bei nsi nya ikon ninyeng bi.”

⁵⁸ Gima rino Yesus bibon mindur mang bibor ei mpia ttou nsi dima bi drek dip gi iba ingon com Noni bi.