EFESUS 2 - ALLAH NIHYET MEM TUNGWATU NYA

Allah bindei ba, igyaijo nok gom kin Kristus

¹ Nipou ne mun di bitut jinnei mai su lewo jibit Allah nicukti nya bi bijibon kep sisar.

² Mpe dima lene jibit-bit nyen niyai kepti di kinei di ntun dihyeisi dini him nya kin nibou ndig di ninyeng tak kep nisindemti nya ei mpia-bbed him. No dima ne ninnei di pingok ei yo di ibit Allah nihyet bi nya ingonti ri.

³ Nipou ne yahagom inok yo dima. Igyai munti nya bit leu ingut kanti di ntun dihyeisi dini him ba, ingut kanti dima kin ingon kanti yuubon nye nok awaga. Mpe dima lene nyeni ne tungwatu di itug ndei hukum leu Allah rin noyam kin yo di hiter yahagom.

⁴ Noro Allah De ningon ngakei tungwatu nyati di nindig bibor bindei ba, ningon nggriu sut nye bibor!

⁵ Tirigi mun di bitut innei mai drek dip gi itunggwei sut Allah nihyet lene Noni win nye hanyen leu imai eisi ndam niyaijo nijep noyam kin Kristus. Gima rino jiyai niteu leu sisarti kin niyaijo nijepti tug hon Allah di singat tut je.

⁶ Allah win nye leu imai eisi bit Kristus Yesus lewo inok gom kin Noni leu binhyepo inyeng mitak kep mun nyeng hagom bit Noni ei gwamti.

⁷ Allah yai mun dini leu binhyepo hon kep ammani kui kikau ug bipek nijam di nidipti bu lene Noni ndo tut ningon ngakei nyeti di mindur bibor ba, tungwatu nya ingat bou igyai him. Ba, Noni ndo ningon ngakei nyeti dima tug hon Nide nisingat tut nyeti drek dip Kristus Yesus di ya hacan mem nye.

^8-9 Jide niba ningon com Kristusti bindei ba, jiyai niteu leu sisarti kin niyaijo nijep tug hon Allah nisingat tut jeti. Jitug ndei niteu leu sisarti tug hon jiyai munti nya bi noro tug hon Allah nisingat tut jeti leu binhyepo bit bon hi ningon jei sut nonti drek dip niyai munti nya kan bi.

¹⁰ Allah bon nyeni bou ninda him leu binhyepo igyai kep midyai di kei bibor nya tug hon ide ninok gom kin Kristus Yesusti. Ba, Noni tin ei midyai di kei bibor dima nipou su leu binhyepo igyai kep midyai dima.

Kristus bindei ba, yo di ingon jo kep nya yahagom inok gom

¹¹ Disut bat je di ngkiai nya e, ma jiyok ngon kep mun di cut igkep je nipou su nya. Mpe dima lene mben Yahudi di ibidip huk midut sunat di igyai su nya ipai sut je “yo di ibit midut sunat bi” nya ri. (Gini bitut midut neet pinai nya ingkek kulup bit leu Musa nicuk yoti.)

¹² Mpe dima lene jinok gom kin Kristus bi. Jeni ne ngkiai nya di inggre kin Allah de limwa nya bi ri. Jipriet kin gi preu di Allah ba neheng bipreu ei mem Nide limwa nya cem bi. Leu gi po jiyaijo ei dihyeisi dini lo, jingon cut leu mun di jiyok jingon mem bijiba jingon srip huk tut Allah bi.

¹³ Nipou ne jingat rin ei minu ting leu Allah noro tini bu ne Kristus nimai ei biei salibti bindei ba, jidideu Allah tug hon gi jinok gom kin Kristus Yesus tu.

¹⁴ Lewo Kristus Nonti bakei nyeti tirigi Noni bindei ba, mben Yahudi kin ngkiai nya inok gom. Kristus ba nimai ei biei salibti binggek tut ngug tig di bikwas yok leu yam di bindei di iba nitok biyam.

¹⁵ Noni ciu ser Puig Yahudi niggai serti nya bitut nidimig sutti nya kin nikos tutti nya leu binhyepo ba mben Yahudi kin ngkiai nya bicom yam nok Nide limwa di nijep bu di inok gom kin Noni. Tug hon nisinati dima ne Noni bakei yokti.

¹⁶ Kristus nggek tut ide niba nitok biyamti leu lene ba nye bisok yam nok gom tug hon nimai ei biei salibti. Tug hon nisinati dima lene Noni yai yo dima ingon kwes kin Allah hanyen.

¹⁷ Tut gima rino Kristus kwei tri tut Nihyet Di Kei di bindei ba, tungwatu nya igyai ingon di kwes kin Allah bak tungwatu yahagom. Bak je di ngkiai nya di jingat rin ei minu ting leu Noni kin mben Yahudi di ingat rin dideu Noni.

¹⁸ Nye di mben Yahudi kin ngkiai nya yahagom iba Allah Ninnei gom ndia biya ei Noho bei tug hon Kristus di ya hacan mem nye.

¹⁹ Gima rino je di ngkiai nya jinok ngkiai nya bijinok yo di igya nisai bu bi. Noro jinggre kin Allah de limwa nya ba, jimbier kim Noni.

²⁰ Allah ba je di jinok ighyei bingot kin nikiou di yo di igya kui Yesus kin nabi nya iprion ei Kristus Yesus di tereu nok tig mma di bon ninyeng ri.

²¹ Noni nyohou dimig ig dima titut yam bicim tindei yam nok gom bikum eisi nindig bibor nok Allah De Ig di tungwatu nya ipiga pijum ei mem Tuhan.

²² Kristus ba jeni kin nindigsi di inok gom kin Noni jahagom bingot ig ningat gom mem Allah di ba Ninnei bibong ser.