AYUB 17 - ALLAH NIHYET MEM TUNGWATU NYA

¹ Diyaijo ningwig honti dideu su. Jei bi ne dinnei kimbas. Jui ngwak rijo mem da tu.

² Tungwatu nya ibibon da nok no di iba ighyet bicig. Dimiap kep ide nipai mun singgre dati cem.

³ Allah e, dingon sren. Ma aba angon com dihyet! Tou bu rima usap dihyet dima i?

⁴ Abindei ba, ingonti ndok apino ingon huk niti bi a. Tini bu ne ma asindui sut ba, ibindei timek da au.

⁵ Bit leu nihyet nibiti nindati di pai bipia tungwagom bakilak nisut bat nya mem biyai mitiei lene nonti nimunggwom bat nya mibiang icig niyai munti dima nibuhunti.

⁶ Tini bu ne tungwatu nya iba nihyet nibiti nindati dima bipai singgre da. Lene itrai diimaisi drek dip.

⁷ Dipimti bindei bidiyai mmui cem ditta cut ba, dikinei-kinau cem.

⁸ Yo di ipai sut yonti bipia ingon sren nya idigit tut binggap leu da. Yo di ibon mun tunggwei bi nya ikan bipia diba dingon com Allah bi.

⁹ Yo di ipai sut yonti bipia isingat kei ba, ibon mun di igbit nya ingon hukti bipia igyai munti bipwoi Allah ningon bikum eisi kikau ba, iji ngkiem tut.

¹⁰ Noro gino yahagom ikwei ya doho bei ne bit bon digingat igom di ningon ki kan bi.

¹¹ Ditde njap nya njiriek bipror leu da tu ba, dingon kanti di ditin ei su nya hagom cut bitimek tu. Mimun di dipwoi ei dingonti nya cem hagom pren hanyen leu da tu.

¹² Noro disut bat nya ipai bipia mmun ne njap ri. Nidinditi no jo binggai da lo, ipai bipia mbigom ne nipigati tau ri.

¹³ Ba, dingon ya mem gima duug ei minu nimai nya ide. Midibong mai ei nidinditi ei mpia dima.

¹⁴ Midijem dijui ‘Nani ne dicig ri.’ Midijem njingwoi di ipio dingut nya ‘Jeni ne dipmem kin dikwohop bat nya ri.’

¹⁵ Diyok dingon mem mindei ngan i? Tou ringat nijam ningon nggei-hi-nggeisi di jo mem da ei nidipti i?

¹⁶ Tirigi dijuk ug ei minu nimai nya ide lene ditde niba dingon comti mibit da ug ei mpia dima.”