IBRANI 5 - ALLAH NIHYET MEM TUNGWATU NYA

¹ Bikwop Imam Nibou Ndig nya ne mben Yahudi indo leu nide keret ikieti bikon ninyeng leu binhyepo ya hacan mem yok ei Allah Noho bei. Noni ba mindhe di nide limwa nya ikwas tut Allah bibon midut nibikos ser sisarti ei Allah Noho bei.

² Imam Nibou Ndig dima ne tungwatu dihyeisi dini he ri. Gima rino ba ningon di nggriu bibon yo di igyai mun tunggwei nya drek dip ingon di mbum.

³ Suar noni bon midut nibikos ser sisar mem tungwatu nya he bi noro mem nonti cem lewo noni cem tungwatu.

⁴ Tungwa hi ta nonti nok imam nibou ndig bi. Noro Allah Nonti dimig no dima bita noni nok imam nibou ndig bit leu nok Noni ta Harun nipou su.

⁵ Nok gima cem Kristus kon ninyeng bita Nonti nok Imam Nibou Ndig bi. Noro Allah kon ninyeng bita Noni lene pai biNoni “Nani ne Dipmot ri. Njap di ammani dibindei ba, dinok Acigya.”

⁶ Bit leu nok gi ipas ei Allah nihyet nibokti hiter bu “Dita Nani ba, anok Imam noyam kin Imam Melkisedek bijo kikau buug hon nohonti bi.”

⁷ Tirigi Yesus ningat rin ei dihyeisi dini lene Noni ba nihyet nindig bibor kin niyai nggwei di kibor bingat nadi bak Allah di sindem mem gima nyohou Noni leu binhyepo mai bi. Allah ngig nitingou mem nihyet lewo Yesus ba ningon di gom bikuk No bak Allah.

⁸ Mbro nok gino Yesus ne Allah Nipmot rin lo, Noni om ningon bibit Allah ningon kanti tug hon ninghuisi wei di cut igkep Noni.

⁹ Yesus yai kep Nide midyai nok No di teu tungwatu nya leu ide sisar dima biput leu api ta Nonti nok nibousi mem niteu leu sisar kin niyaijo nijepti di jo kikau mem yo di ingon gom tut nicuk yokti nya.

¹⁰ Leu api Allah ta Noni nok Imam Nibou Ndig noyam kin Imam Melkisedek.

Nisok kep Allah de limwa nyati

¹¹ Suar nipingok jingonti bu tut Yesus di ninyeng Imam Nibou Ndig noro nggruk bibor lewo jingon hukti tut bi.

¹² Jiyai nituti bidem mem gima jiyai jinyeng guru. Noro bi lewo no jisuar no di pingok jingonti kikep tut Allah nihyet nitriti yo. Jiyem mikwau bigyo noro jidut do he yo.

¹³ No di dut do he rinok munggwom ngwoi yo. Noni mahan bigyo apino ningon mbum tut mun di igbit kin mun di igbit bi niter leu yamti.

¹⁴ Noro yo di imahan tu igyem kep mikwau lewo ibingon ei dip nok gi dem ba, ingon ki tut mun di kei kin mun di kinei niter leu yamti.