KISAH 27 - ALLAH NIHYET MEM TUNGWATU NYA

Paulus bri kibar minyei buug ei minu ndig Roma

¹ Niabiati nibou nya ikos tut bipia ipinak nye ug ei minu Italia lene ikes Paulus kin yo di isima nya ibou poi ei kompi Yulius nindati. No dini ne tentara Roma gom di nggre kin “Nimpung Kaisar” ri.

² Nibri kibar minyei di kwei leu minu ndig Adramitium lewo timiei kibarti dini itin ei mem iba kibar bitot minyei ngwa dip ug ei muk nuhuisi nya kikau ug ei hanjop Asia. Aristarkhus di nitimieisi leu minu ndig Tesalonika ei hanjop Makedonia cem bit nye.

³ Njap di hyep bu lene nikwei krau minu ndig Sidon. Kompi Yulius ningon nggriu sut Paulus bisindui sut noni buug cem kep nisut bat nya di ibong ei minu ndig dima leu binhyepo ingondut noni bikwas mun di Paulus suar hi tut noni.

⁴ Lene kibar mbut bu bibitot minyei ngwa dip sir Mios Siprus nitta di mbum-bra leu binhyepo hou di nimig ten bibor ttem kibar tut nye ei mios dima nite bei mpia nicutti.

⁵ Leu api kibar mbut bu bibitot minyei ngwa dip ug ei hanjop Kilikia kin Pamfilia nibiho kikau ug ei minu ndig Mira di jo ei hanjop Likia leu api nikinyon leu kibar ei sirima.

⁶ Lene Kompi ngat kibar hiter bu di kwei leu minu ndig Aleksandria ba, mbigom mbut kikau ug ei minu Italia. Gima rino noni buwak nye binibri kibar dima.

⁷ Kibar nyohou mbut mem njap poi noro nggruk bibor kikau bipek kibar piar dideu minu ndig Knidus. Noro hou di nimig ten bibor dima bindei ba, bit bon kibar mbut hallu ndam nipekti bit leu kiten kibar ningon kanti kan bi. Gima rino kibar mbut sir Mios Kreta nitta kikau binjiriek Ninging Yenti Salmone di srin ser muk mpoti.

⁸ Kibar mbut sir mios dima nitta noro nggruk bibor kikau ba, nikwei krau Muk Nuhuisi Di Mbris Kei di jo dideu minu ndig Lasea.

⁹ Mpe dima ne Njap Ndig Midut Nibiyai Ningon Kwes Kin Allah njiriek tu. Kibar nimbutti yem nijam di jei bibor bingwig leu nye lene bon nituti dima kibar mbut mem mpia nimbum-brati hi bu bi. Gima rino Paulus sok kep timiei kibarti nya bipai biyok,

¹⁰ “Andigpoi jen, dikan tut bipia gino kibar mbut kikau ne mun di buhun bibor micut igkep nye. Lewo ndigban di jo kibar nsi kin kibar ningat cem minggek bisar leu api tungwatu nya cem misar minyei.”

¹¹ Pai nok noro kompi Yulius ba ningon com kiten kibar kin kibar niceu bat nya ide nipingok noti leu Paulus nisok kep yokti dima.

¹² Lo, muk nuhuisi dima dem mem ide kibar piar nyahan ei minyei ngwa dip kikau mem bed di biang hou bi. Gima rino timiei kibarti nindigsi nya ijoi sut iba kibar bitot minyei ngwa dip ug ei minu ndig Feniks leu binhyepo kibar piar nyahan ei sirima bibou bed di biang hou ntus leu ug e. Feniks ne muk nuhuisi ei Mios Kreta di birok kik mpia nicutti ei ninda com kin ninda prak cem.

Sigau yem kibar ei muk ngwa dip

¹³ Mpe dima lene hou kindi kui nyahan leu nite bei mpia nibiho ba, timiei kibarti nya ikan bipia bon nikwesti mem kibar mbut bit leu ingon kanti ri. Gima rino ibrim kimuntu kwei ei kibar nsi leu ba, kibar mbut nyahan sir Mios Kreta nitta.

¹⁴ Noro jei bi lene hou di nimig ten bibor cut kros leu mam bei bittem kibar. Ijem hou dima ninyeng bipia “Sigau Muk.”

¹⁵ Hou dima ttem kibar ariwace. Bit bon timiei kibarti nya ikiek kibar nuhwap bibirok hou nimig kan bi. Gima rino ikes tut ba, kibar bit hou hak.

¹⁶ Ba, hou nimig ntus poi mien tirigi kibar mbut sir mios mien Kauda nitta. Gima rino nigruap ba, nibrim kuk tut ut mien leu binhyema sar minyei bi.

¹⁷ Niabiati nikon ut mien hanyen ei kibar dip tu lene iba kuk nindig bikri kep kibar nijou bingkiem-kiau. Yoni idigit tut hou di ttem kibar tut yok kikau bibindei ba, kibar tug iggum di kingkrai kibar nijo di jo dideu minu Libia. Gima rino icug nsriwir leu dihim leu api kibar bit hou nimig hak.

¹⁸ Sigau hwen kibar kikau ba, njapti kui bu lene timiei kibarti nya sindi icat ndigban leu kibar nsi binjei hagom ug ei muk mpoti.

¹⁹ Njapti kui bu lene icat kibar nimbumbati niken binjei hagom ug ei muk mpoti bu.

²⁰ Njap mang ser lo, bit bon ningat mpia njap kin ham mmun hagom bou niyai him kan bi. Hou di nimig ten bibor ttem kibar tut nye kikau ba, nahagom nikan bigya bit bon ningwes ngun kan bi.

²¹ Tirigi yo dima yahagom igyem njita bi ninno tu lene Paulus kiju biya ei ikieti bipai biyok “Andigpoi jen, gino jibit disok kep jeti pima ba, jiba kibar bitot minyei kwei leu Mios Kreta bi lene sigau dini miyem nye ba, ndigban mipror leu nye cem bi.

²² Noro nogindini ditigtai je. Ma jibiwin kep yam ngonti! Lewo jigom mipror bi noro kibar nongkom misar minyei jou leu nye.

²³ Dikuk da bak Allah di ninyeng tak kep da ba, himmun di aponi lene Noni cuk Nide malaikati gom kwei,

²⁴ pai bida ‘Paulus e, ma angon digit tut au! Mporo ma aya ei Kaisar Roma noho bei. Allah nisingat tut nati mibindei ba, yo di kibar nsi yahagom ingwes ngun drek dip nani yo.’

²⁵ Gima rino Andigpoi jen, nna ba jibiwin kep yam ngonti lewo diba dingon com Allah nipai bidati hagom ba, mipek kep mem nye bit leu nok nipreu ei mem dati.

²⁶ Noro hou mittem kibar tut nye biyuug dihip ei mios gom nintig dip.”

²⁷ Hou di nimig ten bibor ttem kibar tut nye ninyen ei muk Adria ningwa dip mem mmun-njap simnaibrimigtai leu api mmun mau rino timiei kibarti nya ikan bipia kibar son ndam mam bei.

²⁸ Gima rino iba kuk di ikim tig nindak gom eisi bibinai ug ei minyei jou tut muk nijutti bingat lo, nijutti ug ei kuk nijeisi meter ningot bitai. Kibar son poi mien bu leu api inai minyei jou bu bingat lo, nijutti ug ei kuk nijeisi meter ningot ningai he.

²⁹ Lene idigit tut leu ma kibar mitug bor ei minyei jou. Gima rino yuhuk kimuntu ningat bitai leu kibar ninor bibet ingon mem njap nitekti.

³⁰ Mpe dima lene timiei kibarti nya ipi binang nyahan bingwes ngun. Gima rino ibisinggre biyuhuk kimuntu hi kin bu ei kibar nuhwap ba, ibitak kep.

³¹ Noro Paulus pai bak kompi kin nide limwa pima yok “Gino timiei kibarti nya yoom ingon ei kibar nsi bit nye bi lene bit bon jingwes ngun kan bi.”

³² Gima rino tentara nya ikos kuk dima leu ut mien nya lene ut mien dima yok cut bisar hak ei muk mpoti.

³³ Paulus ba mmun ngwa kin bipingok yo di kibar nsi nya yahagom leu binhyepo igyem njita bipai biyok “Jibet jingon kikau mem mmun-njap simnaibrimigtai bijiyem njita hi bi.

³⁴ Dipingok jingonti leu binhyepo jiyem njita gom-gom ser nhyema jimai jinggum au. Lewo jibou nta nimig gom mipror leu je bi.”

³⁵ Paulus pai nok leu lene yai roti nindak gom bipai sigyo kep bak Allah bou yahagom igyai him leu api ki roti dima biyem.

³⁶ Lene nindigsi nya ibiwin kep yam ngonti bigyem njita.

³⁷ Nye di nigwam ei kibar nsi nahagom nimangti nibou sratus can ningot muhwindacan ba, muhwindagom.

³⁸ Niabiati yahagom igyem njita bindei yok tu lene icat kron tut gandum leu kibar nsi binjei hagom ei muk mpoti leu leu binhyepo kibar nggan bu.

Kibar nggek bisar

³⁹ Njap tek tu lene timiei kibarti nya ibimian ser mam bei bingat lo, ingon kiowi tut. Ingat muk nuhuisi di bon nipimat gom bikos tut bipia ipingok kibar bimbut hammi nipimat dima bitug iggum ei minyei jou.

⁴⁰ Gima rino ikos kuk tut kimuntu nya bisar hak ei muk mpoti kin kuk di kat nisibuisi can ei ninora. Leu api itas nsriwir gom ei dihim ndam kibar nuhwap leu api hou ttem kibar tut nye ug ei mam bei.

⁴¹ Noro kibar tug iggum nipimbien bou ba, nuhwap tug bingkiem lo, muk tti nindig bibor ba, hwen ninor tignam ba, jei bi lene kibar nggek bingwig leu nye.

⁴² Tentara nya ipi bihwen yo di isima nya yahagom hak ug lewo idigit tut leu ma bihi yaha minyei ug ei mam bei binang ba, ingwes ngun.

⁴³ Noro kompi cuon ser nide limwa nya tut ingon kanti dima lewo noni nyohou Paulus ser nhyema tentara ihwen noni au. Noni pai bak yo di yaha minyei kan nya “Jahagom jikinyon ei minyeiti bijaha ug ei mam bei.”

⁴⁴ Lene noni sindui sut nindigsi nya ba, bihi ikat biei sra kin kibar niner bibram yok. Tug hon nisinati dima lene nahagom ningwes ngun ba, nuug dihip ei mam bei.