EFESUS 4 - ALLAH NIHYET MEM TUNGWATU NYA

Yo di Kresten ibicom yam nok gom ei Kristusti

¹ Gima rino ditigtai je bipia ma jiyaijo bit leu Allah ningon kanti mem Nide limwa di Noni dimig ei su nya. Ditigtai je nok lewo disima ei ig bui nsi drek dip gi dinok awak mem Tuhan.

² Ma joom jingon tut yam ba, jingon nggriu sut yam bijibet jingon mem yam. Ma jiba jibou coi mem yam lewo gini ne bindo di bindo tut jide ningon ngakei yamti ri.

³ Ma jiba jide nisindemti titut yam binyohou jide ningon jo nyahan mem yamti leu binhyepo jibinyohou nibicom yam nok gomti di Allah Ninnei yai bije.

⁴ Ibicom yam nok ningut gom ngat he. Allah Ninnei cem gom ngat he. Ba, Allah dimig je ei leu binhyepo jiyok jingon mem mun nyeng gom ngat he.

⁵ Ba, Tuhan gom ngat he. Puig di bie ndam niba ningon com Tuhanti gom ngat he. Nyeni igyai dimigyam tug hon tungwagom ngat he ninyeng.

⁶ Allah gom ngat he ba, Noni ne Icig rin bininyeng tak kep nyeni yahagom. Noni yai kep Nide midyai nya tug hon nyeni bipingok ei yahagom ingonti.

⁷ Bibikwop nyeni yahagom igyai nisindemti hi gom hi gom bit leu Kristus yai binyeti.

⁸ Allah nihyet pai a, Tirigi Noni kui ug ei ginyo kug ne Noni buwak yo di isima nya imang bibor bibit Noni leu api njei nisindemti nya bak tungwatu nya.

⁹ Srat bokti dima pai “Noni kui” lene gini ndo tut bipia Noni juk kwei ei mpia di jo bijehei bibor ei dihyeisi dini nipou su.

¹⁰ No di juk kwei dima noyam kin No di kui binjiriek mpia di jo anai bibor ei mpia-bbed him leu binhyepo ningat rin bidem ei Allah nipai testi hagom.

¹¹ Kristus rima njei nisindemti nya bak tungwatu nya. Noni ta yo di igya kui Noni kin nabi nya kin yo di itri tut Nihyet Di Kei kin gembala nya kin guru nya cem.

¹² Noni ta yo dini yahagom ba, bitin ei Nide limwa nya mem gima igyai igbit Nide midyai nya di ibindei Kristus ningut mahan.

¹³ Tug hon nisinati dima lene nyeni ibicom yam nok gom tug hon ide niba ningon comti kin ide ningon di dor niti tut Allah Nipmot noyam. Apino imahan tug hon ide niba ningon com Kristusti bikum eisi sindam bibou ikei-kau-kei noyam kin Noni.

¹⁴ Leu api inok munggwom nya bu bi. Lewo munggwom nya inok ut mien di mbut ariwace bibit muk di tti kin hou di ttem yok drek dip yo di ingon mang ide ningginausi. Yo dima icom biei mpup ris tungwatu bibindei srawir yok.

¹⁵ Noro ma nyeni ide ningon ngakei yamti bindei ba, ipai mingat biyam. Tug hon nisinati dima ne imahan bikum eisi sindam bibou ikei-kau-kei noyam kin Kristus di nok nibou mem nyeni.

¹⁶ Kristus nipingokti bindei ba, nimbumbati di ter leu yam hagom bicim tindei yam ba, nituti nya gom-gom bikrau yam nok gom. Gima rino gino bikwop nimbumbati yai igbit niyai kepti lene ningut titut mahan bikum ei nisindemti tug hon ningon ngakei yamti.

Ningginausi tut niyaijo nijep ei Kristusti

¹⁷ Gima rino diba Tuhan ninyeng bisok kep je bipia ma jiyai munti nya noyam kin yo di ingon tindur nya igyai munti nya au. Lewo ingon kanti nya bon ninyeng bi ba,

¹⁸ ingon tindur mpung tut nidinditi. Yoni inggre kin niyaijo nijep di Allah yai binye bi lewo ingon dorti tut mun di bitut Noni bi ba, ingkek ndok.

¹⁹ Bit bon immai sut igyai kepti di kinei bibor nya kan bi. Noro ibit ingut kanti di kinei nya ba, iba yoho rok sisar di mpiei hagom. Bit bon yoom ingon tut gima kan bi.

²⁰ Mun dima yok ntun jide ningon dorti tut Kristusti him bi!

²¹ Jimiap tut Yesus bijibit nihyet tu lene jiyai nipingok jeti tut Allah ningon mien paisi di ntun Yesus ningonti him dima cem tu!

²² Gima rino ma jipas niyaijo nitimiei bitut niyai kepti nitimiei nya leu je nok sinsun di rik-ta. Lewo jingut kanti di ntun dihyeisi di kinei dini him bindei ba, jiyaijo nitimiei timek bingwig.

²³ Ma jisindui sut ba, Allah bindei jenti njem titut nijep bu.

²⁴ Ma jiba jide niyaijo nijepti di Allah pai tes di dat Noniti nimbai dima bijuk je nok sinsun. Leu api jingon gom tut Allah kin jide ningon sren kin jingon kwes kin Allah hagom mintun jingon mien paisi him.

²⁵ Gima rino ma jibicum bu au! Noro ma yo di ingon jo kep nya yahagom iba ingon gom bimbrap bit yam. Lewo yahagom inggre kin Kristus ninguda.

²⁶ Gino jingon sibui sut tungwagom lene ma jisindui sut jide ningon sibuisi dima bindei bijicut ug ei sisarti au. Ma jikes hon ba, jingon sibui kikau ug bipek mmun kep au.

²⁷ Tug hon nisinati dima ne jibon nituti kin nikwesti mem Bilis bi.

²⁸ Ma ninggimang kep mun cig kes hon binggimang bu au. Noro ma kinyon ei midyai di kei bibor nyati biyai leu binhyepo ba ningon di sren bitug ndei nimuhup ba, bingondut nuhui mbum nya.

²⁹ Gino jimbrap bit yam lene ma jiba jihyet di kinei bimbrap bit yam au. Noro ma jiba jingon di nggriu sut yam bimbrap bit yam leu binhyepo jibiwin kep yam ngonti bijibimpu yam. Tug hon nisinati dima ne jihyet misindem tut yo di imiap kep nya.

³⁰ Ma jibindei ba, Allah Ninnei ningon pus tut je au. Lewo Allah ba Ninnei dima bitak buk kep je nok bindo di bindo bipia nyeng tut je binyohou je kikau bibou Njap Nikwek Jeti dem ug e.

³¹ Ma jikes hon ba, jingon koi kep yam bijingon sibui sut yam au. Lene ma jigga yam ba, jiliriem yam bijipai yam nghapti ba, jipu juhui tut yam cem bu au.

³² Noro ma jingon nggriu sut yam bijibaningondut yam bijiba ningondut yamti bihati tut yam cem jingon nggriu sut yam ba, jikos ser sisar di jibon di bitut yam biyam cem bit leu nok Allah kos ser jide sisar tug hon Kristus tu.