IBRANI 10 - ALLAH NIHYET MEM TUNGWATU NYA

¹ Puig Yahudi niggai serti rinok ningwes di pimber di ndo tut mun di mungkun kei di mikwei yo. Noro nok ningwes di sieng-siau kei tut mun di kei di mikwei dima bi. Mbro nok gino ibui mindhe nya tut ninggrom bikwop ari bingwam kikau nok lo, bit bon niggai serti dima bindei ba, yo di ikuk yok bak Allah tug hon nisinati dima ingon kwes kan bi.

² Gino nisinati dima sindem mem gima bindei ba, yo di ikuk yok bak Allah igyai ingon di tiei kei bihigom ne mpaba ingon hukti tut sisar ba, ibui mindhe nya tut ninggrom bu bi.

³ Noro nok gima bi. Mun di ibui sut ninggrom bikwop ari bingwam dima pingok ingonti tut ide sisar.

⁴ Lewo bit bon sapi kin kambir ninggrom piap sisar kan bi sren.

⁵ Gima rino tirigi Kristus tin ei mem gima srek kwei ei dihyeisi dini ne Noni pai bak Allah “Ajoi sut mun di tungwatu nya ibui sut ninggrom kin mun di ikwas tut Na bi noro atin ei ningut gom mem Da.

⁶ Ajoi sut mindhe di tungwatu nya ibui bibam ei nimbar hum dokti kin midut nibikos ser sisarti bi.

⁷ Lene dipai ‘Allah e, dingat rini ba, ditin ei mem diyai midyai bit leu angon kanti di ipas ei Allah niggai serti tut Da.’ ”

⁸ Nipou ne Kristus pai “Ajoi sut mun di tungwatu nya ibui sut ninggrom kin mun di ikwas tut Nani kin mindhe di ibui bibam ei nimbar hum dokti kin midut nibikos ser sisarti bi.” Mbro nok gino midut dima hagom bit leu nok Puig Yahudi niggai serti lo, Kristus pai nihyet dima bak Allah.

⁹ Leu api Noni pai “Allah e, dingat rini ba, ditin ei mem diyai midyai bit leu angon kanti hak ug.” Gima rino Allah com midut pima hagom leu lene ba Kristus de midut nibikos ser sisarti dima biluei midut dima yok hagom.

¹⁰ Yesus Kristus yai midyai bit leu Allah ningon kanti mem Noni. Gima rino igyai nipiap leu sisarti tug hon Nide midyai nikos ser sisarti mbigom ngat he bijo ninno bijo kikau.

¹¹ Bikwop imam mben Yahudi yai kep midyai nya bikwop njap-njap ba, bon midut nibikos ser sisarti di noyam nyen-nyen bikwop ug. Noro bit bon midut dima bindei ba, tungwatu nya igyai niteu leu sisarti kan bi.

¹² Noro Kristus bon midut nikes Nonti ningut ei mem sisar mbigom ngat he lene bijo kikau ba, Nide midyai dima sindem kikau buug hon nohonti bi leu api Noni gwam kui Allah ninda com.

¹³ Noni gwam ei mpia dima mem nijam dini kikau bibou Allah om Nide siceu nya yahagom ba, inok bilen mem nimig ug e.

¹⁴ Kristus ba midut nibikos ser sisarti gom ngat he bibindei ba, tungwatu di igyai nipiap leu sisarti dima ingon kwes kikau.

¹⁵ Tut gima cem Allah Ninnei tri tut nihyet binye. Nimbigom ne Noni pai,

¹⁶ Allah pai, “Ei nidipti bu lene dibibon gi preu dini jug ei mem yok. Dindim Ditde niggai serti nya ei ingonti ba, midipas hagom ei ibou ngwakti cem.”

¹⁷ Allah pai bu “Midiyok ngon kep ide sisar kin ide nimbuk biborti nya bu bi.”

¹⁸ Gino Allah kos ser mun dima yok hagom tu lene isuar midut nibikos ser sisarti hi bu bi.

Jikwei ba, ison dideu Allah

¹⁹ Disut bat jen, Yesus nimaisi bindei ba, dimbou kau leu nye leu binhyepo iba ingon di nddong bicoi ug ei Ninsi Di Kwes-Kwau.

²⁰ Noni tin puig jep di bie ug ei niyaijo nijepti mem nye leu binhyepo icoi njiriek ban mbrawin di tereu nok Nonti ningut.

²¹ No di ya hacan mem nye ne Imam Di Ninyeng Jei rin ba, ninyeng tak kep Tuhan De Igya.

²² Gima rino jikwei ba, iba ingon di gom kin ingon di nddong kin ingon di kwes-kwau di mui bu bi kin nikek minyei di pimbai keiti bison dideu Allah.

²³ Ma ikrau kep ide niyok ngon memti di tibim ei nyenti yuhui him lewo ingon ngkiem tut bipia Allah miyai hagom bit leu nok Nonti nipreu ei mem nyeti tu.

²⁴ Ma inyohou pingok yam ngonti leu binhyepo ingon ngakei yam bimpu yam cem.

²⁵ Suar idem yam ei nok gom lene ma ibon nyenti nok yo di inghen di idem yam ei bi nya au. Noro ma inyohou pingok yam ngonti bikum eisi bu lewo ikan tut bipia njap di Tuhan mbus tungwatu nya ingonti dideu su.

²⁶ Gino ibisinggre bibon sisar kikau niabiati Allah nihyet di nijit jo nibreisi mem nye tu lene midut nibikos ser sisarti hi sindem mem gima dip tut ide sisar bu bi.

²⁷ Gi jo mem nyeni rino hukum di mikwei leu Allah tirigi ningon sibui sut yo di isrep tut Noni apino Nide hum miyem yok bingwig!

²⁸ No di srep tut Puig Yahudi niggai serti di tug hon Musa tug ndei nimai ba, hi ningon nggriu sut noni bi. Gino ibou can ibou ningai ingat nibon munti di bindei ba, ningon mui bou igyai him.

²⁹ Gi nok ne notou mem no di co kep Munggwom Tungwatu Nipmot i? Notou mem no di bimangkrei ninggrom di tug hon Allah de gi preu nijep di piap noni leu sisar i? Notou mem no di nihyet wer mpiahi tut Allah Ninnei di singat tut nye i? Ayo! No dima mitug ndei hukum nindig bibor dor njiriek bu.

³⁰ Lewo ikan tut No di pai “Midikes hukum ei tungwatu nya dip ba, dibirop hanyen biyok” kin No di pai “Tuhan mimbus Nide limwa nya ingonti.”

³¹ Ayo! Notou mem no di cut ei Allah Di Niyaiajo nindati i?

³² Ma jiyok ngon kep bipia tirigi Allah ninjeng piga digai jingonti leu api tungwatu nya igyai ninghuisi wei bije noro jibrim jingkek kikau ba, jicut bi ug e.

³³ Mpe hi ne tungwatu nya ikucang je bou tungwatu nya igyai him bihwen bit je cem. Mpe hi bu ne jitti kin yo di igyai inghuisi wei leu yo dima.

³⁴ Jiyai ninghuisi wei noyam kin yo di isima ei ig bui nsi. Tirigi tungwatu ipos ndigban hagom leu je ne joom jingon bijingon nggan tut lewo jikan tut bipia mun di kei di bit bon pror yon hanyen kan bi no jo mem je.

³⁵ Gima rino ma jingon cut leu au. Leu gino jiba jingon com kikau ne jimuhup nindig bibor mittau bije.

³⁶ Suar jibet jingon kikau leu binhyepo jiyai Allah ningon kanti mem je apino mijiyai mun di Noni preu ei mem je.

³⁷ Bit leu nok gi ipas ei Allah nihyetti “Jei bi ne No di kak puig mitau kwei bibinyen bi.

³⁸ Ba, Ditde limwa di ingon sren nya migyai niyaijo lewo ingon gom tut Da. Noro dijoi sut Ditde limwa di ingkwei hanyen nya bi.”

³⁹ Ibicom yam bit yo di ingkwei hanyen di israwir nya bi. Noro iba ingon com Allah apino igyai niteu leu sisarti kin niyaijo nijep.