IBRANI 1 - ALLAH NIHYET MEM TUNGWATU NYA

Allah mbrap tug hon Nipmot

¹ Nipou yo ne Allah ba nisinati di ter leu yam bitri tut ningon kanti bak idigup-idigai bat nya mbirimang bibor tug hon nabi nya.

² Noro ei nijam di ningwigsi dini Noni mbrap bit nye tug hon Nipmot. Allah pai tes mun nyeng hagom tug hon Nipmot bindo Noni nok No di mbun mun nyeng hagom.

³ Allah nikei-kau-keisi piga kei tug hon Nipmot. Nipmot dat Nicigti binyohou mun di Nicig pai tes nya titut yam tug hon nihyet di sindem bibor. Niabiati Noni tin puig mem tungwatu nya igyai niteu leu sisarti tu lene Noni gwam ei banggo mbrei dip kui Allah di Sindem Bibor ninda com ei gwamti.

Allah nipmot ninyeng jei bibor

⁴ Nipmot nigwam kepti jo anai bibor njiriek malaikati nya igwam kepti ba, ninyeng di Allah yai biNoni jei bibor dor njiriek malaikati nya inyeng a.

⁵ Allah pai sut Nide malaikati nya “Dipmot riNani ba, njap di ammani di nok Acigya”. Nok e? Noni pai nok gima bi sren. Nok gima cem Noni pai sut malaikati hi bipai “Midinok Nicig lene Noni minok Dipmot rin” bi sren

⁶ Noro dem igbit nituti di Allah cuk Nipmot mighumbou kwei ei dihyeisi dini lene Noni tri tut “Suar Allah de malaikati nya yahagom ikuk yok biNoni.”

⁷ Allah pai sut malaikati nya “Allah bibon Nide malaikati nya binok hou. Noni bibon Nide awak nya ba, inok hum njeng di sror.”

⁸ Noro Noni pai sut Nipmot “Nani ne Allah rin ba, Ade ninyeng tak kepti mijo kikau buug hon nohonti bi ba, aba angon di sren binyeng tak kep Ade limwa nya.

⁹ Angat angwes ei yo di ingon sren nyati noro angon mpo tut yo di isibut nya. Gima rino Tuhan di nok Ade Allah dimig Na leu binhyepo bindei ba, ayai ningon llei biborti tug hon anyeng di jei dor njiriek asut bat nya.”

¹⁰ Allah pai bu “Tuhan e, Nani apai tes dihyeisi dini ei nimbie him ba, abon mpia-bbed him bou anda him.

¹¹ Gima yok hagom mipror yon dem kep nok sinsun timiei di rik-ta. Noro tut Nani ne ayaijo kikau.

¹² Akrop Ade nipai testi dini nok sinsun nda leu api aba nijep biluei bu. Noro tut Nani ne ayaijo kikau. Bit bon Ade njap ngwig hon kan bi sren.”

¹³ Allah pai bak Nide malaikati hi “Akwei gwam kui dinda com bibou doom ade siceu nya ba, inok bilen mem amig ug e” bi sren.

¹⁴ Gi nok lene malaikati nya ingat rin mem mindei i? Yoni ne ninnei di inok awak mem Allah. Noni cuk yok leu binhyepo yahati tut tungwatu nya di igyai niteu leu sisarti kin niyaijo nijep.