HAGAI 2 - ALLAH NIHYET MEM TUNGWATU NYA

tuhan De Ig jep nikei-kau-keisi

¹ tuhan mbrap tug hon Nabi Hagai hanyen bu ei njap nyatungwagom bigom mem bed gi nimuhwindacan ei ari bingwam dima.

² Noni cuk Hagai buug mbrap bit Nibou Zerubabel kin Imam Nibou Nindig Yosua kin ide limwa nya mem gima tri tut Nide nisokti bipai biyok,

³ “Bihi di isrig jikieti no igyok ngon kep Ditde Ig nitimiei nikei-kau-keisi e? Nogindini jingat ig dini bou jiyai him bijipai igbit mun di jingat. Mpaba jikan bipia ig dini kei bibor bu bi e?

⁴ Mbro nok gima lo, ma jahagom jingon cut leu au! Ma jinda jo kep midyai niwin ig dimati lewo midimpu je kikau.

⁵ Tirigi jehei leu minu Mesir lene dipreu ei mem je bipia dinyohou je kikau. Dingat rin bit je kikau kwei bipek ammani kep. Gima rino ma jinda jo kep midyai dima kikau!

⁶ Jei bi ne midibindei ba, mpia-bbed him kin dihyeisi dini kin mambei kin muk ngeisi hagom ugwa-kwei.

⁷ Midibindei ba, ngkiai nya yahagom ide minu ugwa-kwei leu api ittei ndigban di ide nya hagom kwei ei minu ndig dini leu binhyepo Ditde Ig mpung tut ide mun di inyeng tut nya hagom.

⁸ Dinyeng tut mas kin perak hagom ei dihyeisi dini.

⁹ Ditde Ig jep nikei-kau-keisi kei bibor dor njiriek ig timiei pima bu. Midibindei ba, Ditde limwa nya ibong kei igwam kei ba, inyeng tut mun nyeng di isuar nya hagom ei gumihyep dini.” tuhan Di Sindem Bibor simbot dat tu.

Nabi Hagai kin imam nya isimbot kep biyam

¹⁰ Darius ninyeng tak kep Persia ba, ug cut ari bingwam gi nican ei njap gi nigom mem bed gi nimuhwindatai lene tuhan Di Sindem Bibor sok nihyet ei Nabi Hagai dip hanyen bu,

¹¹ bipai bak “Ma ahig ser imam tut ide nikos tutti tut munhyet dini.

¹² Gino tungwa hi yai mikwau ninghui nittou gom leu midut nindig mindhe ei nimbar hum dokti di ibikuk yok bak tuhan leu api krop sinsun nide binggai ei niti bittei buug sut leu api ba sinsun dima bingget roti kin njita di mui su kin ba anggur ngei kin mini zaitun ngei bidem njita nyeng hagom ne niyaisi dima bindei ba, mun di nide sinsun ngget dima yok cem hagom kwes kei e?” Tirigi Nabi Hagai hig ser imam nya tut lene ibuhup “E bi.”

¹³ Leu api Nabi Hagai hig ser yok “Gino map kui tungwagom drek dip gi ngget nimai ngut leu api ngget njita nyeng pima yok gom ne map kui njita dima cemti e?” Imam nya ibuhup “Igbit rin ba, jo nibreisi bipia map kuisi tu!”

¹⁴ Leu api Nabi Hagai pai biyok “tuhan pai bipia munhyet dima ket ei limwa Israelti bitut mun nyeng hagom di ibon bou inda him cem. Ningat ne map kui mun di ibikuk yok bak tuhan ei nimbar hum dokti dini.”

tuhan preu ei mem yok tut mun di kei di Noni njei bak yoni

¹⁵ tuhan pai “Jingig jiyai kep mun di cut igkep je njap di ammani nimo jug nipou tirigi jiwin Ditde ig bigyo! Mpe dima lene mindei rino cut igkep je i?

¹⁶ Mpe dima lene jipi bijuug yok jiyai kep gandum nitu di jinju keyam lene jikan bipia mijiket gandum nitu kilo sratus can lo, gi jiket ne kilo sratus gom hak ri. Jipi bijuug tau ba anggur ngei liter sratus gom leu tong ba anggur ngeisi lo, gi jitau kwei ne liter ningot bitai he ri.

¹⁷ Dibindei juk hou di dut kin biget di mbras nok tig njep di bindei ningat jide ei miaisi nya hagom sar. Mbro nok gima lo, jittin ser jide sisar bijingkwei hanyen ndam Da bi.

¹⁸ Jiprion tig pmem mem Ditde Ig nikiou biput ei bed nimuhwindatai ba, njap nyatungwagom bitai lo, njap dima ne njap di ammani ri! Ma jingig jiyai kep mun di mipek kep mem je ei nitutti di njap di ammani bikui.

¹⁹ Mbro nok gino gandum nitu hi jo bu bi ba, ba anggur kin biei ara kin biei delima kin biei zaitun hagom ngat ningat bigyo lo, midinjei mun di kei bak jeni ei nitutti di njap di ammani bikui!”

tuhan preu ei mem Nibou Zerubabel

²⁰ Ug cut njap nyatungwagom bitai ei bed gi nimuhwindatai ne tuhan yai nisokti gi nican bak Nabi Hagai,

²¹ mem gima noni tri tut hanyen bak Nibou Zerubabel. tuhan pai “Jei bi ne midibindei ba, mpia-bbed him kin dihyeisi dini ugwa-kwei rin,

²² bidinjei ngkiai nya ide ninyeng tak kepti nya ba, dibindei timek ide nisindemti nya. Midibindei kiek ide kroba pran nya bitut yo di ibri bikrau nya ug ei dihyeisi. Kuda hagom mimai lene yo di ibri kuda nya yonti mitot yam bingwig.

²³ Njap dima ne midikon na di Nibou Zerubabel nok Ditde awak mem gima anyeng tak kep limwa nya gau dinyeng. Lewo didimig nani ei mem midyai dima.” tuhan Di Sindem Bibor simbot dat tu.