AYUB 19 - ALLAH NIHYET MEM TUNGWATU NYA

Ayub buhup yo di iba ighyet yai noni

^1-2 Lene Ayub buhup “Nggon rino jiba jihyet yai da bijiba mun di tibim ei juhui him bihwen bit da kikau i?

³ Jihyet di tigut kikep dani kin jihyet di wer mpiahi tut da bindo bipia jimmai sut jenti bi.

⁴ Nok gino diyai mun di tunggwei hi rin lo, gima ne mun di diyai tunggwei sut jeni rin bi.

⁵ Jikan bipia jiyaijoti wer kei dor njiriek diyaijoti e? Jikan bipia mun di cut igkep da bindo bipia dingon mui e?

⁶ Ningat ne Allah bibon da nok gini. Noni ndin bon bibisrou da.

⁷ Disrep tut ningon di mbuk tut da lo, hi ngig nitingou mem dihyet bi. Disuar hi dima gwam nok nikei di kos tut ditde munhyet noro tungwatu nya yahagom itingou ndok ser dihyet.

⁸ Allah srin ser puig apino bit bon dikriau srin dima kan bi. Noni bindei ba, nidinditi nggai kep ditde puigya.

⁹ Noni pos mun di dinyeng tut nya hagom bingwig leu da leu api om dinyeng di kei cem.

¹⁰ Noni bui kikep da ei dite hi ei dite hi. Noni hom mun di diyok dingon mem nya hagom dem kep nok no di hom njita kioi tut nigau nya bikes ei ba, jei bi ne mui ri.

¹¹ Allah ningon sibui sut da ba, bibon da nok Nide siceu di sibut bibor.

¹² Noni cuk Nide tentara kwei leu binhyepo ihwen da sindem bibor. Isrin ser dimbutti bigyon ttai ditde prak meng.

¹³ Allah bindei ba, dikindig bat-dikinjoi bat nya yahagom imbres yonti leu da lene disut bat nya yahagom ikan bipia dani ne ngkiai.

¹⁴ Dide bat nya kin dingon kieti nya yahagom yoom yo leu da ba, ingon prion ser da.

¹⁵ Yo di dicigit yok kui ig pima yahagom ibbwe ser da tu. Ditde sop awak nya ibibon da nok ibibon ngkiai.

¹⁶ Tirigi dihig awak gom kwei lene noni buhup dihyet bi. Mbro nok gino ditigtai noni bikwei mpu da lo, miap da bi.

¹⁷ Tirigi dihi dinnei ne mpiei bibor ei ditnem nuhwap nsi. Dikindig bat-dikinjoi bat nya yoom yo leu da bikriau da.

¹⁸ Tirigi dikiju bidiya-ya nyen ne munggwom nya di ingat da iba da bikek.

¹⁹ Tirigi disut bat di ningon ce yam bi nya ingig igyai kep da lene idigit tut. Yo di dingon ngakei yok dor njiriek nindigsi nya iba ingha bak dani.

²⁰ Dinggang bai ba, dikinei-kinau lene diduhug-duhug nyen ba, nahanok ma dinnei kimbas bidimai ninno.

²¹ He disut bat jen! Ma jingondut da o! Lewo Allah ba ninda bibui da.

²² Allah om da lo, nggon rima jeni cem jiyai bram niyaisi i? Jihwen bit da nok gi dem bigyo e?

²³ Handei kon tungwagom mipas kep tut dihyet dini ei srat gomti leu binhyepo igyok ngon kep hagom kikau.

²⁴ Handei kon hi ba ngkimom nitu kilis dihyet ei tig mma dip leu binhyepo hagom jo ninno bipror yon hanyen kan bi.

²⁵ Dikan tut bipia No Di Mbrap Gau da no rinaha ei gwamti. Noni mikwei mem njap ningwig honti bimbrap gau da ei dihyeisi dini.

²⁶ Mbro nok gino dingkek dip bok-ba ba, nggos cem lo, midingat Allah bou diyai him mem nijam di dibon dingut dini.

²⁷ Midingat Noni bou diyai him ba, Noni ne dingon kieti ri. Dingon kinei bibor lewo jinggok puig mem gima,

²⁸ jihwen bit da bijinjei kep da. Jinggok ser mun di jisu tindei mem gima jihwen da drek dip.

²⁹ Noro tini bu ne ma jidigit tut Allah de ningon di sibui sut sisarti lewo Noni mimem ninghat tut Nide singau simeda! Gima hagom nok leu binhyepo jiyok ngon kep bipia Allah migwam nok nikei mem tungwatu nya.”