IBRANI 6 - ALLAH NIHYET MEM TUNGWATU NYA

¹ Gima rino ma ibrim ingkek ba, ipikor leu ningginausi di bindei dino imahan ei Kristusti ba, ingkwei-ngkwei nyen kep nitriti bu au. Ma indat-ndat nyen ningginausi tut nikiek nye leu niyai munti di bon ninyeng bisi nya kin ningginausi tut ningon jo kep Allahti,

² kin ningginausi tut nitur tungwatu kin nikes ninda ei tungwatu nya dipti kin nikiju hanyen leu nimai eisiti kin hukum di jo kikau buug hon nohonti bisi bu au.

³ Jikwei ba, gino Allah ce tut ne ma ibrim imig bimbut sindem ba, ibinut kin nipikor leu ayat di jut biborti bu!

⁴ Lewo bit bon ibrim yo di ingkwei hanyen tu nya bibindei ba, ittin ser ide sisar hanyen kan bi. Nipou ne ikwei mbut ei Allah de nipigati cem igyem njita di Allah kwas tut yok cem igyai nisindemti leu Allah Ninnei noyam kin yo di hiter cem,

⁵ ikan tut bipia Allah nihyet kei bibor kei lewo nihyet dima tot ingonti cem sindi igyai nisindemti di ntun Allah Ninyeng Tak Kepti him ndrim hi cem.

⁶ Igyai gima yok hagom tu noro ingkwei hanyen bihigom! Bit bon ibrim yo dima leu binhyepo ittin ser ide sisar bikiek ndam Allah hanyen kan bi. Lewo ipek Allah Nipmot hanyen kin biei salib ba, ibicig Noni brei bou tungwatu nya igyai him.

⁷ Allah ba biget binjei mun di kei bak dihyei leu api tungwatu nya igyai miai eisi bigyai ningat mang bibor.

⁸ Noro gino mun mup kin minta di tigot bibor hei eisi ne dihyei dima kinei drek dip ba, Allah misigion leu api hum miyem hagom bingwig.

⁹ Disut bat di dingon kieti jen, mbro nok gino nipai mun dima yok hagom tu lo, nikrau ningon tut je bi. Nikan tut bipia jiyai mun di kei bibor di ntun him jide niteu leu sisar kin niyaijo nijepti ba, dor njiriek bu.

¹⁰ Allah ningon sren-srau. Ningon miprion ser jiyai munti nya kin jide ningondut yamti di jindo biNoni tirigi jahati tut jisut bat yo di Kresten nipou cem nogindini cem bi.

¹¹ Nijoi sut bipia bikwop jeni jahagom jibrim jingkek kikau ug bipek njap ningwig honti leu binhyepo mun di jiyok jingon mem nya hagom mipek kep mem je.

¹² Nikou sut gima jibong biei nda dip kep ig he a. Ma jibon jenti nok yo di ingon jo kep Noni kin yo di yoom ingon leu binhyepo jiyai mun di Allah preu ei mem je.

Allah luei ningonti tut nipreu ei mem nyeti bi

¹³ Tirigi Allah preu ei mem Abraham lene ba neheng bipreu ei mem noni. Allah ba Nonti ninyeng bipreu ei mem noni lewo hi ninyeng jei dor njiriek Allah bi.

¹⁴ Noni pai “Midinjei mun di kei bak nani lene dibindei yo di intun nani him bidigek kep mpia.”

¹⁵ Abraham ba nibou coi bibet ningon. Gima rino noni yai mun di Allah preu ei mem noni.

¹⁶ Gino tungwagom heng bak yo di hiter lene noni heng bitug hon no di ninyeng jei njiriek noni ninyeng. Mun di noni ba neheng bipreu ei dima ngkiem-kiau ba, bit bon hi nggek tut kan bi.

¹⁷ Allah joi sut bipia yo di Noni preu ei mem yok nya ikan tut bipia Noni miluei ningonti tut nipreu eisi dima hanyen bi. Gima rino Noni ba neheng bipreu ei mem yok.

¹⁸ Bit bon mun nyeng can pima nggek ba, Allah ris mun tut gima kan bi. Gima rino ingwes ngun ug ei Nonti nindati. Mun dini yok biwin kep ingonti leu binhyepo ikrau kep mun di igyok ingon mem di jo bei nyeni yoho bei.

¹⁹ Mun di igyok ingon mem dima tereu nok kimuntu di tot minyei jou bingkiem bibor di bisindem tut nye ba, ingon nddong kei. Mun di igyok ingon mem tibim ban mbrawinti buug jo ei Ninsi Di Kwes-Kwau ei Tuhan De Ig di jo ei gwamti.

²⁰ Yesus tin puig buug ei ninsi dima mem nye bitug ndei ninyeng Imam Nibou Ndig kikau noyam kin Imam Melkisedek tu.