FILEMON 1 - ALLAH NIHYET MEM TUNGWATU NYA

Paulus pigo Filemon

¹ Srat dini leu da di Paulus kin sisut Timotius ba, disima ei ig bui nsi drek dip gi dinok awak mem Kristus Yesus. Dipinak srat dini bak na di Filemon lewo nani ne disut rin ba, ayai midyai mem Kristus noyam kin nyeni.

² Ba, dipinak srat dini bak yo di inggre kin mbusyamei di induk yam ei ade ig bei cem bak sindig Apfia di ningon jo kep Kristus kin Arkhipus di nok Tuhan de tentara noyam kin nyeni cem.

³ Handei kon ba, Icig Allah kin Tuhan Yesus Kristus isingat tut je ba, ibiyai jingon jo nyahan.

Filemon ningon ngakei Allah De limwa nya biba ningon com Tuhan Yesus

⁴ Disut na di Filemon e, bikwop mpe dino dingat nadi lene dindat kep anyeng bidijem sigyo bak Allah drek dip na.

⁵ Lewo dimiap anghapti di tibim tut ade ningon ngakei Allah de limwa nya yahagomti lene aba angon com Tuhan Yesus.

⁶ Dingat nadi leu binhyepo ide nitig mbier tut yamti di tug hon ide ningon jo kepti biyai ingon di dorti bibor tut mun di kei nya di igyai tug hon ide ninok gom kin Kristusti hagom.

⁷ Disut na, ade ningon ngakei Allah de limwa nyati biyai dingon di llei lene biwin kep dingonti cem. Abindei ba, Allah de limwa nya yahagom ingon llei bibor.

Paulus ya hacan mem Onesimus

⁸ Dipi bidicuk nani tut mun nyeng gom drek dip ade ningon ngakei Allah de limwa nyati kin gi dinok asut tug hon side niba ningon comti cem. Noro midicuk na tut bi.

⁹ Midiba ditde ningon ngakei nati he bahara na. Diwer andigpoi su ba, nogindini disima ei ig bui nsi drek dip gi dinok awak mem Kristus Yesus.

¹⁰ Gima rino da di Paulus dahara na tut Onesimus lewo dinok nicig tug hon nyende niba ningon com Kristusti. Lewo dimbus ningonti tirigi disima ei ig bui nsi ba, tereu nok dinok nicig tug hon mun di bitut ninnei.

¹¹ Nipou ne noni nok awak di brim ningkek bimpu na bi noro tini bu ne noni brim ningkek bimpu nangkom he bi noro bitut dani cem.

¹² Noni ne dingon kieti ri. Nogindini dipinak noni hanyen hwou ndam na.

¹³ Dipi bidikuk noni bigwam ser dingon leu binhyepo mpu da biya luei na tirigi disima ei ig bui nsi drek dip Nihyet Di Kei.

¹⁴ Noro midibidip huk na dor njiriek angon kanti bi bibou ace tut ug e. Dijoi sut ma na di andigpoi ayai igbit angon llei sutti lewo dicuk na tut bi.

¹⁵ Mpaba Onesimus ninangti mem nijam di jei bi bindei ba, noni ngkwei hanyen hwou ndam nani leu binhyepo mpu na gingga.

¹⁶ Nogindini noni nok awak mem nani he bi. Noro biyai dingon kei bibor dor njiriek bu lewo noni ne asut di angon kieti di ningon jo kep Kristus tu ri. Noni biyai dingon kei bibor noro mibiyai angon kei bibor dor njiriek bu lewo noni nok ade awak he bi noro noni nok asut di nok gom kin Tuhan cem!

¹⁷ Gima rino gino aba angon srip bram ba, dinok asut no di Kresten lene ma akau dimbou hanyen leu Onesimus ba, aya um noni dem kep nok aya um da.

¹⁸ Gino noni yai mun tunggwei sut na ba, bon ningwam bina cem lene ma arok mun dima yok hagom bida.

¹⁹ Angat i! Diba dinda ceti bipas Da di Paulus midirop ade ningwam hagom hanyen bina! (Dipingok angonti tut ade ningwam di jo bida bi. Ningwam dima ne ade niyai niyaijo nijep di tug hon Kristus ri.)

²⁰ Gima rino disut na e, ma ampu da drek dip Tuhan ninyeng. Abiyai dingon llei bibor lewo sinok sikinjoi bat yam ei Kristusti.

²¹ Tirigi dipas kep srat dini lene dikan mungkun tut bipia mporo ayai mun bit leu dingon kanti lene mporo ayai hi kin bidor njiriek bu.

²² Gino ayai kep dingon kanti dima sri lene ma atin ei nghim nsi gom ei ade ig bei mem da lewo diyok dingon mem nituti tirigi Allah birop jahagom jide nadi mem da bibuwak da hwou bidingat je hanyen bu.

Paulus kes nihyet hon

²³ Epafras di sima ei ig bui nsi bit da drek dip midyai di noni yai mem Kristus Yesus cem pigo na.

²⁴ Markus kin Aristarkhus kin Demas kin Lukas yahagom di igyai midyai mem Kristus noyam bit da cem ipigo na.

²⁵ Handei kon ba, Tuhan Yesus Kristus singat tut jahagom. Nipigo leu dani, Paulus