HOSEA 12 - ALLAH NIHYET MEM TUNGWATU NYA

tuhan kes hukum ei mben Israel kin mben Yehuda dip

¹ tuhan pai “Mben Israel iba nisuglai kin niris mun biyon ttai Da. Mben Yehuda ihwen bit Da di Allah Di Kwes di dingon gom bijo kikau.

² Mun nyeng hagom di mben Israel ibon leu mpia tekti kikau ug bipek mmun bon ninyeng bi ba, mun nyeng hagom di bon ninyeng bi dima niyai munti mibindei sar yok bidem kep hou mpia priti. Ide niris munti kin ide nisibutti kum eisi ei ikieti. Ipreu mun ei bit minu Asyur lene ipwoi mini biyuug sut ug ei minu Mesir leu binhyepo ibijem isut bit yam.”

³ tuhan pai kep mben Yehuda drek dip ide munhyet. Noni mikes hukum ei Israel dip drek dip igyai munti nya ba, buhup biyok bit leu ide nibon munti di ibon nya.

⁴ Ide pung Yakub di intun him ba no dek Esau munggwom nggre ba, hei bibie leu nipmem ninghopti. Tirigi Yakub mahan tu lene noni kin Allah idahat kukwei yam.

⁵ Yakub kin malaikati gom idahat kukwei yam lene ba nide nisindemti boom malaikati dima. Leu api ba nipim bahara leu binhyepo tug ndei mun di kei. Niabiati bu ne Allah kwei ndo nonti bak ide pung di intun him di Yakub ei Betel bimbrap bit noni.

⁶ Allah dima ne tuhan Di Ninyeng Jei Bibor ri. Ninyeng rino tuhan. Suar tungwatu nya ikuk yok biNoni tug hon ninyeng tuhan dima.

⁷ Gima rino je di jintun Yakub him e, ma jiba jingon com jide Allah ba, jingkwei hanyen ndam Noni. Ma jinyohou ningon ngakei Allahti kin ningon srenti. Ma jigwam nyahan ba, joom jingon bibou jide Allah kiju ba, brim ningkek mem je ug e.

Nikos tutti nya gi bram bu tut hukum di micut igkep mben Israel

⁸ tuhan pai bak mben Israel “Jidat mben Kanaanti lewo jingon sren bi. Nitri-nipek mun cig nya ingon ya mem gi iba ide nai di igbit bi biris yo di ipek mun leu yok nya.

⁹ Ipai biyam ‘Nogindini nyeni ninyeng bibor ba, niba niris munti bitug ndei mitiei nindig bibor! Bit bon tungwa hi dima pai kep nye bipia itug ndei mun di inyeng tut dima yok tug hon ide niris munti kan bi.’

¹⁰ Noro Da di jide tuhan Allah di dibuwak je di jehei leu minu Mesir midibindei ba, jibong ei prak meng yati nya hanyen nok gi nipou tirigi dihwou ngat je ei iggum ndigsi.

¹¹ Dimbrap bit nabi nya ba, diyai ningat-hi-ngat mang bibor biyok. Ditri tut dingon kanti di ditin ei mem je di jinok Ditde limwa nya tug hon nabi dima yok.

¹² Mbro nok gima lo, bihi no ikuk yok bak kwar nya ei hanjop Gilead noro yoni mitug ndei nimai. Bihi ibon midut nindig sapi nikre ei nimbar hum dokti ei minu ndig Gilgal cem noro siceu nya minggek nimbar hum dok ngot di jo ei minu dima binok tig di jo-jo yam dip ei ngoi dumti.”

¹³ Yakub dino ide pung di intun him nang ug ei minu Mesopotamia leu api bon nonti nok awak mem tungwagom binyohou no dima nide domba nya ei minu dima leu binhyepo bitug ndei nitnem.

¹⁴ tuhan pinak nabi gom di buwak mben Israel biyehei leu gi yuubon yok nok awak ei minu Mesir binyohou yok cem.

¹⁵ Mben Israel ibindei ba, tuhan gga bibor. Suar itug ndei hukum drek dip ide nibon mun kinei biborti. tuhan mikes hukum ei yok dip drek dip gi ibindei di tungwatu nya ibindei di tuhan ninyeng kinei a.