IBRANI 9 - ALLAH NIHYET MEM TUNGWATU NYA

Nisinati mem gima ikuk yok bak Allah ei dihyeisi kin gwamti

¹ Gi preu nitimiei bon nide nidimig sutti mem yo di ikuk yok bak Allah lene bon nide ig di tungwatu nya ibon bou inda him mem ikuk yok eisi cem.

² Tungwatu nya yohok prak meng nindig binok ig ba, ninsi di jo nuhui deni ug rino ijem ninyeng Ninsi Di Kwes. Ikon mini njeng nidihim kin meja tut roti di idis ei Allah Noho bei ei ninsi dima.

³ Allah De Ninsi Di Kwes-Kwau jo nding ei ninsi gi nican ei ban mbrawin nite dima kwei.

⁴ Ikon nimbar hum ndok di iba mas bibon mem indig biei nggrai di ui-gwang kei eisi kin Brua Gi Preu di iba mas binggai kep ei ninsi dima. Leu api igyok yeng di iba mas bibon dino njita manna joti kin Harun de tom di biop kin tig mma can di Allah niggai serti simnai joti ei brua nsi dima.

⁵ Kerub di bindo bipia Allah ningat rin ei mpia dima ningat can ikieng inyehei gau Brua nibeng di nok mpia ttou nsi mem gima Allah kos ser ide sisar eisi. Noro nituti dem mem dimbot kep tut mun di bitut gima hagom bije bi.

⁶ Itin ei mun dima yok hagom ei bijo nijoti leu api imam nya icoi ug ei Ninsi Di Kwes di icoi eisi bikwop njap-njap leu binhyepo igyai kep ide midyai nya eisi.

⁷ Noro Imam Nibou Ndig nongkom coi ug ei Allah De Ninsi Di Kwes-Kwau. Bikwop ari bingwam gom lene noni coi ug eisi mbigom he. Noni ttei mindhe ninggrom buug sut ug ei Allah Noho bei biya hacan mem nonti kin Allah de limwa nya ide sisar di iba nibisinggre bi bibon nya.

⁸ Allah Ninnei ndo brei binye tug hon nidimig sutti dini yok hagom bipia gino Ninsi Di Kwes kau bigyo ne dimbou kau leu Ninsi Di Kwes-Kwau bigyo.

⁹ Mun dini yok hagom bindo tut nijam dini. Nibimbiti dini bindo bipia bit bon mun di ikwas tut Allah kin midut nibikos ser sisarti ninggrom piap yo di ikuk yok bak Allah ingon mien bikei-kau kan bi.

¹⁰ Mun dima yok hagom bindo tut mun di pror yon nok njita di igyem kin ndia ngei di idut kin nidimig sutti tut nipiap nindati kin nipiap njitati cem. Nidimig sutti dima yok hagom mbut kikau bi noro mipror yon mpe dino Allah bindei mun nyeng hagom nijep bu.

Ningginausi tut nikuk nye bak Allahti di nijep bu

¹¹ Noro tini bu ne Kristus kwei su. Noni ne Imam Nibou Ndig di bindei ba, ningon kwes kin Noti ttau su. Noni coi ug ei prak meng behei di bon ninyeng ba, kei-kau. Tungwatu nya ibon prak meng dima bou inda him bintun Allah nipai testi ei dihyeisi dini bi.

¹² Kristus coi ug ei Ninsi Di Kwes di jo ei nisai buug kikau ug ei Ninsi Di Kwes-Kwau mbigom ngat he bijo kikau. Noni ttei kambir kin sapi nikre di nehen pap inggrom mem gima biya hacan mem tungwatu nya bi. Noro ttei Nonti ninggrom ba, bikwek nye leu sisar de nisindemti bijo kikau.

¹³ Noro imam nya iba kambir kin sapi nikre inggrom kin atriem ndung di igyai leu midut sapi nehen pap ba, ibigimahap yo di map kui yoti nya. Imam igyaisi dima biciu ser map di kui yoti.

¹⁴ Gino mindhe-ndhe inggrom kin atriem ndung sindem mem gima piap yo di map kui yokti lene jo nibreisi bipia Kristus ninggrom sindem bibor dor njiriek gima bu! Lewo Noni ba Allah Ninnei di niyaijo kikau bikes Nonti ei nok mun di kei-kau di ibui bibam ei Allah Noho bei. Kristus ninggrom piap ingon mien leu midut di sindem bi nya leu binhyepo inok awak mem Allah Di Niyaijo.

¹⁵ Gima rino Kristus bon Nonti nok No di ya hacan mem gi preu nijep leu binhyepo yo di Allah dimig yok ei nya igyai Nide munkwas di jo kikau di Noni preu ei mem nye tu. Mun dini yok hagom tug hon tungwagom nimaisi. No dima ne Kristus ri. Nimai ei biei salibti kwek tungwatu nya leu sisar di ibon nya tirigi gi preu nitimiei ninyeng tak kep yok.

¹⁶ Gino tungwagom preu ei mem nimunggwom bat nya tut ndigban di yoni miba yo kep ne suar no dima mai leu ug e leu api nimunggwom bat nya miba yo kep nide ndigban.

¹⁷ Gino noni mai bigyo lene gi preu dima mbut bigyo. Tirigi mai leu su lene nimunggwom bat nya iba yo kep nide ndigban.

¹⁸ Gima rino gi preu nitimiei mbut bi gino ibui mindhe tut ninggrom bi.

¹⁹ Nimbigom ne Musa tri tut niggai serti nya hagom bak mben Israel. Leu api noni yai sapi nehen pap kin kambir nikre inggrom di srig minyeiti lene ba bika hisop kin domba ninta ngwoi bigimahap srat di niggai serti joti ningat kin mben Israel yahagom.

²⁰ Leu api pai biyok “Ninggrom dini tak buk kep Allah de nipreu ei mem jeti. Suar jibit hagom.”

²¹ Leu api Musa ba ninggrom midut dima bigimahap Tuhan De Prak Meng bitut mun di joti nya hagom.

²² Ningat ne bit leu nok Puig Yahudi niggai serti lene suar iba ninggrom bipiap mun nyeng hagom bipwoi. Leu gino ninggrom siber bi lene bit bon Allah kos ser sisar kan bi.

Kristus dip tut ide sisar tug hon nimaisi

²³ Tug hon nisinati dima lene mun di jo dihyeisi di dat mun di jo kikau ei gwamti yai nipiapti di bindei bipwoi hanyen. Lene suar mun di jo kikau ei gwamti pima cem yai nipiapti tug hon ninggrom di kei-kau.

²⁴ Lewo Kristus coi ug ei Ninsi Di Kwes-Kwau di tungwatu nya ibon bou inda him di dat Ninsi di jo kikauti bi. Noro noni coi kikau ug ei gwamti biya ei Allah Noho bei leu binhyepo ya hacan mem nye.

²⁵ Mben Yahudi ide Imam Nibou Ndig coi ug ei Ninsi Di Kwes-Kwau bittei mindhe ninggrom bingkwei-ngkwei nyen bikwop ari bingwam bijo ninno. Kristus coi ug ei su noro kes Nonti nok mun di ibui sut ninggrom nyen-nyen bi.

²⁶ Leu gi nok lene Noni yai ninghuisi wei nyen-nyen habiei tirigi Allah pai tes dihyeisi dini kikau kwei bipek ammani kep. Noro tini bu ei nijam ningwig honti dini lene Noni kwei mbigom ngat he bijo ninno bijo kikau leu api dip tut sisar hagom tug hon nikes Nonti ei nok mindhe di ibui sut ninggromti.

²⁷ Allah pai ei su bipia tungwatu nya yahagom imai mbigom ngat he leu api Noni mimbus ingonti.

²⁸ Gima rino Kristus kes Nonti ei mbigom ngat he bijo ninno bijo kikau nok mindhe di ibui sut ninggrom leu binhyepo bidip tut tungwatu nya imang bibor ide sisar. Noni mikwei hanyen nimbican mem gima kos ser sisar bi noro mem gima teu yo di igyok ingon mem nikwei hanyenti.