KOLOSE 3 - ALLAH NIHYET MEM TUNGWATU NYA

¹ Allah win je ba, jiyai niyaijo hanyen noyam kin Kristus tu. Gima rino ma jikan-kan nyenti bisau sut mun di jo ei gwamti. Kristus gwam kui Allah ninda com ei mpia dima.

² Ma jiba jingon binai sut mun di ntun gwamti him lene ma jiba jingon binai sut mun di ntun dihyeisi dini him au.

³ Lewo jimai su lo, jide niyaijoti nimungkun jo nibreisi bigyo lene gima bitut Kristus niyaijoti. Ningginausi dini igbit rin drek dip gi jinok gom kin Allah.

⁴ Jide niyaijoti di mungkun nibousi rino Kristus. Tirigi Noni ttau hanyen kwei ne mijiya bibie bit Noni ei Nide nikei-kau-keisi.

Ningginausi tut niyaijo nitimiei kin niyaijo nijep

⁵ Gima rino ma jimu kep jingut kanti di om kep je. Bihi nok nicut tut yamti kin nikrar kep yamti kin niyai canti kin ningon pri kep yamti kin ningon pri kep mun di jo bak hiterti (sisar dini noyam kin sisar nikuk nye bak kwarti nya).

⁶ Mun dima yok hagom ribindei dino Allah ningon sibui sut yo di ibit nihyet bi nya.

⁷ Nipou lene jeni cem jiyaijo bit leu jingut kanti nya di om kep je tu.

⁸ Noro tini bu lene ma jicom mun di suwok dima yok hagom ei ting leu je. Ma jingon sibui sut yam cem jigga yam cem jiwok yam cem bu au. Ma jipu juhui tut yam bijipai nimmai joti biyam bu au.

⁹ Ma jiris ei yamti bu au. Lewo jikes jiyaijo nitimiei bitut jiyai munti di nitimiei nya hagom ei su.

¹⁰ Nogondini ba niyaijo nijep bijuk je tu. Jeni ne tungwatu di nijep bu rin ba, Allah di pai tes mun nyeng hagom yai jide niyaijo nijep bije ba, pindi-pindi nyen je bijinok nijep bijidat Nonti nimbaiti bikwop mmun-njap leu binhyepo jingon bit Allah mungkun kei.

¹¹ Gi ntun mun dima him ne tungwatu nya ter leu yam bu bi ri. Mben Yahudi kin ngkiai nya titer leu yam bu bi. Yo di icoi bit midut sunat kin yo di icoi bit midut sunat bi kin ngkiai nya kin yo di isingat bi nya kin awak nya kin yo di igyati kwes cem yahagom titer leu yam bu bi. Kristus Nongkom bon ninyeng dor njiriek mun nyeng hagom ba, Noni nok gom kin nyeni yahagom!

¹² Jeni ne Allah de limwa nya ri. Noni ningon ngakei je ba, dimig je ei leu binhyepo ninyeng tak kep je. Gima rino ma jingondut yam cem jingon singat tut yam cem jiba jibou coi mem yam cem jingon nggriu sut yam cem jibet jingon mem yam cem.

¹³ Ma jiwok yam au. Gino jibihi jipai yam kinei lene ma jikos ser jide sisar di jibon tunggwei sut yam biyam. Tuhan ba ningon di llei bikos ser jide sisar tu. Gima rino ma jikos ser sisar di jibon tunggwei sut yam biyam.

¹⁴ Mun di bon ninyeng rino suar jingon ngakei yam lewo ningon ngakei yamti dima rino ngot jahagom kin yam leu binhyepo jibicim tindei yam nok gom.

¹⁵ Ma ningon di jo nyahanti di ntun Kristus him bie tut jide nikos tutti nya. Lewo Allah mbus je ba, jibicim tindei yam nok ningut gom leu binhyepo ningon di jo nyahanti di ntun Kristus him dima yai jingonti bidut nihim. Lene ma jipai sigyo bak Allah.

¹⁶ Ma Kristus nihyet di mpung tut mun di kei nya yai jingon bidut nihim. Ma jiba jingon di ki bipingok yam lene bingginau yam ngonti. Ma jikon doia kin mazmur nya ba, jibipai sigyo bak Allah ei jingonti.

¹⁷ Tut jiyai munti nya kin jipai munti nya ne ma jiyai hagom tug hon Tuhan Yesus ninyenga. Ma jipai sigyo bak Icig Allah tut mun nyeng hagom di Yesus bibon mem je.

Ma jimbier kim yam tug hon jide niyaijo nijepti

¹⁸ Je di sop di jiwak jijjep bat nya e, ma jiba jibou coi mem yok ba, jibit ighyet lewo gini ne Allah ningon kanti mem jeti ri.

¹⁹ Je di pinai di jiwak jitnem bat nya e, ma jingon ngakei yok. Jiba je biyai yok au.

²⁰ Munggwom jen! Ma jibit jicig bat-jipmem bat nya ighyet noyam kin munggwom di ingon jo kep Tuhan lewo gini bindei ba, Allah joi sut je.

²¹ Je di andigpoi di jibon jimunggwom bat nya e, ma jiba jei yai jimunggwom bat nya ba, jibiyai munggwom nya ingon kiek drek dip gi jiba je yai yok dima au. Gima bindei ba, ingon cut leu.

²² Awak jen! Ma jibit jiceu bat dihyeisi nya ighyet tut mun nyeng hagom. Ma jibibon yok nok gima tirigi igyai bong kep je leu binhyepo jibinggok tut gi ijoi sut je he au. Noro ma jiba jingon di gom bibit ighyet ba, jibikon Tuhan ninyeng.

²³ Ma jiba jingon di llei bibor biyai kep midyai tereu jinok awak mem Tuhan. Lewo jiyai kep midyai dima mem tungwatu he bi.

²⁴ Ma jiyok ngon kep bipia mijitug ndei jimuhup di Tuhan bet ei mem Nide limwa nya. Lewo ningat ne jiyai midyai mem Tuhan ba, Noni ne jiceu nimungkun ri.

²⁵ Tungwa tou rino yai mun tunggwei mitug ndei nimuhup sur nitunggweisi. Lewo Allah mbus nggok tungwatu bibit leu nok itta di jo brei bou niyai him bi.