FILIPI 4 - ALLAH NIHYET MEM TUNGWATU NYA

Ningginausi mem mbusyamei ei minu ndig Filipi

¹ Gima rino disut bat di dingon kieti jen, ma ditde nipingok jeti bindei ba, jiya nddong kei drek dip jide ninok gom kin Tuhanti. Dingon ngguk tut je lo, dinggei ngwig sut je ba, jibiyai dingon llei bibor.

² Dikwohop Euodia kin Sintike jen! Ditigtai je leu binhyepo jingon kwes kin yam hanyen dem kep sop di itig mbier tut yam ei Kristusti.

³ Na di disut di ningon gom e, handei kon ba, ampu sop cin dini. Lewo nipou ne ibrim ingkek bimpu da tirigi ditri tut Nihyet Di Kei leu Allah noyam kin Klemen kin disut bat nindigsi nya di inyeng tibim kin daptar yo di igyai niyaijo nijep nya yahagom.

⁴ Handei kon ba, jingon llei bibor bikwop mmun-njap drek dip jide ninok gom kin Tuhanti. Ditigtai je mbigom kin bu “Ma jingon llei bibor!”

⁵ Handei kon ba, tungwatu yahagom ingat bou igyai him bipia jiba jibou coi mem yam lewo jei bi ne Tuhan mikwei hanyen.

⁶ Ma jingon pri tut mun nyeng hi au. Tirigi jingat nadi lene ma jahara Allah tut mun di jisuar nya. Ma jiba nipai sigyo di ntun jingonti him bahara Noni tut mun nyeng hagom.

⁷ Gima mibiyai ningon di jo nyahan di kwei leu Allah di bit bon tungwatu nya ingon dorti tut kan bi ya bingkiem ser jingonti kin jibou ngwakti di nok gom kin Kristus Yesus.

⁸ Disut bat jen, son dideu srat dini ninggrupti tu. Ma jipwoi mun di bon ninyeng kin mun di dem mem gima tungwatu nya inggei sut nya ei jingonti. Mun dima rino niba ningon bisrip bram nijit-jausi kin mun di bindei ba, tungwatu nya inggei sut kin mun di sren-srau kin mun di kwes-kwau kin mun di bit bon hi tte tut kan bi kin mun di tungwatu nya igyai ngakei kin mun di singat kei hagom.

⁹ Ma jibindei mbut ningginausi kin nipingokti di jiyai leu da tug hon dihyet kin diyai munti nya. Allah di nok nibousi mem ningon jo nyahanti migwam bit je.

Paulus pai sigyo bak yo di mbusyamei nya

¹⁰ Niabiati dibet dingon ninno tu lene jibindei ba, ditde niyaijo nok gom kin Tuhanti biyai dingon llei bibor tug hon gi jiyai nituti mem jihig yam tut mun di binyohou da. Jikan bipia dipaisi dini bindo bipia jingon prion ser da e? E bi! Lewo dikan tut bipia bon nituti mem jinyohou da bi.

¹¹ Dimbot kep tut gini bije drek dip gi dihwap mbum bi. Lewo doom dingon ba, dingon cut hon mun di dimati nya.

¹² Mpe hi lene dihwap mbum lo, mpe hi dimbun mun di dibinyohou da. Doom dingon leu binhyepo dingon cut hon mun di dimati nya mem nijam di dimbun mun nyeng mang bibor kin nijam di dihwap mbum cem. Gini ne nimimun di bipingok dingonti drek dip mun di pek kep mem da mem mmun-njap ri.

¹³ Kristus sindem tut da leu binhyepo diba nisindemti dima bikiek doho ndam mun di cut igkep da hagom.

¹⁴ Noro tirigi mun di buhun cut igkep da lene jimpu da. Ba, jo nibreisi bipia jiyai kepti dima kei bibor.

¹⁵ Je di timiei minu ndig Filipi jikan tut bipia tirigi kindi dijo leu hanjop Makedonia biditri tut Nihyet Di Kei pima lene jeni ne mbusyamei gom ngat he di hati tut da bipriet kin da tirigi dihwap mbum kin dimbun mun di binyohou da cem ri.

¹⁶ Tirigi dingat rin ei minu ndig Tesalonika ba, dihwap mbum lo, jahati tut da mbigom he bi noro mbirimang bibor.

¹⁷ Ningat ne ditindei kep tungwatu nya indati tut mun di bahati tut da bi. Noro dingon llei sut gi jibikum ei jimuhupti.

¹⁸ Dingon cut hon mun di jikwas tut da ba, hagom nindig bibor bidor njiriek! Epafroditus pwoi mun di jikwas tut da hagom kwei bida tu ba, gima dem. Dinyeng tut mun di disuar nya hagom tu. Mun di jikwas tut da hagom noyam kin mindhe di ngge di ibui bibam ei nimbar hum dokti bou Allah niyai him ba, joi sut.

¹⁹ Allah di dikuk da bak di nyeng tut mun di binyohou je nindig bibor miyai mun di jisuar nya hagom bije tug hon Kristus Yesus.

²⁰ Handei kon ba, tungwatu yahagom ikon Icig Allah ninyeng kikau buug hon nohonti bi! Igbit ri.

Paulus pas kep gi ningwigsi

²¹ Disok dipigo yokti bak Allah De limwa nya di inok gom kin Kristus Yesus yahagom. Disut bat yo di ingon jo kep nya di ingat rin bit da ei sirini cem ipigo je.

²² Allah De limwa nya yahagom di ingat rin ei minu ndig dini ipigo je lo, gi ningat-ngat rino timiei Kaisar de ig bei nsi nya.

²³ Handei kon ba, Tuhan Yesus Kristus singat tut jahagom. Nipigo leu nyeni, Paulus kin Timotius