IBRANI 4 - ALLAH NIHYET MEM TUNGWATU NYA

¹ Allah nipreu ei mem nyeti jo kikau kwei bipek ammani kep ba, Noni bon nituti mem icoi ug ei mpia dima bibong kep inghuisi bit Noni. Ma jisok kep jenti ser nhyema jigom krau tunggwei puig bicoi ei mpia di ibong kep inghuisi eisi di Noni preu ei mem nye dima bi au.

² Lewo imiap Nihyet Di Kei bit leu nok gi yoni cem imiap. Noro nihyet di tibim ei itingou nsi bon ninyeng mem yok bi lewo ingon jo kep Allah De nipreu ei mem yokti bi.

³ Noro nye di ingon jo kep nya icoi ug ei mpia dima bibong kep inghuisi bit Noni. Bit leu nok gi ipas ei Allah nihyetti “Dingon sibui sut yok nindig bibor ba, disigion yok leu binhyepo icoi ug ei mpia dima bibong kep inghuisi bit Da bi sren.” Mbro nok gino Noni yai Nide midyai nya biput habiei tirigi Noni pai tes dihyeisi dini tu lo, Noni sigion yok.

⁴ Bit leu nok gi ipas ei Allah nihyetti tut njap gi nimuhwindacan “Ei njap gi nimuhwindacan ne Allah kes ninda tut Nide midyai nya hagom bibong kep ninghuisi.”

⁵ Tut gima ne ipas ei Allah nihyetti “Yo dima micoi ug ei mpia dima bibong kep inghuisi bit Da bi sren.”

⁶ Yo di imiap Nihyet Di Kei habiei icoi ug ei mpia dima bibong kep inghuisi bit Allah bi lewo iba ingon com Noni bi. Gi nok ne jo nibreisi bipia Allah sindui sut hiter ba, icoi ug ei mpia dima bibong kep inghuisi bit Noni.

⁷ Lewo Allah bon nituti di ijem “Njap di Ammani.” Ari bingwam mang bibor niabiati yo dima icoi ug ei mpia dima bi ne Noni tri tut “Njap di Ammani” tug hon Daud di pas kep ayat pima ei Allah nihyetti “Gino jimiap Allah nihyet mem Njap di Ammani ne ma jingkek ndok tut au.”

⁸ Gino Yosua bie tut yo dima ug ei mpia dima nipou su ne Allah mipai sut njap hiter bu ei niabiati bu bi.

⁹ Noro Allah bon nituti mem Nide limwa nya leu binhyepo icoi ug ei mpia dima bibong kep inghuisi. Gima noyam kin mpe di Noni kes ninda tut Nide midyai nya ei njap gi nimuhwindacan.

¹⁰ Lewo tungwa tou rino yai nibong kep ninghuisi dima bit leu nok Allah nipreu eisi tu ne no dima mikes ninda tut nide midyai nya noyam kin Allah di kes ninda tut Nide midyai nya.

¹¹ Gima rino suar ibrim ingkek mem gima igyai nibong kep ninghuisi di Allah preu ei mem nye dima leu binhyepo jigom krau tunggwei puig noyam kin yo di itunggwei drek dip ide ningkek ndokti di iba ingon com Allah bi dima bi.

¹² Lewo Allah nihyet ne nihyet di niyaijo ba, sindem bibor ba, nggwen bibor dor njiriek singau simeda di bon ninggwenti bei ninghim-noho cem. Nihyet dima tot kikau ug ei ingwes kin innei nijoti cem kikau ug ei injum tuti kin inggus nipek yamti cem ba, sindem mem gima hit mimun di jo ei ingonti kin ibou ngwakti.

¹³ Bit bon mun nyeng gom jo nding leu Allah niyai him kan bi. Noni ngat Nide nipai testi nya hagom brei bou niyai him. Nyeni yahagom mibuhup hanyen bak Noni tut igyai munti nya hagom.

Yesus ne Imam Nibou Ndig di ninyeng jei ri

¹⁴ Gima rino ma nyeni ikrau kep ide niba ningon comti di itri tut ei yuhui him. Lewo ide Imam Nibou Ndig di ninyeng jei coi ug ei Allah Noho bei biya hacan mem nye tu. No dima ne Yesus di Allah Nipmot ri.

¹⁵ Ide Imam Nibou Ndig di ninyeng jei ningon dorti tut nye di inghuisi wei lewo Noni ba nibou coi mem mun nyeng di bingon Noni hagom noyam kin nyeni noro bon sisar drek dip bi.

¹⁶ Gima rino ma ibrim ingkek kep Allah ei Nide banggo mbrei lewo Noni singat tut nye. Noni ngondut nye bisingat tut nye cem leu binhyepo itug ndei nimpu nye dem igbit nikwesti.