EFESUS 6 - ALLAH NIHYET MEM TUNGWATU NYA

Ningginausi tut munggwom nya kin icig bat ipmem bat nya

¹ Munggwom jen! Ma jibit jicig bat-jipmem bat nya ighyet noyam kin munggwom di ingon jo kep Tuhan lewo gini igbit ri.

² Allah nihyet pai “Ma jikon jicig bat-jipmem bat nya inyenga.” Ba, gini ne nicukti di bitut Allah nipreu ei mem nyeti gi nigom rin ba, nipreu eisi dima pai,

³ “Leu binhyepo jibong kei jigwam kei ba, jide njap jei ei dihyeisi dini.”

⁴ Munggwom cig jen e, ma jiba je yai yok bijibiyai ingon ten bingon sibui sut je drek dip au. Noro ma jiba Tuhan ningginausi nya bipingok yok ba, jinyohou yok bibou imahan ug e.

Ningginausi tut awak nya kin iceu bat nya

⁵ Awak jen! Ma jibit jiceu bat dihyeisi dini nya ide nicukti nya. Ma jikon inyeng bijingon gom tut yok tereu nok gi jingon gom tut Kristus.

⁶ Ma jibibon yoni nok gima tirigi igyok igyai kep je he ba, jibinggok tut gima ijoi sut je he au. Jeni ne awak mem Kristus ri. Gima rino ma jita jibou ei jiyai munti nya bit leu Allah ningon kanti mem je.

⁷ Ma jiba jingon di llei bibor biyai kep midyai mem jiceu bat nya tereu gi jinok awak mem Tuhan. Lewo jiyai kep midyai dima mem tungwatu he bi.

⁸ Ma jiyok ngon kep bipia awak nya kin yo di igyati kwes nya yahagom mitug ndei imuhup leu Tuhan drek dip ide midyai di kei bibor nya.

⁹ Je di jinok andigpoi nya e, ma jibibon jide awak nya noyam kin nicukti dima. Ma jicuug yok au. Noro ma jiyok ngon kep bipia jeni kin jide awak nya jijem jiceu bit Tuhan ei gwamti ba, Noni mig mbus tungwatu bibit leu itta di jo brei bou niyai him bi.

Ningginausi tut nijuk sinsun pran titut yamti

¹⁰ Dirop ninda ndigsi nok gini. Ma jisindui sut Tuhan ba Nide nisindemti di nindig bibor bibikum ei jide nisindemti lewo jinok gom kin Noni.

¹¹ Ma jijuk sinsun pran di Allah yai bije titut yam leu binhyepo dem mem jibiya ser ba, jibikon pran bit Bilis ei mpe dino noni ba nisinati di kinei bicom biei mpup ris je.

¹² Lewo nyeni ikon pran bitindei ser tungwatu dihyeisi dini bi noro itindei ser ninnei di kinei di inyeng tak kep nijam di kinei dini yahagom ide nisindemti. Ikon pran bitindei ser ninnei rom di inyeng tak kep mpia-bbed him nya ide nisindemti.

¹³ Gima rino nogindini ma jijuk sinsun pran di Allah yai bije! Leu binhyepo jidem mem gima jitindei ser siceu nya di icut igkep je mem nijam di biang mun di kinei. Ba, tirigi jikon pran buug ei ningwigsi lene je hei nok nikon pran cig.

¹⁴ Gima rino ma jitindei ser! Ma jiyai ningon di gom kin je nok bang di jibikri kep jintig boua. Ma jiyai jide ningon sren kin je nok sinsun pran di jijuk ser jingget a.

¹⁵ Ma jiba nice tut nibit nihyetti bitri tut Nihyet Di Kei di biyai ningon jo nyahan kin je nok srop di jijuk ser jimig joua.

¹⁶ Ma jikon niba ningon comti kin je nok hong di ndok di jibipukep Bilis de tibor di cig-cai nya hagom.

¹⁷ Ma jiyai niteu leu sisar kin niyaijo nijep kin je nok topi pran. Ma jiyai Allah nihyet di Ninnei su bije kin je nok singau simeda.

¹⁸ Ma jiyai mun dini yok hagom ba, jibingat nadi bak Allah leu binhyepo Noni mpu je. Ma jiba jiyai ngkiemti kin jingon cut leu bisi bingat nadi bidem nituti kin nikwesti hagom bit leu nok Allah Ninnei nibie tut jeti. Mpe dino jimut jiyai ne ma juhuk nadi mem jisut bat yo di Kresten yahagom.

¹⁹ Ma jingat nadi tindei dani cem leu binhyepo Allah pingok dingonti tut nihyet di tot ingonti ba, dibibrim dingkek kep tungwatu nya ba, dibimbot kep nimimun tut Nihyet Di Kei.

²⁰ Diya hacan tereu nok no di mbrap gau Allah Ninyeng Tak Kepti drek dip Nihyet Di kei lo, disima ei ig bui nsi. Ma jingat nadi tindei da leu binhyepo dibrim dingkek tut Nihyet Di Kei kep tungwatu nya bit leu nok Allah ba ningon com da tutti.

Paulus pigo yok bipas kep gi ningwigsi

²¹ Disok dihyet hwou ei Tikhikus dip. Noni ne dingon kieti kin Tuhan de awak di ningon gom ri. Noni mimbot kep tut mun di pek kep mem da bije leu binhyepo jikan tut dinghuisi kin ditde midyai nya.

²² Gima rino dicuk noni hwou ndam je. Leu api noni mipai brei bije tut mun di pek kep mem nye nya ba, bibiwin kep jingonti.

²³ Handei kon ba, Icig Allah kin Tuhan Yesus Kristus ibindei yo di mbusyamei yahagom ingon jo nyahan ba, ingon ngakei yam lene ingon jo kep Kristus haigtu.

²⁴ Handei kon ba, Allah singat tut je dino jiba jide ningon ngakei yamti di ug hon nohonti bi dima bingon ngakei ide Tuhan Yesus Kristus. Nipigo leu dani, Paulus