GALATIA 3 - ALLAH NIHYET MEM TUNGWATU NYA

Ibinai Puig Yahudi niggai serti kin niba ningon com Kristusti kin yam

¹ Je di timiei hanjop Galatia e, jingon mbum yo! Tou rino kiek jingon i? Dindo Yesus Kristus nimai ei biei salibti brei bije tu!

² Ma jibuhup igbit bida. Apo jiyai Allah Ninnei ei jingonti tug hon gi jibit Puig Yahudi niggai serti nya e, he tug hon gi jimiap Nihyet Di Kei leu Allah leu api jingon jo kep Kristus e?

³ Nggon rino jingon mbum bibor i? Jikinyon ei jide niyaijo nijepti tug hon Allah Ninnei noro nogindini jibindei niyaijo nijepti dima mahan tug hon jide nisindemti e?

⁴ Mun di pek kep mem je dima mikui-kausi e? Bit bon mun dima pek kep mem je mikui-kausi kan bi!

⁵ Allah yai Ninnei bije ba, bibon mindur ei jikieti. Apo Noni yai gima drek dip gi jibit Puig Yahudi niggai serti nya e, he drek dip gi jimiap Nihyet Di Kei leu api jingon jo kep Kristus e?

⁶ Ma jiba jingon bisrip huk tut mun di pek kep mem Abraham. Allah nihyet pai sut Abraham “Allah ningon kwes kin noni lewo ba ningon com Allah.”

⁷ Gima rino ma jikan kep bipia yo di intun Abraham him ningat-ngat nya rino yo di iba ingon com Allah.

⁸ Allah nihyet tri tut mun di mipek kep ei niabiati bu bipia Allah miyai ngkiai nya ingon kwes kin Noni tug hon ide niba ningon com Noti. Gima rino Allah nihyet mbot kep tut Nihyet Di Kei bak Abraham “Tungwatu dihyeisi dini hagom migyai gi kei tug hon nani.”

⁹ Abraham ba ningon com Allah gima rino Allah njei mun di kei bak noni. Apino yo di iba ingon com Allah yahagom migyai mun di kei bit Abraham.

¹⁰ Allah sigion yo di iba ingon com bipia igyai ingon di kwes kin Noni tug hon gino ibit Puig Yahudi niggai serti nya yahagom. Bit leu nok gi ipas ei Allah nihyetti “Tungwa tou rino ba ningon di gom bibit Puig Yahudi niggai serti kikau bi ne Allah sigion no dima.”

¹¹ Bit bon tungwa hi yai ningon kwes kin Allah tug hon gi bit Puig Yahudi niggai serti kan bi. Allah nihyet mbot kep tut “Tungwa tou rino yai ningon kwes kin Allah tug hon nide niba ningon com Noti miyai niyaijo nijep.”

¹² Noro Puig Yahudi niggai serti ntun him niba ningon com Allahti bi. Lewo Allah nihyet pai bipia bikwop tungwa tou rino yai igbit Puig Yahudi niggai serti mitug ndei niyaijo drek dip.

¹³ Noro Kristus kwek nye leu Puig Yahudi niggai serti nisigion nyeti tug hon mpe di po Nonti sindui sut ba, biang nisigion Nonti luei nye. Bit leu nok gi ipas ei Allah nihyetti “Tungwa tou rino yai hukum nimai ei biei salibti tug ndei Allah de nisigion noti.”

¹⁴ Kristus niyai munti dima bindei ba, mun di kei di Allah preu ei mem Abraham kwei pek kep mem ngkiai nya cem. Tug hon nisinati dima lene nye di iba ingon com Allah igyai Ninnei di Noni preu ei mem nye.

Ibinai Puig Yahudi niggai serti kin Allah nipreu eisi kin yam

¹⁵ Disut bat jen, dindo bindo leu nye di tungwatu nya igyai kepti nya. Gino ibou can ipreu ei mem yam tut ide nikos tutti gom bitak buk ser tu lene bit bon hiter nggek tut nikos tutti dima ba, ba mun nyeng hi bikum eisi cem kan bi.

¹⁶ Allah preu ei mem Abraham kin no di ntun noni him cem. Bit leu nok gi ipas ei Allah nihyetti “Mem yo di intun Abraham him” bi. Gi nok lene gima bitut imang bibor. Noro bit leu nok gi ipas ei Allah nihyetti “Mem No di ntun noni him.” Nipasti dima ndo tut tungwagom he ba, No dima ne Kristus ri.

¹⁷ Gi dipai sut dima rinok gini. Allah preu ei mem Abraham ngkiem bitak buk ser nipou su. Gima rino bit bon niggai serti di Allah yai bak mben Yahudi ari bingwam sratus bitai ningot ningai niabiati bu dima binggek tut mun di Noni preu ei mem Abraham ngkiem biciu ser kan bi.

¹⁸ Leu gino mun di kei di Allah njei bak tungwatu nya dima kwei tug hon ide nibit Puig Yahudi niggai serti he lene gima bindo pia kwei bit leu Allah nipreu ei mem yokti bi. Noro Allah yai mun di kei dima bak Abraham drek dip nipreu ei mem noti.

¹⁹ Gi nok lene Allah yai niggai serti dima bak mben Yahudi mem mindei i? Noni ba Puig Yahudi niggai serti bikum ei nipreu ei mem yokti leu binhyepo ndo tungwatu nya ide sisar brei biyok. Puig dima mbut kikau ug bipek no di ntun Abraham him di Allah preu ei mem Abraham nikweisi. Malaikati nya isu inda bigyai niggai serti nibokti bak tungwagom di ya hacan mem Allah kin tungwatu nya.

²⁰ Ba, gino ibou can itte tut yam lene isuar tungwagom di ya hacan bibakei yokti. Noro Allah suar tungwagom di ya hacan mem Noni bi. Nongkom yai nibou tut hak.

Allah bindei mbut Puig Yahudi niggai serti mem mindei

²¹ Gima ndo bindo bipia Puig Yahudi niggai serti tte tut Allah nipreu eisi e? E bi! Leu gino Allah yai niggai serti di bindei ba, tungwatu nya iyai niyaijo nijep lene gima bindo pia igyai ningon di kwes kin Allahti tug hon niggai serti dima.

²² Noro bit leu nok gi ipas ei Allah nihyetti bipia tungwatu dihyeisi dini hagom ide sisar om kep yok. Gima rino yo di ingon jo kep Allah iba yo kep mun di Noni preu ei mem yok tug hon ide niba ningon com Yesus Kristusti.

²³ Nipou tirigi tto bou dem mem tungwatu nya igyai ingon di kwes kin Allah tug hon ide niba ningon com Yesusti bigyo ne Puig Yahudi niggai serti nggam nye bingkiem nok yo di isima kikau bibou tto bou dem mem Allah mbot kep tut niba ningon com Kristusti binye dima dem ug e.

²⁴ Gima rino Puig Yahudi niggai serti ttei nibou nok nibou di kos tut mem nye kikau bibou Kristus kwei biyai ingon kwes kin Allah hanyen drek dip ide niba ningon com Kristusti ug e.

²⁵ Tini bu ne tto bou dem tu ba, bon nituti mem tungwatu nya iba ingon com Yesus. Gima rino Puig Yahudi niggai serti ttei nibou di kos tut mem nye bu bi.

²⁶ Ba, jahagom jinok gom kin Kristus Yesus drek dip jide niba ningon com Noti. Gima rino jinok Allah nimunggwom bat nya.

²⁷ Ba, jahagom jiyai dimigyam tug hon Kristus ninyeng leu api jiba jekep Yesus ningon mien paisi ei jingonti.

²⁸ Gima rino mben Yahudi kin ngkiai nya cem awak nya kin yo di igyati kwes cem pinai nya kin sop nya cem jahagom titer leu yam bu bi noro jahagom jinok gom kin Kristus Yesus.

²⁹ Gino jijem jiceu bit Kristus ne jintun Abraham him bijiba je kep mun di Allah preu ei mem noni kin yo di intun noni him.