LUKAS 18 - ALLAH NIHYET MEM TUNGWATU NYA

Nihyet nibiti nindati tut sop kibom kin nikei

¹ Gima ngwig lene Yesus ba nihyet nibiti nindati bingginau yo di ibit Noni leu binhyepo yuhuk nadi kikau lene ma ingon nghen leu au.

² Noni pai “Nikei bong ei minu ttou nsi gom. Ningon tindak ba, ngondut tungwatu nya cem bi.

³ Kibom gom cem bong ei minu ttou nsi dima. Noni ngkwei-ngkwei nyen kep nikei bahara noni ‘Ambrap gau da lewo ditde siceu pai kep da!’

⁴ Nikei ningkek ndok tut kibom bimpu noni bi wer ninno tu. Nikei kan ‘Singon tindak ba, singondut tungwatu nya cem bi.

⁵ Noro kibom dini bindin sa wer ninno tu. Nna ba simbrap gau noni hak ug leu mbigom noni mibindin sa kikau bibindei ba, sibou ngwak sibui!’ ”

⁶ Lene Yesus pai biyok “Ma jiyok ngon kep nikei di ningon sren bi dima nikos tutti!

⁷ Gi nok ne Allah cem mimbrap gau Nide limwa nya di yahara Noni bikwop mmun-njap bi e? Noni miba nikou bimpu yok e?

⁸ Ma jingon jo kep bipia Allah bipbur bimbrap gau yok! Noro tirigi Munggwom Tungwatu Nipmot kwei hanyen lene Noni mittau kep yo di iba ingon com Noni ei dihyeisi dini e?”

Nihyet nibiti nindati tut Farisi gom kin no di ya tindei belasten

⁹ Yesus ba nihyet nibiti nindati bingginau yo di inggei sut yonti noro ingwes om nindigsi nya.

¹⁰ Noni pai biyok “Mpe di gom ne ibou can icoi ug ei Tuhan De Ig mem ingat nadi. Hi ne no di Farisi rin lo, hi ya tindei belasten biyem tungwatu nya imuhup.

¹¹ Farisi kiju biya ter lene nggei-nggwang tut nonti bipai ‘Allah e, dipai sigyo biNa lewo dinok yo di igyem kep hiter imuhup kin yo di iris igkei nya kin yo di icut tut sop nya kin no di ya tindei belasten biyem tungwatu nya imuhup dima bi.

¹² Diyem njita bi mbican mem nituti poi bikwop ari nitindur gom bidikwas mun di dima nya gom leu ningot gom tut Na.’

¹³ Noro gi hi di ya tindei belasten biyem tungwatu nya imuhup kuk no ei ting leu lene kon nibou bitou kep ginyo kug bi. Noni ttem ningon him bahara ‘Allah e, angondut da lewo dani ne no di bon kep sisar ri!’

¹⁴ Ma jingon jo kep bipia tirigi no dini ngkwei hanyen ug ei ig bei lene Allah cigit noni noro cigit Farisi pima bi. Lewo Allah moom kep bikwop no di joi sut ninyeng jei noro Noni mikon bikwop no di om kep ningonti dima ninyeng.”

Yesus ngat nadi tindei mun di kei mem munggwom nya

¹⁵ Mpe dima lene tungwatu nya ibuwak munggwom mien nya ndam Yesus leu binhyepo Noni tak kep ibou nggram him binjei mun di kei biyok. Tirigi yo di igya kui Noni ingat gima lene ibigen ser yok.

¹⁶ Noro Yesus hig munggwom nya kwei bipai bak yo di igya kui Noni “Jisindui sut munggwom dima yok bikwei ngat Da lene ma jibigen ser yok au. Lewo tungwatu di noyam kin munggwom dini yok inggre kin Allah ninyeng tak kepti.

¹⁷ Ma jiyok ngon kep! Bit bon no di ya um Allah noyam kin munggwom dini yok bi nggre kin Allah ninyeng tak kepti bi sren.”

Tungwagom di nyeng bibor

¹⁸ Nibou mben Yahudi gom kwei ngat Yesus bihig ser Noni “Guru di kei e, dibon mun di notou leu binhyepo ditug ndei niyaijo nijep di jo kikau i?”

¹⁹ Yesus buhup “Nggon rino ajem Da Guru di kei i?” “Tungwatu nya hi kei bi noro Allah Nongkom he.

²⁰ Akan tut Allah nicuk nyeti nya di pai binye ‘Ma acut tut hi nitnem au ahwen mun au anggimang mun au ambres kep hiter au. Noro ma akuk na ba, anyohou acig apmem nya.’ ”

²¹ No dima buhup “Dibit nicukti dima yok hagom habiei dimien kikau kwei bipek ammani kep tu.”

²² Tirigi Yesus miap nibuhupti nok rino pai binoni “Atunggwei sut mun nyeng gom ngat he. Ma aug tri ade ndigban hagom ba, abipek mitiei lene ma akwas hagom tut yo di yuhui mbum nya apino abikum ei mun di keiti mem nanti ei gwamti. Leu api akwei bit Da.”

²³ Noro tirigi noni miap Yesus nibuhupti dima lene ningon buhun bibor lewo noni nyeng tut ndigban nindig bibor.

²⁴ Yesus ngat bipia no dima ningon buhun bibor. Gima rino Noni pai “Nggruk bibor mem yo di inyeng nya inggre kin Allah ninyeng tak kepti!

²⁵ Krop kei mem unta ningut gom coi kak mup mbrei mihyeti leu gima no di nyeng coi ei Allah De Dihyei Di Nijep.”

²⁶ Yo di imiap Yesus nipaisi dima ihig ser Noni “Ginok lene tou ridem mem gima yai niteu leu sisar kin niyaijo nijep i?”

²⁷ Yesus buhup “Allah sindem mem gima yai mun di bit bon tungwatu nya igyai kan bi nya!”

²⁸ Lene Petrus pai “Angat i! Nikes nyende ig bei nsi nya yahagom ei leu binhyepo nibit Na.”

²⁹ Yesus buhup “Ma jingon jo kep bipia no di kes nide ig kin nitnem kin nikindig bat-nikinjoi bat nya kin nicig nipmem nya kin nimunggwom bat nya yahagom ei drek dip Allah ninyeng tak kepti,

³⁰ miyai nimuhup bibikwop mun dima yok hagom nindig bibor hanyen bu ei nijam dini leu api miyai niyaijo nijep di jo kikau ei nijam di nijep ei nidipti bu.”

Yesus pai nimbiningai tut nimaisi

³¹ Yesus buwak ibou simnaibrimigcan dima ter bipai biyok “Jimiap e, nogindini ikui ug ei Yerusalem leu api mun di nabi nya ipas kep tut Munggwom Tungwatu Nipmot micut igkep Noni.

³² Tungwatu nya mikes Noni ei ngkiai nya indati leu binhyepo iba ighyet bicig Noni lene ibimangkrei Noni lene itrai ndei Noni,

³³ lene imbas Noni ba, ihwen Noni cem. Noro njap ningai bu ne Noni mikiju hanyen leu nimai eisi.”

³⁴ Noro yo di igya kui Noni ingon hukti tut mun di Noni pai brei biyok bi. Nipaisi dima jo nding leu yok. Ikan tut mun di Yesus pai sut biyok bi.

Yesus bindei ba, no di niyai tu niyai da hanyen

³⁵ Yesus nya yuug ei dideu Yerikho. Mpe dima lene no di niyai tu gwam ei simpak nghas bitindei tungwatu nya bahara yok.

³⁶ Tirigi noni miap tungwatu ningot ndig di imbut di injiriek noni lene hig ser yok “Yo dima ibon mindei i?”

³⁷ Ibuhup “Yesus di timiei minu ndig Nazaret No kak puig dini ba, Noni njiriek na.”

³⁸ Gima rino noni hara Yesus “Yesus di Daud Nipmot e, angondut da o!”

³⁹ Yo di igya nibie hu igga noni bipai ser “Ahara sok au!” Noro noni ba nihyet nindig bibor bahara bu “Na di Daud Nipmot e, angondut da o!”

⁴⁰ Yesus ya niyati leu api cuk yok bicen noni kwei. Tirigi noni kwei ndam Yesus lene Yesus hig ser noni,

⁴¹ “Ajoi sut dinggon ndei na i?” Noni buhup “Andigpoi e, akinding diyai ba, da hanyen bu ug!”

⁴² Lene Yesus buhup “Gi nok ne ada ayai! Akei hanyen tug hon ade niba ningon com dati.”

⁴³ Tirigi Yesus pai bak nok rino niyai da hanyen leu api noni bit Yesus binggei sut Allah. Tirigi tungwatu ningot ndig dima yok ingat mindur dini bou igyai him lene yoni cem inggei sut Allah.