KOLOSE 1 - ALLAH NIHYET MEM TUNGWATU NYA

Paulus pigo yo di inggre kin mbusyamei minu ndig Kolose

¹ Srat dini leu da di Paulus ba, diya kui Kristus Yesus bit leu Allah ningon kanti mem da. Disut Timotius ba no bikum da ba, nipas kep srat dini,

² bak Allah de limwa. Jeni ne nisut bat nya ei minu ndig Kolose di jingon gom ba, jinok gom kin Kristus. Handei kon ba, Icig Allah singat tut je biyai jingon jo nyahan.

Paulus pai sigyo bingat nadi tindei mbusyamei minu ndig Kolose

³ Bikwop mpe dino ningat nadi tindei je lene nipai sigyo bak Allah dino Tuhan Yesus Kristus Nicigya.

⁴ Lewo nimiap jinghapti tut jide niba ningon com Kristus Yesusti kin jide ningon ngakei Allah de limwa nyati yahagom.

⁵ Jiba jingon com Noni bijingon ngakei yam lewo jiyok ngon mem mun di Allah tin ei mem je ei gwamti. Jimiap tut mun dima tirigi Nihyet Di Kei di nijit tibim ei jitingou nsi habiei ei nimbie him.

⁶ Allah nihyet dima no kieng kep dihyeisi dini apino tungwatu nya igyai mun di kei di ntun nihyet dima him noyam kin mun di kei di jeni jiyai mpe di jimiap tut Allah nisingat tut jeti habiei ei nimbie him. Leu api nisingat tut jeti nyohou pingok ei jingonti kikau kwei bipek ammani kep.

⁷ Epafras di nyeni ningon kieti tri tut Allah nisingat tut jeti bije ba, noni ne Kristus de awak di ba ningon di gom biyai kep midyai di bon ninyeng mem jeni cem ri.

⁸ Noni pui binye tut ningon ngakei yamti di Allah Ninnei ndim ei jingonti tu.

⁹ Gima rino ningat nadi tindei je habiei ei nimbie him tirigi nimiap tut jinghapti kikau kwei bipek ammani kep. Nahara Allah leu binhyepo Nide Ninnei yai jingon ki bijingon dorti tut ningon kanti mem je.

¹⁰ Tug hon nisinati dima lene jide niyaijoti mibicim tindei Allah ningon kanti mem je ba, jipwoi Nonti ningon kikau. Lene ningat di kei nyeng hagom mintun jide niyaijoti him ba, jibikum ei jide ningon dorti tut Allahti.

¹¹ Handei kon ba, Allah ba Nide nisindemti di mindur bibor bisindem tut je leu binhyepo jiba jibou coi mem yo di ihwen bit je ba, joom jingon tut yok ba, jingon llei bibor,

¹² bijipai sigyo bak Icig Allah cem. Lewo Icig rino bindei ba, jidem mem jiyai mun di Noni bet ei mem Nide limwa di icoi bit Allah Ninyeng Tak Kepti di ntun nipigati him.

¹³ Allah teu nye leu nidinditi de nisindemti bibuwak nye bingwes ngun ug ei Nipmot di Allah ningon kieti Ninyeng Tak Kepti tu.

¹⁴ Allah Nipmot kwek nye leu mun di kat nye di bindo tut nikos ser ide sisarti.

Ningginausi tut Kristus ningon mien paisi kin niyai munti nya

¹⁵ Allah ningat jo nding leu tungwatu nya igyai him noro Noni ndo Nonti ningwes brei biyok tug hon Kristus. Kristus ne Nipmot mighumbou di ninyeng jei bidor njiriek Allah nipai testi nya hagom ri.

¹⁶ Allah ba Kristus bipai tes mun nyeng di ningat rin ei gwamti kin mpia-bbed him kin dihyeisi dini hagom bitut mun di tungwatu nya ingat brei kin mun di bit bon ingat bou igyai him kan bi nya bitut ninnei di isindem bibor nya kin ninnei di inyeng tak kep ide limwa nya hagom. Allah pai tes mun nyeng hagom tug hon Kristus lene mem Noni cem.

¹⁷ Kristus No rinaha nipou tirigi Allah pai tes mun nyeng hi bigyo. Mun nyeng hagom jo nijoti tug hon Noni.

¹⁸ Kristus ne nibou mem Nonti ningut ri. Ningut dima ne mbusyamei ri. Noni ne niyaijo nibousi mem ningut ri. Noni ne Allah Nipmot mighumbou di Allah win hanyen leu nimai eisi leu binhyepo Noni bon ninyeng biya bibie mem mun nyeng hagom ri.

¹⁹ Allah kos tut bipia mun nyeng hagom di ningat rin ei Nonti ningon bei ningat rin ei Nipmot cem ningon bei.

²⁰ Allah kos tut bipia Noni ba Nipmot bibakei nipai testi nya hagom bitut mun di jo ei dihyeisi dini kin mun di jo ei mpia-bbed him cem kin Noni hanyen. Noni bakei mun dima yok hagomti tug hon Nipmot nimai ei biei salibti.

²¹ Nipou ne jingat rin ei minu ting leu Allah bijiba nitok biNoni drek dip jiyai munti nya kin jikan-kan nyenti di suwok nya.

²² Noro tini bu ne Noni yai jingon di kwes kin Noni tug hon Nipmot nimai ei biei salibti. Tug hon nisinati dima ne Noni bindei ba, jiba jingon di kwes kin jingon di pimbai kin jingon di ngun biya ei Allah Noho bei.

²³ Ma jiba jingon com Nihyet Di Kei di nddong kei mem je. Ma jitti-tti nyen bijingkwei leu jide niba ningon comti di jiyai tirigi jimiap tut Nihyet Di Kei au. Nihyet Di Kei tibim kikau ug ei tungwatu dihyeisi dini hagom itingou nsi tu ba, da di Paulus dinok awak mem tu.

Midyai di Paulus yai nok awak mem mbusyamei

²⁴ Nogindini ninghuisi wei di diyai drek dip je biyai dingon llei. Diyai munti nya bindei ba, ninghuisi wei di ug hon nohonti bigyo di Kristus de awak nya igyai drek dip nimaisi ei biei salibti dima ngwig sindam. Diyai ninghuisi wei drek dip mbusyamei di ijem ninyeng Kristus ningut.

²⁵ Allah dimig da ei nok awak mem Nide mbusyamei leu binhyepo dimpu je. Midyai dima ne nitri tut Allah nihyet nikenti ba, gini bon ninyeng mem je.

²⁶ Nihyet dima ne nimimun di Noni ku bijo nding ri. Bit bon tungwatu nya ikan tut nihyet dima bi habiei leu nimbie him kikau kwei bipek ammani kep. Noro tini bu ne Noni mbot kep tut bak Nide limwa nya.

²⁷ Allah ningon kanti mem Nide limwa nya rino joi sut mbot kep tut Nide nimimun di kei-kau kin mindur di Noni bet ei mem tungwatu nya biyok. Nimimun dima ne Kristus ningat rin ei jingonti gi bindo tut bipia jinyeng tut mun di mindur hagom di Noni tin ei mem je.

²⁸ Gima rino nitri tut Kristus bak tungwatu yahagom. Niba ningon di ki binyohou sok kep yok ba, bingginau yok cem leu binhyepo nibuwak yok ug ei Allah Noho bei lewo ingonti kin innei mahan drek dip inok gom kin Kristus.

²⁹ Dita dibou ei midyai diniti bidigruap-gruap nyen tug hon nisindemti di Kristus kwas tut da lewo Nide nisindemti dima yai midyai sindem bibor ei dingonti.