MARKUS 2 - ALLAH NIHYET MEM TUNGWATU NYA

Yesus bindei ba, no di las hwen kei hanyen

¹ Njap poi ser lene Yesus ngkwei hanyen ug ei minu ndig Kapernaum leu api tungwatu nya itri tut nikwei hanyenti biyam.

² Gima rino tungwatu ningot ndig induk yam kwei bingwig ei ig bei ba, bit bon bihi kin bu icoi bingat Noni kan bi. Ba, nindigsi nya inggreu ser dimbou hui leu api Yesus tri nihyet biyok.

³ Mpe dima lene tungwatu nya ibou bitai ittei lat tut no di las hwen kwei bipi bingat Yesus.

⁴ Noro bit bon ittei lat tut noni kikau bikes ei Yesus Noho bei kan bi. Lewo tungwatu ningot ndig inggreu ser. Gima rino ikui ug ei ig bou njek dip ba, isindik bigyem sra bitut bot nya leu bibon nimihyeti ei anai Yesus nigwamti leu api itu kuk tut lat di no di las hwen bongti ndam Noni.

⁵ Tirigi Yesus ngat lo, iba ingon com Noni lene pai bak no di las hwen “He mot de ug o, dwai! Dikos ser ade sisar tu.”

⁶ Guru Puig Yahudi nicukti nya ibou poi di ingat rin ei mpia dima ikan,

⁷ “No dini nihyet wer mpiahi tut Allah. Tou rino sindem mem gima kos ser sisar i? Allah Nongkom he rino sindem mem a.”

⁸ Lene Yesus kan tut ingon kanti leu api hig singgre yok “Jikan-kan nyen ei jingonti leu binggon i?

⁹ Gi tou rikrop i? Dipai ‘Dikos ser ade sisar’ e, he ma dipai ‘Akiju ba, attei ade lat ba, ambut tut hak ug’ e?

¹⁰ Noro nogindini midindo bindo brei bije leu binhyepo jikan tut bipia Munggwom Tungwatu Nipmot yai nisindemti ei dihyeisi dini mem gima kos ser sisar.” Api Noni cuk no di las hwen,

¹¹ “Dipai bina bipia akiju ba, aya pijum lene ma akon ade lat ba, aug sut ei ade ig hak ug!”

¹² Noni kiju kros biya bou yahagom igyai him bikon nide lat buug sut leu ig bei dima. Apino tungwatu nya yahagom inggap leu tut bijo ninno binggei sut Allah lene ipai biyam “Mbenjen! Igingat mindur di nok gini hi ei igyai him bigyo.”

Yesus dimig Lewi

¹³ Yesus mbut nimig ug ei Igpong Galilea nintig dip leu api tungwatu ningot ndig induk yam kwei bingwig ttai Noni lene Noni sindi ngginau yok.

¹⁴ Noni mbut mbigom bu bitau kep Lewi di Alfeus nipmot tirigi gwam ei nide kintrorti biya tindei belasten biyem tungwatu nya imuhup. Yesus hig noni “Akwei bit Da.” Gima rino Lewi kiju bibit Noni bihigom.

¹⁵ Tirigi Yesus yem njita bit Lewi ei nide ig lene yo di igya tindei belasten bigyem tungwatu nya imuhup nindigsi nya kin yo di map kui yokti nya imang bibor induk yam kwei bigwam bit Yesus kin yo di igya kui Noni. Lewo yo di imang bibor ijop bram Yesus.

¹⁶ Tirigi guru Puig Yahudi nicukti nya di inggre kin nimpung Farisi nya ingat lo, Yesus yem njita bit yo di igya tindei belasten di igyem tungwatu nya imuhup kin yo di map kui yokti nya lene ihig ser yo di igya kui Noni “Nggon rino jide guru yem njita bit nikinei-kinau dima yok i?”

¹⁷ Yesus miap ighyet leu api buhup “Yo di ikei nya yuug ngat yo di inda kan nya bi noro yo di inggwen rino yuug ngat yok a. Dikwei ei dihyeisi dini mem dinduk yo di ikan bipia ikei-kau nya bi noro dinduk nikinei-kinau nya leu binhyepo ittin ser ide sisar bikiek yok ndam Allah.”

Ningginausi tut niyem njita bi mem nituti poi

¹⁸ Mpe dima lene yo di igya kui Yohanes kin yo di igya kui Farisi nya igyem njita bi mem nituti poi. Gima rino tungwatu nya ibou poi ikwei hig ser Yesus “Nggon rino yo di igya kui Yohanes kin yo di igya kui Farisi nya igyem njita bi mem nituti poi noro yo di igya kui Nani igyem njita kikau i?”

¹⁹ Yesus buhup “Tirigi igyem njita pesta niwak yamti lene yo di igwam tut no di pinai igyem njita bi tirigi noni ningat rin bit yok e? Nok bi. Gino no di pinai ningat rin bit yok lene igyem njita bi mem nituti poi kan bi.

²⁰ Noro ei nidipti bu tirigi yo di hiter ikwei buwak no di pinai bimbut tut leu yok leu api igyem njita bi mem nituti poi.

²¹ Tungwatu nya iba sinsun nghas di nijep-jau binap kep ser sinsun timiei nirikti bi. Leu mbigom sinsun nghas di nijep-jau bindei ba, sinsun timiei rik bibor bu.

²² Nok gima cem tungwatu nya yuhug ba anggur ngei di nijep ei aigmui mindhe ngkek timieiti bi. Leu gi nok lene mbigom ba anggur ngei mikiak lene aigmui mindhe ngkek mikimbo bikinei sut ba, kiber bingwig ri. Lene aigmui mindhe ngkek dima cem kinei. Noro suar yuhug ba anggur ngei di nijep ei aigmui mindhe ngkek di nijepti.”

Ningginausi tut Njap Nigwam Kep Ninghuisi

²³ Mpe di gom bu ei Njap Nigwam Kep Ninghuisi lene Yesus mbut kak puig ei miai gandum nghousi leu api yo di igya kui Noni ibinot gandum ninjep gom-gom.

²⁴ Lene Farisi nya inso tut bak Yesus bipai “Angat i! Nggon rino yoni ibon mun tunggwei sut ide Puig Yahudi niggai serti mem Njap Nigwam Kep Ninghuisi i?”

²⁵ Lene Yesus buhup “Jikwop Allah Nihyet tut mun di Daud bibon tirigi noni kin nide limwa nya inggum bibor bi e?

²⁶ Mbro nok gino Puig Yahudi niggai serti cuon ser yok lo, Daud coi ug ei Allah de prak meng nsi tirigi Abyatar yai midyai nok Imam Nibou Ndig ba, noni kin nide limwa nya igyem roti di idis ei Allah Noho bei di imam nya yongkom he igyem kep.”

²⁷ Lene Yesus pai bu “Allah ndo Njap Nigwam Kep Ninghuisi mem gima mpu tungwatu nya noro Noni bindei tungwatu nya ba, inok awak mem Njap Nigwam Kep Ninghuisi nicukti nya bi.

²⁸ Gima rino Munggwom Tungwatu Nipmot ninyeng tak kep Njap Nigwam Kep Ninghuisi.”