GALATIA 1 - ALLAH NIHYET MEM TUNGWATU NYA

Paulus pigo yo di inggre kin mbusyamei ei hanjop Galatia

¹ Srat dini leu da di Paulus. Diyai dinyeng no di ya kui Yesus tug hon gino tungwatu nya igya hacan mem da bita da nok no di ya kui Yesus bi. Noro tug hon Yesus Kristus kin Nicig Allah di win Noni hanyen leu nimai eisi.

² Dani kin yo di Kresten di ingat rin bit da nipigo je di mbusyamei ei hanjop Galatia.

³ Handei kon ba, Icig Allah kin Tuhan Yesus Kristus isingat tut je ba, ibiyai jingon jo nyahan.

⁴ Kristus kes Nonti ningut ei noyam kin mikwau di ibui bibam ei nimbar hum dokti mem ide sisar bit leu Icig Allah ningon kanti ba, teu nye leu nijam di sisar ttei nimig eisi ei dihyeisi dini.

⁵ Gima rino ma tungwatu dihyeisi dini hagom inggei-nggwang tut Allah bijo ninno bijo kikau! Igbit ri.

Ningginausi tut Nihyet Di Kei gom ngat he

⁶ Dinga leu tut je! Allah hig je tug hon Kristus di singat tut je noro nogindini haninyai jiba jinghim bak Noni leu api jibit nihyet di kei hiter leu Nihyet Di Kei di kwei leu Allah.

⁷ Nihyet di kei hiter hi bi sren. Noro tungwatu nya iba nihyet di kei di ikiek-kiek nyen dima bitri tut ighyet di bigen ser je.

⁸ Gino dani kin malaikati leu gwamti cem bitut tungwa tou rino tri tut nihyet di kei hiter di simbrep tut Nihyet Di Kei di ditri tut bije nipou su lene ma Allah sigion noni!

⁹ Nok gi disok kep je nipou su ba, tini bu ne disok kep je mbigom kin bu bipia gino tungwa hi tri tut nihyet di kei hiter di simbrep tut Nihyet Di Kei di jiyai leu nyeni ba, jingon jo kep tu lene ma Allah sigion noni!

¹⁰ Apo diyok dingon mem gima tungwatu nya ingon kwes kin da tug hon mun di dipas dini e? E bi! Diyok dingon mem dingon kwes kin Allah. Dipwoi tungwatu nya ingon leu binhyepo ijoi sut da e? Gino dibon kikep nok gima ne dinok Kristus de awak bi.

Allah ta Paulus nok no di ya kui Yesus

¹¹ Disut bat jen, ma jiyok ngon kep bipia Nihyet Di Kei di ditri tut dima ntun tungwatu dihyeisi dini him bi.

¹² Diyai Nihyet Di Kei leu tungwatu nya ba, hi ngginau da tut cem bi. Noro Yesus Kristus Nonti mbot kep tut Nihyet Di Kei brei bida.

¹³ Ningat ne jimiap dinghapti tut gi dita dibou ei Puig Yahudi niggai serti. Jimiap dinghapti tut gi dingon koi kep Allah de mbusyamei nya bidiyai ninghuisi wei biyok bidigruap mem gima dibindei timek yok.

¹⁴ Dita dibou ei Puig Yahudi niggai serti dor njiriek mben Yahudi nindigsi nya di ikui sur dani cem. Dita dibou ei didigup bat-didigai bat nya igyai kepti timiei nyati cem.

¹⁵ Noro Allah singat tut da bidimig da habiei ei dipmem ninghopti bidinok Nide awaga.

¹⁶ Tirigi Noni kos tut bipia ndo Nipmot brei bida leu binhyepo ditri tut Nihyet Di Kei tut Nipmot bak ngkiai nya lene duug nggok tungwatu nya mem gima ipingok dingonti tut bi.

¹⁷ Duug nggok yo di igya kui Yesus habiei ei nimbie him nya ei minu ndig Yerusalem cem bi. Noro duug bong ei hanjop Arab leu api dingkwei hanyen ug ei minu ndig Damsyik.

¹⁸ Ari bingwam ningai bu lene duug ei minu ndig Yerusalem leu binhyepo dindo danti bak Petrus bidibit bong mem mmun-njap simnaimuhwidip he.

¹⁹ Dingat yo di igya kui Yesus nindigsi nya bou diyai him bi lo, Yakobus di Yesus nikinjoi nongkom he.

²⁰ Mun di dipas kep tut dini ne nijit-jau ri. Allah kan tut bipia diris je bi!

²¹ Gima leu lene duug cem kep minu di jo ei hanjop Siria kin hanjop Kilikia.

²² Hon kep nijam dima ne yo di mbusyamei nya ei hanjop Yudea ingat diimaisi bou igyai him bi.

²³ Ba, yo dima imiap tut dinghapti di hiter itri tut biyok bipai “Nipou ne noni yai ninghuisi wei binye noro tini bu ne tri tut nihyet niba ningon com Kristusti di noni srep tut ei nipou su pima.”

²⁴ Gima rino inggei sut Allah tut mun di Noni bindei pek kep mem da.