KOLOSE 4 - ALLAH NIHYET MEM TUNGWATU NYA

¹ Niceu bat jen! Ma jiba jingon sren bibon jide awak nya lene ma jibimangkrei yok au. Ma jiyok ngon kep bipia jijem jiceu bit Tuhan ei gwamti.

Nipingok yo di mbusyamei minu ndig Kolose nya ingonti

² Ma jita jibou ei naditi lo, jiyai nggrop buhun au. Ma jipai sigyo bak Allah.

³ Ma jingat nadi tindei nyeni cem leu binhyepo Allah bon nikwesti mem gima nitri tut nihyet binimbot kep tut nimimun tut Kristus. Lewo disima ei ig bui nsi nogondini drek dip gi ditri tut nihyet dima.

⁴ Gima rino ma jingat nadi tindei da leu binhyepo ditri tut nihyet dini brei bak tungwatu nya bit leu nok Allah nicuk dati.

⁵ Tirigi jipriet kin yo di ingon jo kep bi nya lene ma jiba jingon di ki biyai jibou tut yok bikwop nikwesti hagom.

⁶ Ma jiba nihyet di nggriu-nggrop di brim yo di imiap jihyet ingonti bitri nihyet. Ma jitindei ser yo di ihig-hig nyen ser je tut ingon kiowiti leu binhyepo jibuhup igbit biyok.

Paulus kes nihyet hon bipigo yok

⁷ Midisok dihyet ei Tikhikus dip hwou ndam je leu binhyepo jikan tut mun nyeng hagom di pek kep mem da. Noni ne isut di ingon kieti rin lewo ba ningon di gom biyai midyai mem Tuhan bit nye.

⁸ Dicuk noni bihwou ngat je leu binhyepo biwin kep jingonti bipui bije tut mun nyeng hagom di pek kep mem nye ei mpia dini.

⁹ Tikhikus mehei sut isut Onesimus di ingon kieti ba, ningon gom. Noni nggre kin jide nimpung. Yo cin dini mipui sut mun nyeng hagom di pek kep mem nye ei mpia dini.

¹⁰ Aristarkhus cem no sima ei ig bui nsi bit da ba, pigo je. Markus dino Barnabas nittom cem pigo je. (Gino Markus hwou ngat je lene ma jicigit noni kui jide ig lewo jiyai srat nicuk jeti di nipinak hwou di bitut noni tu.)

¹¹ Yesus di ninyeng hi Yustus pigo je. Ibou ningai he dini leu mben Yahudi di ingon jo kep Tuhan Yesus igyai midyai mem Allah Ninyeng Tak Kepti bit da ba, yahati tut da nindig bibor.

¹² Epafras cem pigo je ba, noni cem nggre kin jide nimpung ba, noni ne awak mem Kristus Yesus ri. Noni ta nibou ei naditi bingat nadi tindei je leu binhyepo Allah yai jingon di nddong cem jimahan ei Kristusti cem jiba jingon di gom bibit Allah ningon kanti cem.

¹³ Dingat bou diyai him bipia Epafras brim ningkek tut jeni kin timiei minu ndig Laodikia kin Hierapolis nya cem.

¹⁴ Dokter Lukas di ingon kieti kin Demas cem ipigo je.

¹⁵ Nisok nihyet tut nipigo yokti ei je dip bak isut bat yo di ingon jo kep nya ei minu ndig Laodikia. Ba, nipigo Nimfa kin yo di mbusyamei di ikuk yok bak Allah ei nide ig bei.

¹⁶ Gino jikwop kep srat bokti dini bijitri tut biyam lene ma jibindei ba, nibokti tibim ei yo di mbusyamei minu ndig Laodikia itingou nsi cem. Ma jikwop kep srat bokti di yoni mipinak hwou ndam je bijitri tut biyam.

¹⁷ Ma jisok kep Arkhipus bijipai “Ma anda jo kep midyai di ayai mem Tuhan biput kep.”

¹⁸ Diba dinda ceti bipas srat bokti dini Da di Paulus dipigo jahagom o! Ma jingon prion ser gi disima ei ig bui nsi yo dini au! Handei kon ba, Allah singat tut jahagom. Nipigo leu dani, Paulus