LUKAS 23 - ALLAH NIHYET MEM TUNGWATU NYA

Ibuwak Yesus ug ei Pilatus noho bei

¹ Nikei Puig Yahudi nya yahagom ikiju bigya leu api ibuwak Yesus ug ei Pilatus noho bei.

² Ikkin kep Yesus ninghapti ei sirima bipai “Nittau kep No dini tirigi Noni kes ningon bak ade limwa nya. Noni pai ser tungwatu nya bipia ma igo belasten bak Kaisar au noro jem Nonti ninyeng bipia Nibou Ndig di teu tungwatu nya biyai niyaijo nijep biyok.”

³ Lene Pilatus hig ser Yesus “Nani ne Nibou Ndig mem mben Yahudi rin e?” Yesus buhup “Bit leu nok apaisi dima.”

⁴ Lene Pilatus pai bak imam nindig nya kin yo di ningot ndig dima yok “Jo nibreisi bipia No dini yai mun tunggwei di dem mem gima dikes hukum ei Noni dip bi.”

⁵ Noro yo dima ibrim ingkek kep bibidip huk Pilatus bipai bak “Noni kes ningon bak tungwatu nya bibindei ba, yaham imbuk kep nibou ndig ei hanjop Yudea nisurti-nipekti. Noni kinyon eisi ei hanjop Galilea kikau bikieng kep hanjop dini cem tu.”

Ibuwak Yesus ug ei Herodes noho bei

⁶ Tirigi Pilatus miap tu lene hig ser yok tut Yesus bipai “Yesus nitimieisi leu Galilea e?”

⁷ Tirigi noni miap Yesus nitimieisi leu hanjop nsi di Herodes ninyeng tak kep lene noni cuk Yesus buug ya ei Herodes noho bei lewo njap dima ne Herodes ningat rin ei Yerusalem.

⁸ Tirigi Herodes ngat lo, Yesus kwei ya ei noho bei lene ningon llei bibor lewo Yesus ninghapti tibim ug ei nitingou nsi ninno tu. Herodes joi sut ngat Yesus bou niyai him. Gima rino yok ningon mem gima Yesus bon mindur.

⁹ Noni hig ser Yesus tut mun nyeng mang bibor noro Yesus buhup bi.

¹⁰ Imam nindig nya kin guru Puig Yahudi nicukti nya cem yo rinaha bigya ei Herodes noho bei lene iba ingon ko-ko wai bipai kep Yesus.

¹¹ Herodes kin nide tentara nya iba Yesus bikek ba, iba ighyet bicig Noni cem. Ijuk sinsun ndok di jei di nibok kak ei Noniti leu api Herodes pinak Noni bingkwei hanyen ug ei Pilatus noho bei.

¹² Herodes kin Pilatus ingon kwes kin yam hanyen ei njap dima. Noro nipou ne iba nitok biyam.

Pilatus jem nimai gau Yesus

¹³ Pilatus nduk imam nindig nya kin nibou mben Yahudi nya kin tungwatu nya yahagom kwei,

¹⁴ bipai biyok “Apo jibuwak No dini kwei bijipai sut Noni bipia kes ningon bak ditde limwa nya. Dimbus ningonti ei joho bei tu noro jo nibreisi bipia ningon mui bi. Noni yai mun tunggwei bit leu nok jipai kep Noti pima bi.

¹⁵ Nok gima tut Herodes cem lewo noni kes Yesus bipinak Noni hanyen kwei ndam nye tu. No dini yai mun tunggwei leu dima dijem nimai gau Noni bi.

¹⁶ Gima rino dimbas Noni mbigom ug e leu api dikes Noni hanyen bimbut.” [

¹⁷ Bikwop nibon midut kep Njap Ndig Paskahti ne suar Pilatus kes tungwagom di sima bit leu nide limwa nya ingon kanti.]

¹⁸ Yo di yahagom di idem yam ei dima ijem mun bak noni “Ajem nimai gau Yesus leu api akes Barabas binye!” (

¹⁹ Barabas sima drek dip naham nimbuk kep nibou ndigsi ba, hwen mun cem tu.)

²⁰ Pilatus pi bikes Yesus bimbut. Gima rino noni mbrap bit tungwatu ningot ndig pima yok mbigom kin bu.

²¹ Noro yahagom ijem mun bak noni bipai “Apek Noni ei biei salibti hak ug o! Apek Noni ei biei salibti hak ug o!” Lene nok.

²² Lene Pilatus hig ser yok nimbiningai “Noni yai mun tunggwei di nok mindei ngan i? Dimbus ningonti tu noro jo nibreisi bipia Noni yai mun tunggwei leu dima dijem nimai gau Noni bi. Gima rino dimbas Noni mbigom ug e leu api dikes Noni bimbut hak.”

²³ Noro yo dima iba ighyet nindig bibor bijem mun bak noni bipai “Apek Noni ei biei salibti hak ug o!” Yoni ibrim ingkek kep Pilatus bibou ce tut ighyet ug e.

²⁴ Gima rino Pilatus jem nimai gau Yesus drek dip yo di ningot ndig pima yok ijem bakti,

²⁵ lene kes no di sima di bie tut yo di yaham imbuk kep nibou ndig ba, hwen mun cem tu dima lene kes Yesus ei yo dima indati bit leu ingon kanti.

Ipek Yesus ei biei salibti

²⁶ Gima rino tentara nya ibuwak Yesus bimbut tut ba, ikat Simon leu minu ndig Kirene ei puig sinon tirigi jo leu ngoi dumti bikwei dideu minu ndig dima. Ikes Yesus de biei salib ei Simon ninghat dip bittei bram Yesus.

²⁷ Tungwatu ningot ndig ijop bram Yesus bitut sop nya di igya srig yokti di ipim ba, ingon ngguk bibor cem.

²⁸ Noro Yesus kiek No kep yok bipai biyok “Sop Yerusalem jen! Ma jipim tut Da au. Ma jipim tut jenti kin jimunggwom bat nya.

²⁹ Lewo ei nijam di mittau ei nidipti bu ne tungwatu nya mipai biyam ‘Sop di ipijet kin sop gwam nitta pilei nya kin sop di igyai ido bak imunggwom bat nya bigyo yahagom ingon nggei-hi-nggei!’

³⁰ Mpe dima lene tungwatu nya yahara nungug nya ‘Ma jitti hwen nye o!’ Ba, yahara tring behei nya ‘Ma jitti bisu kep nye o!’

³¹ Gino tungwatu nya ibibon nok gini tut biei ngun lene mibon mindei bu tut biei mui i?”

³² Tentara nya ibuwak yo di isibut nya ibou can cem leu binhyepo itug ndei nimai bit Yesus.

³³ Tirigi yuug krau mpia ttou nsi di ninyeng Nimbiam Bou lene ipek Yesus ei biei salibti bibipek yo di isibut nya ibou can kin bu ei ide biei salibti. Hi ei nite bei Yesus ninda com lene hi ei nite bei ninda prak.

³⁴ Lene Yesus hara bipai “Arig e, akos ser ide sisar! Ikan tut mun di igyai dini bi.” Tentara nya iko bibinggok tut Yesus de sinsun bingwig leu lene ikwas Yesus de sinsun tut yam.

³⁵ Tungwatu nya di induk yam ei sirima itou kep hak. Noro nibou ndig mben Yahudi nya iba ighyet bicig Noni bipai “Noni teu yo di hiter ba, ingwes ngun. Gino Noni ne Nibou Ndig di teu tungwatu nya biyai niyaijo nijep biyok di Allah ndo ei su ningat-ngat rin lene ma teu Nonti hak biningwes ngun.”

³⁶ Tentara nya cem iba ighyet bicig Noni. Ikwei su biei ngat ningei di hyenha biNoni bidut,

³⁷ bipai bak “Gino Nani ne Nibou Ndig mem mben Yahudi rin lene ma ateu Nanti ba, angwes ngun hak ug!”

³⁸ Srat nimeng gom di ipas Nide hukum eisi jo anai nibou. Nipas kepti pai ‘No dini ne Nibou Ndig Mem Mben Yahudi ri.’

³⁹ Tungwagom leu yo cin di isibut di ipek kin biei salib pima ba nihyet bicig Yesus bipai “Nani ne Nibou Ndig di teu tungwatu nya biyai niyaijo nijep biyok rin e? Ma ateu Nanti kin nyeni hak bingwes ngun!”

⁴⁰ Noro no di sibut hiter pai ser noni “Attin tut Allah bi e? Atug ndei hukum nimai noyam kin Noni.

⁴¹ Gima igbit mem sani. Lewo situg ndei hukum drek dip mun di siyai tunggwei. Noro No dini yai mun tunggwei hi bi!”

⁴² Lene noni pai “Yesus e, ayok ngon kep da tirigi akwei hanyen nok Nibou Ndig!”

⁴³ Yesus pai binoni “Dipreu ei mem na bipia ei njap di ammani angat rin bit Da ei nibreisi ei ginyo kug ug ri.”

Yesus nimaisi

⁴⁴ Ug ei mpia huk pijum rino mmun ken nggai kep minu dima hagom ba, mpia njap com bi kikau mem jam nitindur ningai ba,

⁴⁵ ban mbrawin di ipindur ei Tuhan De Ig rik hacan cem.

⁴⁶ Lene Yesus ba nihyet nindig bahara “Arig e, dikes dinnei ei andati!” Hara nok rino ninnei kimbas.

⁴⁷ Tirigi nibou tentara ngat mun di pek kep dima hagom lene noni nggei sut Allah bipai “Jo nibreisi bipia No dini yai mun tunggwei hi bi!”

⁴⁸ Tirigi tungwatu ningot ndig di idem yam ei mpia ttou nsi dima ingat mun di pek kep dima hagom lene ittem ingon him bingkwei hanyen ug ei ide ig.

⁴⁹ Yesus nisut bat nya bitut sop nya di ibit Noni kwei leu Galilea icap leu minu ting he.

Itig Yesus ningut

⁵⁰ Yusuf di nitimieisi leu minu ndig Arimatea ei hanjop Yudea cem ningat rin ei sirima. No dini ningon nddong ba, ningon sren cem. Noni yok ningon mem nijam di Allah ninyeng sindi tak kep Nide limwa nya.

⁵¹ Mbro nok gino noni nggre kin Nikei Puig Yahudi nya lo, noni ce tut Nikei Puig Yahudi nya ide nikos tutti kin mun di ibibon bak Yesus bi.

⁵² Lene noni ug ya ei Pilatus noho bei ba, hara noni leu binhyepo kes Yesus ningut bak noni.

⁵³ Leu api noni cug Yesus ningut leu biei salib lene ba sre di jei bibor di iba minghas linen bibon binggai leu lene kon ningut ug ei jui nsi di tungwatu nya itu ei tring behei lo, hi kes nimai ngut eisi bigyo.

⁵⁴ Mpe dima lene ug ei las muhwiti tu ba, son dideu Njap Nigwam Kep Ninghuisi tu.

⁵⁵ Sop di ibit Yesus kwei leu Galilea ibram Yusuf bingat hak mihyeti kin notou noni kon nimai ngut bikes eisi cem.

⁵⁶ Yoni ingkwei hanyen ug ei ide ig leu api itin ei mpam di ui-gwang kei kin mini mbris mem ibihwen nimai ngut. Noro ibong kep inghuisi mem Njap Nigwam Kep Ninghuisi bit leu nok Puig Yahudi nicuk yoti.