FILIPI 1 - ALLAH NIHYET MEM TUNGWATU NYA

Paulus pigo yo di inggre kin mbusyamei minu ndig Filipi

¹ Srat dini leu da di Paulus kin Timotius ba, nyeni ne Kristus Yesus De awak nya ri. Srat dini mem Allah De limwa nya di inok gom kin Kristus Yesus ei minu ndig Filipi bitut nibou mbusyamei nya kin yo di igya kui yok.

² Handei kon ba, Icig Allah kin Tuhan Yesus Kristus isingat tut je bigyai ningon di jo nyahan bije.

Paulus ngat nadi tindei yo di ikwop kep srat dini

³ Bikwop mpe dino dingon huk niti tut je ne dipai sigyo bak Allah.

⁴ Dingon llei bibor bikwop mpe dino dingat nadi tindei jahagom ba,

⁵ dipai sigyo bak Allah lewo jimpu da tut midyai nitri tut Nihyet Di Kei habiei ei nimbie him kikau kwei bipek ammani kep.

⁶ Diba dingon com bipia Allah di kinyon ei midyai di kei bibor diniti ei jingonti miyai kep midyai dima kikau bibou put hon ei Njap Di Kristus Yesus kwei hanyen.

⁷ Dem tut gima diba dingon srip huk tut je lewo jeni ne dingon kieti ri. Jipriet kin midyai di Allah ba ningon com da tut mem nijam di disima ei ig bui nsi dini kin nijam di diyati kwes ba, dimbrap gau Nihyet Di Kei bidita bingkiem kei.

⁸ Allah ngat bou niyai him bipia dipai mingat bije mpe dino dipai bipia dingon ya mem je tug hon ningon ngakeisi di ntun Kristus Yesus Nonti ningon ngakei jeti him.

⁹ Dingat nadi tindei je leu binhyepo jikum ei jide ningon ngakei Allah kin yo di jinttig-tta nyati ba, jikum ei jide ningon di dorti tut mun di nijit-jau kin gi jiba ningon di ki bimbus yam ngonti kikau,

¹⁰ leu binhyepo jibinai sut mun di kei bibor mem jenti. Tug hon nisinati dima ne jiyai munti nya kin jingonti kwes kei leu api bit bon hi njei kep je ei Kristus nikwei hanyenti kan bi.

¹¹ Apino hon kep njap dima ne jiyaijoti singat kei tug hon jide niyai munti di kei bibor kei nya di ntun Yesus Kristus Nongkom him ba, ibikon Allah ninyeng bibinggei sut Noni.

Ningginausi tut ide niyaijo mem Kristusti

¹² Disut bat jen, ma jiyok ngon kep bipia mun nyeng hagom di cut igkep da ribindei mbut Nihyet Di Kei.

¹³ Apino yo di igya ser nibou ndig de kintrorti yahagom bitut nindigsi nya cem yahagom ikan tut bipia disima ei ig bui nsi drek dip gi dinok awak mem Kristus.

¹⁴ Disima ei ig bui nsi lo, gini biyai nisindem bak yo di Kresten imang bibor ei minu ndig dini leu api ibikum ei ide niba ningon com Tuhanti. Iba ingon di nddong kei bibrim ingkek kep tungwatu nya bitri tut Nihyet Di Kei cem.

¹⁵ Mbro nok gino ibou poi iba ingon di kinei sut da bitri tut Kristus biliriem yam cem lo, nindigsi nya iba ingon di gom bitri tut Noni.

¹⁶ Yo dini iba ingon di gom bitri tut Kristus lewo ingon ngakei Allah kin dani cem. Ikan tut bipia Allah ba ningon com da tut midyai nimbrap gau Nihyet Di Kei.

¹⁷ Noro bihi iba ingon can bitri tut Kristus bibiyai inyeng jei drek dip ingon di jei. Yo dini ikan bipia igyai munti bindei ba, mun di kinei dino dor njiriek bu micut igkep da tirigi disima ei ig bui nsi.

¹⁸ Nok ug e! Dingon llei bibor drek dip iba nisinati hagom bitri tut Kristus tug hon ingon kanti di kei kin ingon kanti di kinei cem. Ba, midingon llei bibor kikau.

¹⁹ Lewo dikan tut bipia nibou nya mikes da leu ig bui nsi dini tug hon jide nadi di jingat tindei da kin Yesus Kristus Ninnei di mpu da cem.

²⁰ Dimpig bou kep mun nyeng gom. Dillei sut bidiyok dingon mem gima ba, diyai mun tunggwei sut Nihyet Di Kei bi ba, mun nyeng gom bindei cut da bi sren. Noro gi dut pap rino suar dibrim dingkek mungkun mem nijam dini kikau leu binhyepo diba diyaijoti kin diyai munti titut yam bindei mbut Kristus ninyeng jeisi tug hon diyaijoti kin dimaisi.

²¹ Mem dani ne diyaijo mem Kristus ba, dimaisi bindei mbut mun di kei bibor mem da.

²² Lene gino dimai bi bidiyai midyai di kei bibor hi kin bu mem nijam di dingat rin ei dihyeisi dini ne dingon kiowi tut gi tou ribon ninyeng mem da.

²³ Lewo dingon kanti can brim da. Dimpig bou sut gima dikes diyaisi ei ba, duug gwam bit Yesus lewo gini kei bibor mem da.

²⁴ Noro gi bon ninyeng mem dani ne diyaijo kum eisi bu bibou dibiyai kep niyai munti nya drek dip je.

²⁵ Dingon ngkiem tut dingon kanti gom ndia. Gima rino dikan tut bipia midigwam bit je leu binhyepo dibimpu je. Tug hon nisinati dima dibindei mbut jide nisindemti kin jide ningon llei biborti drek dip jingon jo kepti.

²⁶ Gima rino gino dihwou ngat je ei nidipti bu lene dihwousi dima mibon nikwesti mem je di jinok gom kin Kristus Yesus jillei ngwig sut da dor njiriek bu.

²⁷ Mun nyeng gom bon ninyeng mem jeni. Ma jiyai kepti nya bit leu Nihyet Di Kei tut Kristus nipingok jeti. Leu binhyepo gino dihwou ngat je cem dihwou ngat je bi cem lo, dimiap tut bipia jingon gom tut yam ba, jiba jingon kanti gom kin jingon llei sutti gom binjei bit yam bijicom jahanggwap tut niba ningon comti di ntun Allah De Nihyet Di Kei him.

²⁸ Ma jingwes mien tut yo di ihwen bit je au noro ma jibrim jingkek. Tug hon nisinati dima ne mijo nibreisi mem yok bipia icut bak jeni ba, Allah misindem tut je leu binhyepo jibindei cut yok cem.

²⁹ Lewo Noni singat tut je ba, ubon je nok awak mem Kristus leu binhyepo jiba jingon com Noni he bi noro jiyai ninghuisi wei drek dip Noni.

³⁰ Nogindini jeni cem jinjei bit da ei nikon pranti. Pran dini noyam kin pran di jingat bou jiyai him bipia dikon pran nipou su ba, jimiap dinghapti tut bipia dikon pran kikau kwei bipek ammani kep.