IBRANI 3 - ALLAH NIHYET MEM TUNGWATU NYA

Yesus ninyeng jei dor njiriek Musa

¹ Disut bat je di Kresten di Allah hig je tu nya. Ma jibisrip tut Yesus di Allah cuk kwei nok Imam Nibou Ndig mem niba ningon comti di nyeni itri tut ug e.

² Yesus pwoi Allah ningon tug hon gi ta nibou ei niyai midyai di Allah ndo biNoniti. Ba, Musa cem pwoi Allah ningon tug hon gi ta nibou ei niyai midyai mem Allah de ig bei nsi nyati.

³ Noro dem mem gima Yesus yai ninyeng jei dor njiriek Musa. Lewo dem mem no di ngot ig tug ndei ninggei sut noti nindig dor njiriek ig di noni ngot.

⁴ Bikwop ig hagom no di ngot ig dima noha noro Allah Nonti ngot mun nyeng hagom.

⁵ Musa ne awak di ningon gom di yai midyai ei Allah de ig ri. Nide midyai nya ndo tut mun di mitibim leu Allah nuhui him ei nidipti bu.

⁶ Noro Kristus ningon gom ba, Noni ne Nipmot di nyohou Allah de ig ri. Ba, nye dini ne Allah de ig rin gino ibrim ingkek ba, ingon ngkiem tut mun di igyok ingon mem.

Allah bindei ba, Nide limwa nya ibong kep inghuisi

⁷ Gima rino Allah Ninnei sok kep nye “Gino jimiap Allah nihyet ei nituti dini,

⁸ lene ma jingkek ndok nok jidigup-jidigai bat nya di ingkek ndok tut Allah au. Lewo isrep tut Noni ba, ibingon Noni ei iggum ndigsi mem nijam dima.

⁹ Allah pai ‘Mbro nok gino jidigup bat-jidigai bat nya ingat mindur di dibibon mem yok bou igyai him kikau mem ari bingwam ningot bitai lo, ibingon kikep Da.’

¹⁰ Gima rino dingon sibui sut yok bidipai sut yok bipia ingon mang bijo ninno ba, ingkek ndok tut Ditde nicuk yokti nya.

¹¹ Dingon sibui sut yok bibor bidisigion yok ‘Yo dima micoi ei minu dima bibong kep inghuisi eisi bit Da bi sren.’ ”

¹² Disut bat jen, ma jisok kep jenti ser nhyema jigom ningon rom ba, ningkek ndokti bindei mbres nonti ei minu ting leu Allah di Niyaijo au.

¹³ Noro ma jipingok yam ngonti bikwop mmun-njap kikau tirigi jiyaijo mem nijam di Allah nihyet pai “Njap di Ammani” leu binhyepo sisar ris je bijingkek ndok au.

¹⁴ Gino ikrau kep ide niba ningon comti di igyai ei nimbie him kikau bipek ningwig honti lene inok Kristus nisut bat nya ri.

¹⁵ Bit leu nok gi ipas ei Allah nihyetti “Gino jimiap Allah nihyet mem Njap di Ammani lene ma jingkek ndok nok jidigup bat-jidigai bat nya di yaham imbuk kep Noni au.”

¹⁶ Yo di imiap Allah nihyet leu api yaham imbuk kep Noni hanyen ne tou nya i? Gima ne yo di yahagom di Musa bie tut yok kwei leu minu Mesir ri.

¹⁷ Lene Allah ningon sibui sut tou nya mem ari bingwam ningot bitai i? Ningon sibui sut yo di ibon sisar leu api imai bingwig ei iggum ndigsi drek dip nya.

¹⁸ Tirigi Allah sigion yok bipai “Yo dima micoi ug ei mpia dima bibong kep inghuisi bit Da bi sren” lene pai gima tut tou nya i? Noni pai sut yo di yaham imbuk kep Noni.

¹⁹ Jo nibreisi bipia bit bon icoi ug ei mpia dima bi drek dip ingkek di ndok kin gi igiba ingon com Allah cem bi ri.