FILIPI 2 - ALLAH NIHYET MEM TUNGWATU NYA

Ningginausi tut Kristus De niba nibou coisi kin ninyeng jeisi

¹ Jide niyaijo nok gom kin Kristusti biyai nisindem bije ba, Kristus ningon ngakei jeti gwam ser jingona. Allah Ninnei bie tut je cem jisingat tut yam cem jingondut yam cem.

² Gima rino jibingon ba, jiyaijo bit yam ba, jide ningon gomti dem yam kin jide ningon ngakei yamti dem yam kin jide niyok ningon gomti dem yam kin jide ningon kanti gomti dem yam ba, jibiyai dingon di nggan-triot.

³ Ma jiyai munti nya ntun jingon di jei him ba, jibindei mbut ninyeng mangti di tug hon jenti kin jingon di jei au. Noro ma jiba jibou coi mem yam ba, jibibon hiter ningon sren dor njiriek je.

⁴ Ma jinyohou mun di bon ninyeng mem jenti he bi noro ma jinyohou mun di bon ninyeng mem hiter cem.

⁵ Ma jingon mien paisi noyam kin Kristus Yesus ningon mien paisi.

⁶ Mbro nok gino ningat ne Noni kin Allah yahacem noyam lo, Noni krau kep Nide nikei-kau-keisi kin ninyeng di jei noyam kin Allah bi.

⁷ Noro Noni kes Nide nikei-kau-keisi kin ninyeng di jei noyam kin Allah hak ei leu api ba nibou coi bibindei Nonti nok awak. Noni luei nitta binok tungwatu leu api niyaijoti kin niyai munti nya noyam kin tungwatu igyaisi nya bou igyai him.

⁸ Noni ba nibou coi bibit Allah ningon kanti mem Noni kikau ug bipek tto bou mem ipek Noni bimai ei biei salibti.

⁹ Gima rino Allah win Yesus hanyen bikon ninyeng jei bibor dor njiriek ninyeng nindigsi nya biyai nisindemti di nindig bibor dor njiriek nisindemti nindigsi nya biNoni.

¹⁰ Leu binhyepo Allah nipai testi di ninnei ttau nuhwap nsi ei gwamti kin dihyeisi kin dihyei jou yahagom iba ibiau bicom mpia, bikon Yesus ninyenga.

¹¹ Ba, yahagom mitri tut brei bak tungwatu nya bipia Yesus Kristus ne Tuhan rin ba, inggei sut Icig Allah.

Ma jinok ninjeng di piga digai dihyeisi dini

¹² Gima rino disut bat di dingon kieti jen, nipou tirigi dingat rin bit je ne jibit dihyet. Tini bu tirigi dibong minu ting leu je lene ma jibit dihyet dor njiriek bu lewo gini bon ninyeng mem je. Allah teu je leu sisar bijiyai niyaijo nijep tu. Noro ma jiba ningon di gom tut Noni kin nibit ningon kanti mem je binyohou jide niyaijo nijep kikau,

¹³ lewo Allah Nonti ripingok ei jingonti leu binhyepo jingon llei bijiyai nisindemti mem jibindei ba, Noni joi sut je.

¹⁴ Ma jilua sok drek dip jiyai munti nya ba, jiliriem yam cem au.

¹⁵ Tug hon nisinati dima lene jibindo brei bipia jinok Allah nimunggwom bat di ibon sisar bi di ingon sren ba, ingon gom cem mem nijam di ingat rin ei yo di isuwok kin yo di ibon sisar nya ikieti. Ma jinok ninjeng di piga ei yo dima ikieti noyam kin ham di piga digai mpia-bbed him,

¹⁶ tirigi bon nikwesti mem jitri tut nihyet di biang niyaijo nijep biyok. Gino jiyai munti nok gima ne dillei ngwig sut je ei njap di Kristus kwei hanyenti. Lewo ningat di kei di ntun diyai munti nya him dima rinok bindo di bindo bipia dahanggwap mbilen mikuisi bi.

¹⁷ Mpaba tungwatu nya mibui da bidinggrom siber noyam kin ninggrom di imam nya isiber ei mindhe di ibui ei nimbar hum dokti dip. Mindhe dima tereu nok mun di jiyai bak Allah drek dip jide niba ningon com Kristusti. Gino mun dima micut igkep da ne dipai sigyo bidillei ngwig sut je.

¹⁸ Gima rino ma jipai sigyo ba, jillei ngwig bit da.

Paulus ningon kanti mem Timotius kin Epafroditus

¹⁹ Diyok dingon mem nituti tirigi dicuk Timotius bihwou ngat je gino Tuhan Yesus ce tut, leu binhyepo noni bindei bidimiap tut jinghapti di biwin kep dingonti hanyen bu.

²⁰ Nongkom pwoi dingon biba ningon di gom bingondut je.

²¹ Nindigsi nya yahagom ibou buwei kep mun di bon ninyeng mem yonti. Ingon hek tut Yesus Kristus ningon kanti mem yok bi.

²² Jingat bou jiyai him bipia Timotius dem mem midyai dini. Noni brim ningkek bit da tirigi nitri tut Nihyet Di Kei. Nahacem nimbier kim yam tereu nok nipmot-nicig nya.

²³ Gima rino tirigi dikan tut mun di mipek kep mem da ei dibongti dini midicuk noni bihwou ngat je.

²⁴ Diyok dingon mem gima dihwou ngat je gino Tuhan ce tut.

²⁵ Tut isut Epafroditus di jicuk kwei di mpu da ne dikos tut bipia suar dicuk noni bihwou ngat je hanyen. Noni ya kui da bibrim ningkek bibahati tut Nihyet Di Kei cem bit da ei mpia dini.

²⁶ Ningon ngguk tut jahagom ba, ningon mbut-mbut nyen tirigi noni miap tut bipia ninghapti tibim tut ninggwenti hwou bak jeni tu.

²⁷ Jit-jit, noni nggwen nindig bibor ba, dideu nide njap ningwig honti lo, Allah ngondut noni he bi noro ngondut dani cem leu gima dingon ngguk bram noni dor njiriek bu a.

²⁸ Gima rino dingon llei dor njiriek leu gino bon nituti mem dicuk noni hanyen hwou ei jikieti bibindei jingon nggan-triot hanyen tirigi jingat noni bou jiyai him. Ba, dani cem dingon nggan-triot bit je.

²⁹ Ma jiba jingon di llei biya um noni noyam kin jikindig ei Kristusti. Ma jikon yo di igyai bram Epafroditus niyai kepti nya yahagom inyeng,

³⁰ lewo noni nggok nimai eisi binggwen nindig bibor cem drek dip midyai nitri tut Kristus nihyetti leu binhyepo hati tut da biya luei johoti.