AYUB 18 - ALLAH NIHYET MEM TUNGWATU NYA

Bildad buhup Ayub nihyet hanyen

^1-2 Leu api Bildad buhup “Ayub e, apig bu api akes ahyet ba, ambrap bu bi i? Gino agwam nyahan ba, amiap kep nyeni nihyet lene bon ipai ighyet biyam kan.

³ Nggon rino akan bipia nyeni ningon mbum ba, ninok mindhe-ndhe i?

⁴ Ade niggati dima bindei ba, angon sibui apino atug ndei ninghuisi wei. Suar dihyeisi dini bitut tungwatu di ibong niti nya isar hak ba, nungug nya son leu nijoti lene gima bindei ba, angon cut hon e?

⁵ Mbro nok gima lo, hi mimu tungwatu di isibut nya ide mini njeng. Yo di isibut nya ide mini minjeng hanyen bi sren.

⁶ Ninjeng di piga ei yo di isibut ide prak mengti midindi ba, mini njeng di piga digai ninsi ninjeng mipiga bu bi.

⁷ Nintig tti-tti nyen leu ba, gi mbut sindem bu bi. Nide nipingokti bindei ba, ndrat mpia bicut.

⁸ Noni mbut nimbutti lo, co jalati bisrou nimig.

⁹ Bon di jo nding ei susti srou nimig mbuk bikat noni bingkiem.

¹⁰ Iku bon di kat nimig nyahan ei susti ba, ikim bon ser puig di mbut kak.

¹¹ Mun di biyai ningon di digit jo nding bijo ttai no di sibut ba, mun di biyai ningon di ttin bit-bit nyen no bidem nimbutti nya.

¹² Nipou yo ne noni sindem noro tini bu ne ninggum hwen ba, mun di buhun jem nisut bit noni tirima-tirima.

¹³ Ninggwenti di bindei nimai yem ningkek leu lene nuom kui ninda pang kin nimigti ba, mpiei cem.

¹⁴ Nimai kat noni bibrim noni leu nide prak meng di bong kei gwam kei ei niti. Leu api ug biya um no di ninyeng tak kep minu nimai nya ide.

¹⁵ Tini bu ne hiter bong ser nide prak meng nsi lene niabiati iba aspal ngei bigimahap mpia dima ba, ibidip tut no di nggwen nibongti.

¹⁶ Nigau nya hagom ningei dek leu ba, njui-juau. Ninda nya hagom mui bingwig kikau ug bipek ninggrupti.

¹⁷ Ninyeng di jei cut hak leu noni ei nitimieisi kin ningkiaisi cem. Hi dima yok ngon kep ninyeng cem bu bi.

¹⁸ Ijji noni leu nipigati ug ei nidinditi ba, icok tut noni leu dihyei di yo di igyaijo nya ide hak.

¹⁹ No dima yai nimunggwom bat nya kin nide nintun him yamti di bram yam nya hi bi ba, tungwagom ngat cem ningat rin ei nidihyei bi.

²⁰ Yo di ibong nite bei mpia nicutti kin nite bei mpia nipriti imiap tut mun di cut igkep noni lene yahagom idigit tut ba, inghuisi mpig sut cem.

²¹ Nibirop Hanyen Cig mibindei cut mun dima ei yo di isibut nya dip drek dip gi ikuk yok bak bibit Allah nihyet bi.”