MATIUS 12 - ALLAH NIHYET MEM TUNGWATU NYA

Ningginausi tut Njap Nigwam Kep Ninghuisi

¹ Mpe di gom ne Yesus mbut kak puig ei miai gandum nghousi mem njap nigwam kep ninghuisi leu api yo di igya kui Noni inggum bibinot gandum ninjep gom-gom bigyem.

² Tirigi Farisi nya ingat igyai munti dima lene inso tut bak Yesus bipai “Angat i! Nggon rino yo di igya kui Na ibon mun tunggwei sut ide Allah niggai serti mem Njap Nigwam Kep Ninghuisi i?”

³ Lene Yesus buhup “Jikwop Allah Nihyet tut mun di Daud bibon tirigi noni kin nide limwa nya inggum bibor pima bi e?

⁴ Mbro nok gino Allah niggai serti cuon ser yok lo, Daud coi ug ei Allah de prak meng nsi ba, noni kin nide limwa nya igyem roti di jo ei Allah Noho bei di suar imam nya yongkom he igyem ke pima.

⁵ He jikwop Allah niggai serti dima tut imam nya cem di iba midyai di igyai ei Tuhan De Ig bipigau nidimig sutti dima bikwop Njap Nigwam Kep Ninghuisi nya bi e? Noro ingon mui drek dip bi.

⁶ Ma jiyok ngon kep bipia nicukti di bon ninyeng dor njiriek Tuhan De Ig no rinaha.

⁷ Allah Nihyet pai Allah joi sut gima tungwatu nya ingondut yam leu gi ikos mindhe tut ninggrom he. Gino jikan igbit tut ningginausi dima ne mijipai kep yo di ingon ngun nya bi.

⁸ Lewo Munggwom Tungwatu Nipmot ninyeng tak kep Njap Nigwam Kep Ninghuisi.”

Yesus bindei ba, no di ninda nite hi mai kei hanyen

⁹ Yesus jo leu mpia dima buug kikau ug ei mben Yahudi ide ig mbusyameisi gom ba,

¹⁰ no di ninda nite hi mai cem no rima. Lene ibou poi di itin ei mem ipai kep Yesus drek dip Nide midyai nya cem yo rima ba, ihig singgre Noni “Allah niggai serti sindui sut nye ba, ibindei tungwatu nya ikei hanyen mem Njap Nigwam Kep Ninghuisi e? He sindui sut nye bi e?”

¹¹ Yesus buhup “Gino jigom bon nide domba ningut gom ngat lo, domba dima cut ug ei jui nsi di jut bibor mem Njap Nigwam Kep Ninghuisi lene no dima miteu domba hanyen leu jui nsi bi e?

¹² Ningat ne tungwatu nibok kak bibor dor njiriek domba ningut gom! Gima rino Allah niggai serti sindui sut nye ba, inyohou mpu tungwatu nya mem Njap Nigwam Kep Ninghuisi.”

¹³ Lene Yesus pai bak no di ninda mai “Atit anda.” Noni tit ninda di mai leu api ninda kei hanyen dem kep ninda nite hi cem.

¹⁴ Lene Farisi nya yehei leu ig mbusyamei dima ba, yuhum yam nsi mem gima ikos Yesus.

Allah dimig Yesus nok Nide Awaga

¹⁵ Tirigi Yesus kan tut gi yuhum yam nsi dima tu lene Noni ug leu mpia ttou nsi dima lo, tungwatu nya ningot ndig ijop bram. Leu api Noni bindei ba, yo di inggwen yahagom ikei hanyen.

¹⁶ Noro Noni sok kep yok ngkiem ser nhyema itri tut Noni bak nindigsi nya au.

¹⁷ Leu binhyepo mun di Allah pai tug hon Nabi Yesaya mipek kep mem Yesus,

¹⁸ “No dini ne Ditde Awak rin ba, didimig Noni ei su. Dingon ngakei Noni bidingat dingwes ei Noniti cem. Midikes Dinnei ei Noni dip leu api Noni mitri tut dingon kanti bak ngkiai nya yahagom.

¹⁹ Noni liriem yok ba, nihyet hwen yok bi. Lene ba ninnei di jei bitri tut nihyet ei simpak nahau yamti cem bi.

²⁰ Noni midahat pika di koi ba, mu mini njeng di kinei bi noro mita nibou eisi bibou ningon srenti mikieng kep tungwatu nya yahagom ug e.

²¹ Lene ngkiai nya yahagom miba ingon com Noni.”

Ningginausi tut Yesus kin Beelzebul

²² Lene ibou poi ibuwak no di niyai tu ba, ninnei rom kibou noni di bit bon mbrap kan bi cem kwei ndam Yesus. Leu api Yesus bindei ba, niyai da hanyen ba, niji nggriu bimbrap.

²³ Tungwatu ningot ndig inggap leu tut nindig bibor ba, ihig yam “No dini ne Daud Nipmot di Allah Nihyet preu sut ei mem nye pima rin e?”

²⁴ Tirigi Farisi nya imiap nihig ser yamti dima lene isrep “Beelzebul di nibou ndig mem ninnei rom nya ya Yesus ningonti bisindem tut Noni leu binhyepo jji ninnei rom nya.”

²⁵ Noro Yesus kan tut Farisi nya ingon kanti dima lene pai biyok “Gino mben hi ikwas yam ei nimpung can ba, ikon pran bit yam lene mimai bingwig hak. Nok gima cem gino timiei minu ndig e, he yo di ibong ig nittou hi e, iba nitok biyam ne jei bi itot yam bingwig ug ri.

²⁶ Nok gima cem tut ninnei rom di Bilis ninyeng tak kep yok nya. Gino ikwas yam ei nimpung can bikon pran bit yam lene bit bon Bilis ninyeng tak kepti jo kikau bi.

²⁷ Jipai sut Da bipia Bilis risindem tut Da dino dijji ninnei rom nya e? Gi nok lene tou risindem tut jide limwa nya dino ijji ninnei rom nya i? Yoni indo bindo tut je bipia jiyai mun tunggwei.

²⁸ Noro dijji ninnei rom nya tug hon nisindemti di kwei leu Allah Ninnei. Diyai munti dima ne mun di bindo bipia Allah Ninyeng Tak Kepti tau kep je tu ri.

²⁹ Bit bon tungwagom nggek no di sindem nide ig bipos ndigban kan bi bibou ba kuk biteu no di sindem bingkiem nipou ug e leu api pos nide ndigban nya hagom bingwig ug.

³⁰ No di srep tut Da bi tti kin Da. No di mpu Da bi nggek tut Ditde midyai nya.

³¹ Gima rino dipai bije bipia Allah mikos ser sisar kin ighyet di wer mpiahi tut yam cem hagom. Noro Noni mikos ser sisar dino ighyet wer mpiahi tut Ninnei Gi Kwes kan bi!

³² Allah mikos ser sisar nisrep tut Munggwom Tungwatu Nipmotti noro bit bon Noni kos ser sisar nihyet wer mpiahi tut Ninnei Gi Kwesti mem nijam dini kin nijam ningwig honti cem kan bi!”

Ningginausi tut biei kin ningat di ntun him

³³ “Gino jinyohou biei njem nok gi kei lene ningat di kei ntun him. Gino jinyohou biei njem nok gi kei bi lene ningat di kinei ntun him. Jikan tut biei njem nya hagom tug hon ningat di ntun him.

³⁴ Je di jintun wou piet him e, bit bon jihyet di kei tibim kwei leu jingon di rom him kan bi. Lewo nihyet di tibim ei tungwatu nya yuhui him hagom kwei leu mun di ingon mpung tut.

³⁵ Ningat di kei ntun no di ningon kwes him lewo ningon kanti hagom kei. Lo, ningat di kinei ntun no di ningon rom him lewo ningon kanti hagom kinei.

³⁶ Ma jiyok ngon kep bipia tirigi Njap ningwig honti dem lene suar tungwatu nya yahagom ibiang bikwop ighyet di nok bu tan nibuhunti.

³⁷ Lewo mun di tibim ei juhui him mibindo bipia jibihi jingon ngun lo, jibihi jingon mui.”

Farisi nya yahara Yesus mem gima bon mindur

³⁸ Lene guru Puig Yahudi nicukti nya kin Farisi nya ibou poi yahara Yesus “Guru e, ningon llei sut gino abon mindur bou niyai him.”

³⁹ Yesus buhup “Ei nijam dini ne tungwatu nya ingon rom ba, ingkek ndok cem! Jahara Da tut mindur e? Dibon mindur bou jiyai him bi. Mbro nok gima lo, Allah mindo bindo mem je bit leu nok bindo di tug hon Nabi Yunus.

⁴⁰ Yunus bong ei wau ndig ninghopti mem mmun-njap ningai. Nok gima cem tut Munggwom Tungwatu Nipmot. Noni mibong ei dihyei jou mem mmun-njap ningai.

⁴¹ Tirigi Njap ningwig honti dem ne timiei minu ndig pmem Niniwe nya mikiju bit je di nijam dini leu api mipai kep je lewo tirigi Yunus tri tut nihyet biyok lene ittin ser ide sisar. Noro nogindini no di ninyeng jei dor njiriek Yunus no rinaha!

⁴² Tirigi Njap ningwig honti dem lene nibou ndig sop di kwei leu mpia nibiho mikiju bit je di nijam dini leu api mipai kep je lewo noni jo leu nitimieisi ei minu ting bibor kwei lene ngig nitingou mem Salomo di ba ningon di ki bingginau tungwatu nya pima nihyet. Noro nogindini no di ninyeng jei dor njiriek Salomo no rinaha!”

Ninnei rom ningkwei hanyenti

⁴³ “Tirigi ninnei rom hei leu tungwagom ningonti lene mbut-mbut nyen ei iggum ndigsi binggok mpia dima bong kep ninghuisi eisi lo, ngat hi bi.

⁴⁴ Gima rino noni kan ‘Nna! Singkwei hanyen ug ei ig bei di sikwei leu pima.’ Noni ngkwei hanyen ug ei ig dima bingat lo, hi bong ser bi ba, cok mumpiang hagom bipwoi leu lene kinding ig bei bikei hanyen tu.

⁴⁵ Gima rino ninnei rom dima ug buwak nisut ninnei rom di ikinei bibor dor njiriek noni ibou muhwindacan bu ba, icoi ug ei no dima ningonti apino nide niyaijoti kinei bibor dor njiriek gi nipou bu. Mun dini micut igkep yo di isibut nya di ingat rin ei nijam dini.”

Yesus nipmem kin nikinjoi bat nya

⁴⁶ Tirigi Yesus tri tut nihyet bak tungwatu nya bingwig bigyo lene nipmem kin nikinjoi bat nya itau kwei bigya biyati ba, ijoi sut imbrap bit Noni.

⁴⁷ Gima rino tungwagom pai biNoni “Andigpoi e, apmem kin akinjoi bat nya rino ikwei ya biyati ba, ijoi sut imbrap bit Na.”

⁴⁸ Lene Yesus buhup “Dipmem kin dikinjoi bat nya ningat nya ritou nya i?”

⁴⁹ Leu api su ninda bindo yo di igya kui Noni bipai “Jingat i! Yo dini ne dipmem kin dikinjoi bat nya ri.

⁵⁰ Lewo no di yai igbit Dicig ei gwamti ningon kanti ne dikinjoi kin dikwohop kin dipmem ri.”