MATIUS 10 - ALLAH NIHYET MEM TUNGWATU NYA

Yesus dimig yo di igya kui Noni ibou simnaibrimigcan

¹ Njap poi ser leu api Yesus nduk yo di igya kui Noni ibou simnaibrimigcan biyai nisindemti biyok leu binhyepo ijji ninnei rom nya ba, ibindei yo di inggwen yahagom inghuisi kwes hanyen.

² Yo di igya kui Noni inyeng rino Simon (ijem ninyeng hi Petrus) kin nikinjoi Andreas kin Yakobus kin nikinjoi Yohanes di Zebedeus nipmot bat cin,

³ bitut Filipus kin Bartolomeus kin Tomas kin Matius di nipou ya tindei belasten kin Yakobus di Alfeus nipmot kin Tadeus,

⁴ kin Simon di nggre kin nimpung Nasionalisasi kin Yudas Iskariot di mitri Yesus.

Yesus sok nihyet ei yo di igya kui Noni ibou simnaibrimigcan dip

⁵ Lene Yesus cuk ibou simnaibrimigcan dima bisok kep yok “Jimbut bijuug ei ngkiai nya kin timiei Samaria nya ide minu ndig au.

⁶ Noro ma juug nggok mben Israel he lewo inok domba di israwir nya.

⁷ Jitri tut biyok bipia Allah Ninyeng Tak Kepti dideu kwei su.

⁸ Ma jibindei ba, yo di inggwen ikei hanyen lene jiwin yo di imai nya bikiju hanyen leu imai eisi. Ma jibindei ba, yo di bras yem yok igyai ingkek ngun eisi hanyen ba, jijji ninnei rom nya leu tungwatu nya ingonti. Diyai nisindemti dini bije mikuisi hak bijipek bi. Gima rino ma jibindei ba, tungwatu nya ikei hanyen mikuisi hak ba, ibirop hanyen bije au.

⁹ Ma jipwoi mitiei hi mem jimbutti au.

¹⁰ Ma jibiang minai tut sinsun ninda kin srop bijittei tom au. Lewo no di yai midyai dima dem mem gima tug ndei mun di bahati tut nonti.

¹¹ Tirigi juug krau minu ttou nsi hi lene ma jitou kep no di cigit je kui ig bijibit bong. Jibong ser ig gom ngat dima hak ba, jibimbut kep.

¹² Mpe dino jicoi ug ei ig hi lene ma jipigo yok ‘Handei kon ba, jibong kei jigwam kei ug o!’

¹³ Gino ig niceu bat nya iba ingon di kwes biya um je lene mun di jipigo yok dima mijo ei yoni dip. Gino iba ingon di kwes biya um je bi lene ma jitug mun di jipigo yok dima hanyen leu yok.

¹⁴ Gino ig niceu bat nya kin timiei nya igya um je bintu kep jihyet bi lene ma jingkwei nyahan leu minu ttou nsi dima ba, jikit jimig jou tut ide dihyei ndung di dimbos hak ug.

¹⁵ Ma jiyok ngon kep bipia tirigi Njap dem mem Allah ba hukum bibirop hanyen bak tungwatu nya lene miningon nggriu sut timiei Sodom kin Gomora nya dor njiriek gi ningon nggriu sut minu ttou nsi dima.”

Jei bi lene tungwatu nya mihwen bit yo di igya kui Yesus

¹⁶ “Jimiap e, dicuk je nok domba nya ug ei nsien di niten-pos nya ikieti. Suar jingon sok kep jenti noyam kin wou nya noro ma jingon jo nyahan noyam kin hakimoi nya.

¹⁷ Ma jingon sok kep jenti tut yo di ikat je ug ei Nikei Puig Yahudi nya yoho bei leu api imbas je ei mben Yahudi ide ig mbusyamei nya.

¹⁸ Yoni mibuwak je ug ei yo di inyeng jei nya kin nibou ndig nya yoho bei drek dip gi jiya kui Da. Mpe dima lene jibon nituti mem gima jitri tut Nihyet Di Kei bak nibou ndig nya kin ngkiai nya.

¹⁹ Gino jiya ei nikei nya yoho bei lene ma jingon ku jenti tut mun di jibirop hanyen biyok au. Lewo mpe dima lene Allah mipingok jingonti tut mun di jibirop hanyen yo.

²⁰ Lewo mun di tibim ei juhui him mikwei leu jenti jingonti bi noro Jicig Ninnei miba jihyet di Noni pingok jingonti tut dima bibirop yo dima ighyet.

²¹ Mpe dima lene yo di ikinjoi bat yam mitri yam leu api yo di ikrau nisindemti nya mijem nimai gau yok. Nok gima cem andig poi nya mitri imunggwom bat nya ba, munggwom nya mitri icig bat-ipmem bat nya leu api yo di ikrau nisindemti nya mijem nimai gau yok bu.

²² Ba, tungwatu nya yahagom ingon mpo tut je drek dip gi jiya kui Da. Noro Allah miteu no di ya ngkiem kikau ug bipek ningwig honti ba, ningwes ngun.

²³ Gino timiei minu ttou nsi gom ihwen bit je lene ma jinang ug ei minu ttou nsi hiter bu. Dipai bije bipia nipou tirigi jicem kep mben Israel ide minu ndig nya hagom bidem bigyo lene Munggwom Tungwatu Nipmot kwei hanyen tu.

²⁴ Munggwom pikor ninyeng jei dor njiriek nide guru ninyeng bi. Awak cem ninyeng jei dor njiriek niceu ninyeng bi.

²⁵ Gima rino ma munggwom pikor ningon cut hon gima kui klas ug ei sur nide guru. Ma awak di brim ningkek ningon cut hon gima yai ninyeng ug ei sur niceu ninyenga. Gino tungwatu nya ipai ig ceu hi kinei bijem ninyeng Beelzebul lene notou mem nide ig bei nsi nya i? Tungwatu nya mijem inyeng kinei bibor dor njiriek bu!”

Ningginausi tut nittin tut Allahti

²⁶ “Ma jittin tut tungwatu nya au. Ninjeng gom mipiga digai mun nyeng hagom di jo nding hanyen. Nihyet gom mitibim tut mimun hagom hanyen.

²⁷ Mun di dimbot kep bije ei nidinditi lene ma jitri tut hanyen brei bak tungwatu nya. Ba, mun di tibim nyahan ei jitingou nsi lene ma jitri tut hanyen ei simpak nahau yamti!

²⁸ Ma jittin tut yo di ikimukep jingut au. Lewo bit bon ikimukep jinnei kan bi. Noro ma jittin tut Allah di sindem mem gima com jingut kin jinnei ug ei hum njengti.

²⁹ Jiba mitiei nimeng ngwoi gom bipek minsit ningut can e? Mbro nok gima lo, minsit ningut gom cut bimai ei dihyeisi njiriek Jicig ningon kanti bi.

³⁰ Nok gima cem Allah kan tut jibou nta nimangti.

³¹ Gima rino ma jittin tut au! Lewo jibok kak bibor dor njiriek minsit nimpung nindig bibor niboga.”

Ningginausi tut yo di itti kin Kristus kin yo di itti kin Noni bi

³² “Bikwop no di tri tut brei bipia noni tti kin Da lene Dani cem miditri tut brei bipia ditti kin noni ei Dicig Noho bei ei gwamti.

³³ Noro bikwop no di bikep ser Da brei ne Dani cem midibikep ser noni brei ei Dicig Noho bei ei gwamti.”

Ningginausi tut nibong kei nigwam keisi kin niba nitok biyamti

³⁴ “Ma jikan bipia dikweisi bindei ba, tungwatu nya ibong kei igwam kei au. Dibindei nok gima bi noro dibindei ba, iba nitok biyam.

³⁵ Lewo dikweisi ribindei dino pinai nya iba nitok bak icig bat nya lene sop nya iba nitok bak ipmem bat nya ba, sop dino ignyot bat yam cem iba nitok biyam.

³⁶ Gi minok nitok nindig bibor rino leu yonti ide ig bei nsi nya.

³⁷ No di ningon ngakei nicig kin nipmem nindig dor njiriek ningon ngakei Dati ne dem mem noni ya kui Da bi. No di ningon ngakei nipmot kin nipmisop nindig dor njiriek ningon ngakei Dati ne dem mem noni ya kui Da bi.

³⁸ No di kon nide biei salib bibit Da bi ne noni dem mem gima ya kui Da bi.

³⁹ Lewo bikwop no di ningon hek tut nonti bikan bipia niyaisi bon ninyeng mem nonti lene niyaisi misar.”

Allah miba munkwas bibirop igyai munti di kei nya

⁴⁰ “Bikwop no di ya um je ne gima dem kep nok noni ya um Da. No di ya um Da ne gima dem kep nok noni ya um No di cuk Da kwei.

⁴¹ Bikwop no di ya um nabi gom drek dip ninyeng nabi ne Allah miba munkwas di no yam kin nabi pima nimuhup bibirop hanyen binoni. Bikwop no di ya um no di ningon sren drek dip no dima ningon srenti ne Allah ba munkwas di no yam kin no di ningon sren pima nimuhup bibirop hanyen binoni.

⁴² Bikwop no di tin kau tut minyei mem no di bon ninyeng bi drek dip niya kui Dati lene ma jingon jo kep bipia Allah ba munkwas bibirop hanyen binoni!”