FILIPI 3 - ALLAH NIHYET MEM TUNGWATU NYA

Ningon srenti ntun niba ningon com Kristusti him

¹ Disut bat jen, dipas kep ningwigsi nok gini. Ma jingon llei sut jide ninok gom kin Tuhanti. Gino nipas kepti dini kibin kep nipas kepti di dipas kep nipou su ne buhun mem da bi. Lewo nipas kepti dini minyohou je leu binhyepo jisrawir bi.

² Ma jitindei ser yo di ibon kep mun di suwok nya lewo inoyam kin nsien di niten-pos nya bibidip huk tungwatu nya tut midut sunat.

³ Lewo nyeni icoi ei midut sunat di nijitti tu noro yoni ne bi. Lewo ikuk nye bak Allah tug hon Allah Ninnei di mpu nyeni ba, ingon llei sut ide ninok gom kin Kristus Yesusti ba, iba ingon com nibon midut ningkek dip nya bi.

⁴ Ningat ne bon diba dingon com midut di nok gima. Gino hi kan bipia bon noni ba ningon com midut neet ningkek dipti ne dani cem diba dingon com midut dima dor njiriek bu.

⁵ Tirigi ditde njap ug ei njap muhwindaningai lene dicoi bit midut sunat ba, dani ne timiei mben Israel rin tug hon disrekti. Ditde pung kim keret Benyamin ba, didigup bat-didigai bat nya yahagom intun mben Ibrani him. Ba, dibit Puig Yahudi niggai serti nya hagom lewo dinggre kin nimpung Farisi nya.

⁶ Diba ningon di yat nai bita dibou ei nihwen bit yo di mbusyameiti. Gino iba Puig Yahudi niggai serti nya binai diyai kepti nya ne jo nibreisi mem yok bipia disingat kei lewo dipigau hanjop hi bi.

⁷ Noro Kristus bindei ba, diyai kepti nya di bon ninyeng mem da nipou su hagom bon ninyeng mem da bu bi lewo hagom noyam kin mumpiang.

⁸ Lene mun dima yok he bi. Lewo dikes mun nyeng hagom ei tereu nok mumpiang di bon ninyeng mem da bu bi leu binhyepo dinyeng tut mun di bon ninyeng nindig bibor dor njiriek bu. Mun dima rino dingon bit Kristus Yesus dino ditde Tuhan. Dikes mun dima yok hagom ei drek dip Kristus. Dibibon hagom tereu nok mumpiang leu binhyepo dingon bit Kristus lewo Noni bon ninyeng mem da,

⁹ bidinok gom kin Noni. Dinggok tut ningon kwes kin Allahti tug hon gi dibindei mbut Puig Yahudi niggai serti nya bu bi. Nogindini dingon kwes kin Allah hanyen tug hon ditde niba ningon com Kristusti. Lewo Allah yai ningon di kwes kin Noni hanyen bak tungwatu nya tug hon ide niba ningon com Yesus Kristus Nongkom he.

¹⁰ Dingon bisau sut mun nyeng gom ngat he. Mun nyeng gom ngat dima rino dingon bit Kristus leu binhyepo nisindemti di biwin Noni hanyen leu nimai eisi misindem tut da bidipriet kin ninghuisi wei di cut igkep Noni bidinoyam kin Noni drek dip nimai ei biei salibti.

¹¹ Ba, diyok dingon mem gima Allah miwin da hanyen leu dimai eisi bidiyaijo hanyen bu.

Ibinang yam ndam nipekti

¹² Tut danti ne duug pek nipekti bidikei-kau cem bigyo. Noro dita dibou ei nibinang ndam nipekti leu binhyepo dibitug ndei mun di kei di Noni bet ei mem da. Ba, mun dini yok hagom bicim tindei Kristus Yesus ningon kanti mem da tirigi Noni bindei ba, dijem diceu bit Noni.

¹³ Disut bat jen, ningat ne dikan bipia duug pek nipekti tu biditug ndei mun di kei dima bi. Noro dita dibou ei mun nyeng gom ngatti. Mun nyeng gom dima rino dingon prion ser mun di jo ei dinghim dip bidibrim dingkek sindem bibor leu binhyepo duug pek nipekti di jo ei doho bei.

¹⁴ Gima rino didor bidihallu kak puig ndam nipekti leu binhyepo ditug ndei niyaijo ei gwamti. Tut gima rino Allah hig nye kwei tug hon Kristus Yesus.

¹⁵ Ma nye dino imahan ei ingonti kin innei yahagom ingon mien paisi noyam kin Nide ningon mien paisi. Lene gino bihi ingon mien paisi titer ne Allah mipingok gima bije bijingon dorti tut yo.

¹⁶ Mbro nok gima lo, nnaba yahagom ibit nidimig sutti nya di nyeni ibit nipou kwei bipek ammani kep kikau.

¹⁷ Disut bat jahagom! Ma jiyai bram diyai kepti nya. Nyeni nindo bindo di kei bibor bije tu. Gima rino ma jiyok jiyai kep yo di ibit bindo dima bijiyai bram igyai kepti nya.

¹⁸ Dipai bije mbirimang tu lo, diba dingon di buhun bindat kep mbigom kin bu bipia diyai nggwei kibor drek dip tungwatu nya imang bibor di iba igyai kepti nya binggek tut Kristus nimai ei biei salibti nimbot kepti.

¹⁹ Yoni mitug ndei hukum ug ei hum njengti lewo ikuk yok bak ide ningut pri kepti nya. Suar immai sut igyai kepti nya di biyai ingon jei lewo ikan-kan nyenti sror ndam mun di ntun dihyeisi dini him he.

²⁰ Noro nyeni ne timiei gwamti nya rin ba, ide Nibou Ndig di teu nye leu sisar biyai niyaijo nijep binye mikwei hanyen leu ginyo kug. Noni ne Tuhan Yesus Kristus ri. Iba ingon llei nindig bibor biyok ingon mem nikwei hanyenti.

²¹ Noni miluei ingut di sindem bi di mipror yon dini binoyam kin Nonti ningut di kei-kau-kei. Bon Noni yai gima drek dip gima Noni mbun nisindemti mem gima bikuk nipai testi nya hagom ei nimig him.