LUKAS 2 - ALLAH NIHYET MEM TUNGWATU NYA

Maria srek tut Yesus

¹ Ei mpe dima Kaisar Agustus tri nihyet bipai bipia suar bikwop nide limwa nya bidem dihyeisi dini hagom yuug ei kintrorti di jo ei itimieisi bindat kep inyeng leu binhyepo noni kan tut yahagom imangti sok yam.

² Nikwop kep imangti gi nimbie him ngat dini mbut mem nijam di Kirenius nok nibou mem minu Siria yo.

³ Gima rino tungwatu nya yahagom ingkwei hanyen ug ei itimieisi mem gima indat kep inyeng.

⁴ Yusuf cem jo leu minu ndig Nazaret ei hanjop Galilea buug ei nidigup-nidigai di Daud nitimieisi ei minu ndig Betlehem ei hanjop Yudea.

⁵ Yusuf ndat kep ninyeng kin Maria di yok wa kep nok nitnem ninyeng cem mem nijam di Maria tta buhun.

⁶ Tirigi ibong ei minu ndig Betlehem lene Maria ninghim dut,

⁷ bisrek tut nipmot mighumbou biba ban binggai lene kes nyahan tut ei brua nsi di sapi nya igyem kep njita eisi lewo ig losmen hi bon ningwakti mem yok bi.

Gembala nya kin malaikati nya

⁸ Gembala nya cem yo rinaha ei hanjop nsi dima bigwam ser domba di ide nya ei dumti mem mmun.

⁹ Nok rino idrui sut lo, malaikati Allah de gom tau kros biya hak ei ikieti lene Allah nikei-kausi cem piga mpia kei bibindei ba, ingwes mba.

¹⁰ Noro malaikati pai ser yok “Jittin au! Lewo dikwei tri tut nihyet di kei bije ba, nihyet dima mibiyai tungwatu nya yahagom ingon llei bibor.

¹¹ Njap di ammani jide Nibou Ndig di miteu je leu sisar biyai niyaijo nijep bije nipmem srek tut ei Betlehem ba, ninyeng rino Kristus Tuhan!

¹² Ba, mun di ndo bindo tut dipaisi dini rinok gini. Mporo jimbut bijittau kep ningwoi-ngwoi dima bijingat lo, no iba ban binggai di ikes tut ei brua nsi ei a.”

¹³ Leu api malaikati nimpung nindig gom ittau kros bigya kui noni lene ipai doia bibinggei sut Allah bipai,

¹⁴ “Ma inggei sut Allah di Ninyeng Jei ei gwamti o! Ma yo di Tuhan joi sut yok nya ibong kei igwam kei ei dihyeisi dini o!”

¹⁵ Tirigi malaikati ningot ndig dima yok ikes gembala nya leu bingkwei hanyen ug ei gwamti lene gembala nya icuk yam bipai “Jihwou ba, yuug ngat ser mun di Allah mbot kep binye di pek kep mem nye ei Betlehem i!”

¹⁶ Lene ibipbur biyuug ttau kep Maria kin Yusuf bingat lo, ningwoi-ngwoi dima No bong nyahan ei brua nsi ei a.

¹⁷ Tirigi ingat ningwoi-ngwoi dima lene inyohou tri tut mun di malaikati pai sut ningwoi-ngwoi dima biyok.

¹⁸ Lene yo di imiap mun di gembala nya itri tut biyok dima yahagom inggap leu tut nindig bibor.

¹⁹ Noro Maria pwoi mun dima yok hagom ei ningonti lene ba ningon bisrip huk.

²⁰ Gembala nya ingkwei hanyen binggei sut Allah tut mun di imiap kin mun di ingat bou igyai him lewo hagom pek kep malaikati nipaisi.

Ijem ningwoi-ngwoi ninyeng Yesus

²¹ Tirigi nide njap ug ei njap muhwindaningai su lene ibon midut sunat biNoni ba, Yusuf kin Maria ijem ninyeng Yesus. Ninyeng dima bit leu malaikati nipaisi nipou tirigi nipmem nghop bigyo.

Idimig Yesus ei mem Tuhan ei Tuhan De Ig

²² Mpe di gom bu tirigi tto bou dem mem Yusuf kin Maria ibon midut nibindei kwes pinai kin nitnem di srek tut munggwom bit leu nok Puig Yahudi niggai serti lene yuusap ningwoi-ngwoi dima ug ei Yerusalem leu binhyepo idimig Noni ei mem Tuhan.

²³ Lewo Allah nicukti pai “Suar jidimig bikwop pinai mighumbou yahagom ei mem Allah.”

²⁴ Lene ibon midut nikos bijut hacig gom hawek gom e, he nikos hakimoi nimien ningut can e, bit leu nok Allah nicukti.

²⁵ Mpe dima lene Simeon no bong ei Yerusalem. No dini ningon sren bittin tut Allah lene mem kep ser tto bou tirigi Allah miteu mben Israel. Ninnei Gi Kwes cem ningat rin bit noni,

²⁶ bimbot kep tut binoni nipou su bipia noni mimai bi bibou ngat Nibou Ndig di teu tungwatu nya biyai niyaijo nijep biyok di Allah preu ei mem yok bou niyai him nipou ug e.

²⁷ Mpe di gom, lene Ninnei Gi Kwes bie tut noni ug ei Tuhan De Ig lene Yusuf kin Maria yuusap Yesus ningwoi-ngwoi kwei mem gima ibon midut sunat biNoni bit leu nok Puig Yahudi niggai serti.

²⁸ Lo bi lene Simeon krau ningwoi-ngwoi dima ba, hon leu api nggei sut Allah bipai,

²⁹ “Tuhan e, tto bou dem tu. Bit leu nok apreu ei mem da nipou su. Nna ba asindui sut Ade awak di dani bidimai hak ug lewo dingon jo nyahan tu.

³⁰ Dingat No di miteu tungwatu nya leu ide sisar biyai niyaijo nijep biyok bou diyai him tu.

³¹ Atin ei No di miteu tungwatu nya biyai niyaijo nijep biyok bou mben nya yahagom igyai him tu.

³² Noni ne ninjeng di piga digai puig mem ngkiai nya di itti kin Nani ba, ninjeng di bindei di tungwatu nya yahagom ikon Ade limwa mben Israel inyeng ri.”

³³ Yusuf kin Maria inggap leu nindig bibor tut mun di Simeon pai sut ipmot Yesus.

³⁴ Simeon ngat nadi tindei mun di kei mem yok leu api pai bak ningwoi-ngwoi nipmem Maria bipai “Allah dimig munggwom dini leu binhyepo Noni mibindei sar mben Israel imang bibor lene mibindei ba, imang bibor igyai niteu leu sisarti bigyai niyaijo nijep. Noni minok bindo di kwei leu Allah leu api tungwatu nya imang bibor misrep tut Noni

³⁵ tug hon nisinati dima lene yoni mimbot kep tut ingon kanti nya di jo nding. Noro mem nani ne ningon ngguk biborti di dem kep nok simeda di riu angon micut igkep na.”

³⁶ Gima cem sindig-ndau Hana di nok nabi sop no rima. Nicig ninyeng Fanuel ba, noni ntun keret Asyer him. Tirigi sop dini wak nijjep ba, niyaijo bit nijjep ei ninsi ari bingwam muhwindacan leu

³⁷ lene noni wer kibom kikau ba, nogindini nide njap ug ei ari bingwam ningot muhwindaningai ba, bitai. Noni bong kep Tuhan De Ig bikwop mmun-njap ba, kuk no bak Allah tug hon nadi kin niyem njita bi mem nituti poi.

³⁸ Hammi tirigi noni coi kwei bittau kep yok rino noni nggei sut Allah. Leu api ug tri tut ningwoi-ngwoi dima bak tungwatu nya di imem kep ser tto bou di Allah bindei ba, timiei minu ndig Yerusalem igyati kwes.

Yusuf nya ingkwei hanyen ug ei minu ndig Nazaret

³⁹ Tirigi yoni ibon midut nya bit leu nok Tuhan nicukti hagom tu lene ingkwei hanyen ug ei itimieisi minu ndig Nazaret ei hanjop Galilea.

⁴⁰ Munggwom dima wer mahan biyai nisindemti kin ningon kiti lewo Allah singat tut Noni nindig bibor.

Yesus wer munggwom ndig ningat rin ei Tuhan De Ig

⁴¹ Bikwop ari bingwam lene Yesus nipmem Maria nijjep nya yuug ei minu ndig Yerusalem leu binhyepo ibon pesta kep Njap Ndig Paskah.

⁴² Tirigi Yesus de njap ug ei ari bingwam simnaibrimigcan tu lene yoni ibuwak Noni cem ug ei Yerusalem bit leu nok igyai kepti.

⁴³ Mpe dino nibon pestati tun tu lene ingkwei hanyen ug ei minu ndig Nazaret noro Yesus No gwam hak ei Yerusalem lo, Maria kin Yusuf ikan tut bi.

⁴⁴ Ikan bigya Yesus No srig nimpung nindig di ibit yoti. Gima rino imbut mem njap nitindur gom leu ug api inggok ser Noni ei ide bat nya kin yo di inttig tta nya ikieti.

⁴⁵ Tirigi ingat Yesus ningat bi lene ingkwei hanyen ug ei minu ndig Yerusalem binggok ser Noni hapuig.

⁴⁶ Njap ningai ser lene ittau kep Noni ei Tuhan De Ig. Noni gwam bit guru Puig Yahudi nicukti nya bingig nitingou mem ighyet ba, hig ser yok ninyen cem.

⁴⁷ Yo di imiap kep nihyet yahagom inggap leu tut nindig bibor lewo ba ningon di ki bibuhup ighyet.

⁴⁸ Tirigi Maria kin Yusuf ingat Noni rino inga leu tut leu api nipmem hig ser Noni “Mot de ug o! Nggon rino abon mun nok tut nye i? Acig nyeni niba nikrau ningon tut Nati binggok ser Na ninyen.”

⁴⁹ Yesus buhup “Dicig dipmem jeni e, jinggok ser Da binggon i? Jikan tut bipia suar dingat rin ei Dicig Nide Ig bi e?”

⁵⁰ Noro ingon dorti tut Yesus nibuhupti bi.

⁵¹ Leu api Yesus bit yok bingkwei hanyen ug ei minu ndig Nazaret lene kuk No mem ighyet. Maria pwoi mun di pek kep mem yok dima hagom ei ningonti.

⁵² Yesus wer pinjoi ndig ba, ningon di ki bikum eisi bu. Allah kin tungwatu nya ijoi sut Noni cem.