KORINTUS GI NIGOM 2 - ALLAH NIHYET MEM TUNGWATU NYA

Ningginausi tut Kristus nimai ei biei salibti

¹ Disut bat jen, tirigi dihwou ngat jeni bidimbot kep tut Allah ningon kanti di tungwatu dihyeisi dini ikan tut bi ne diba nihyet jei kin ningon di ki di kwei leu tungwatu nya bitri tut dihyet bije bi.

² Lewo dikos tut bipia mpe dino dingat rin bit je ne dingon prion ser mun nindigsi hagom lo, miditri tut Kristus Nongkom he bitut nimai ei biei salibti.

³ Nipou tirigi dingat rin bit je ne dinghuisi jet ba, dingon digit bidingwes mien.

⁴ Diba dihyet mmau di tug hon ningon di ki di ntun dihyeisi dini him bitri tut nihyet bije bi. Noro tug hon nisinati di ndo brei bije bipia Allah Ninnei sindem bibor.

⁵ Gima rino ningon di ki di ntun dihyeisi dini him rino bindei di jiba jingon com Kristus bi. Noro Allah de nisindemti ribindei a.

Allah ningon kiti

⁶ Mbro nok gima lo, dingginau yo di imahan ei Kristusti tut ningon di ki di nijit. Noro ningon di ki di nijit-jau dini kwei leu ningon di ki di ntun dihyeisi dini him kin nisindemti nya di inyeng tak kep dihyeisi mem nijam dini cem bi. Lewo nisindemti nya dima mipror yon.

⁷ Noro ningon di ki di nijit-jau di dingginau je tut dima ne ningon di ki di kwei leu Allah ri. Ningon di ki di nijit-jau dima jo nding leu tungwatu nya igyai him. Nipou tirigi Allah pai tes dihyeisi dini bigyo ne Noni kos tut bipia ba ningon di ki di nijit-jau dima bipriet kin Nide nikei-kau-keisi.

⁸ Nisindemti nya di inyeng tak kep dihyeisi mem nijam dini ikan tut ningon di ki di nijit-jau dini bi. Leu gino ikan tut ne jo nibreisi bipia ipek Tuhan di kei-kau-kei kin biei salib bi.

⁹ Noro bit leu nok gi ipas ei Allah nihyetti, “Mun di jo nding leu tungwatu nya igyai him cem tibim ei itingou nsi cem coi ug ei ibou ngwakti cem bi sren dima ne mun di Allah tin ei pijum mem yo di ingon ngakei Noni ri.”

¹⁰ Noro Allah ndo ningon kanti di jo nding brei binye tug hon Ninnei. Allah Ninnei pigot bram mun nyeng hagom kikau ug bipek Allah ningon kanti di jo nding bibor cem.

¹¹ Bikwop nye di tungwatu nyenti iba innei bikan bidem tut mun di jo ei ingon bei. Nok gima tut Allah cem. Allah Ninnei Nongkom he kan bidem tut mun di jo ei Allah ningon bei.

¹² Nyeni ipriet kin mun di kei di Allah njei bak nyeni hagom lewo Noni yai ninnei di ntun dihyeisi dini him binye bi noro yai Nonti Ninnei binye.

¹³ Gima rino ipingok bram mun di bitut Allah bak yo di igyai Allah Ninnei ei ingonti tu lo, iba ningon di ki di ntun dihyeisi dini him bipingok bram nihyet bi. Iba nihyet di kwei leu Allah Ninnei bipingok bram nihyet.

¹⁴ Bit bon no di yai Allah Ninnei ei ningonti bi dima yai mun di kei nya di kwei leu Allah Ninnei kan bi. Lewo ningon dorti tut bi ba, mun di kei dima bon ninyeng mem noni bi. Bit bon noni kan tut mun di kei nya nibok kan bi bibou noni yai Allah Ninnei ei ningonti nipou ug e.

¹⁵ No di yai Allah Ninnei ei ningonti kan tut mun nyeng hagom niboga. Noro hiter dem mem gima mbus no dima ningonti bi.

¹⁶ Bit leu nok gi ipas ei Allah nihyetti, “Tou rikan bidem tut Tuhan ningon kanti i? Tou ringginau Noni bipingok ningonti i?” Noro nyeni imbun nikanti di noyam kin Kristus nikanti!