AMOS 9 - ALLAH NIHYET MEM TUNGWATU NYA

Ningat-hi-ngat tut hukum di kwei leu tuhan

¹ Dingat lo, tuhan ya kui nimbar hum dok bipai “Ma abui Ditde Ig nidihim ninggrupti nya tignam bibor ba, abindei nikiou ugwa-kwei. Abindei ba, nidihim nya ttek bicut ug ei dihyeisi mu bitot tungwatu nya ibou nggram him. Midibindei ba, tungwatu nindigsi di imai bi nya itug ndei nimai tug hon pran di cut igkep yok. Bit bon hi nang leu biningwes ngun kan bi.

² Mbro nok gino itig jui di jut bibor biku yonti kikau ug ei gumihyep nimai nya ide lo, midikat yok. Mbro nok gino ikui ug ei mpia-bbed him lo, midibindei juk yok hanyen kwei.

³ Mbro nok gino iku yo nyahan ei Nungug Karmel nimbigdip anai bibor lo, midinggok ser yok bidikat yok. Mbro nok gino iku yo nyahan ei muk jou lo, midicuk naga di bong muk ngeisi ba, ham yok.

⁴ Gino ide siceu nya ikat yok ug ei ingkiaisi ne midibindei ba, igyai nimai biyok. Dita dibou ei gima dibindei timek yok bingwigti lene dimpu yok bi.”

⁵ tuhan Di Ninyeng Jei Bibor ba, Sindem Bibor cem ngget dihyeisi dini bibindei ba, ugwa-kwei lene biyai ba, timiei dihyeisi dini yahagom ingon buhun bibor. Dihyeisi dini titut yam dwoi bisri hanyen noyam kin Minyei Nil di dwoi lene sri hanyen.

⁶ tuhan ngot Nide ig anai bibor ei mpia-bbed him. Noni pek mpia-bbed him ei anai leu dihyeisi dini noyam kin niban lene siber muk ngei ug ei mam bei. No di yai midyai dini hagom ninyeng rino tuhan!

⁷ tuhan pai “Je di mben Israel e, dehek tut mben Sudan noyam kin gi dehek tut jeni. Dibuwak mben Filistin kwei leu Mios Kreta lene midibuwak mben Siria kwei leu minu Kir noyam kin gi dibuwak je kwei leu minu Mesir.

⁸ Da di tuhan Di Dinyeng Jei Bibor diyok diyai kep je di mben Israel di jibon sisar leu api midibindei ba, jitimek bijingwig leu dihyei njek dip. Noro dibindei ba, yo di intun Yakub him yahagom imai bingwig bi. Da di tuhan disimbot dat tu.

⁹ Midicuk siceu nya leu api icig je di mben Israel noyam kin no di ba kawanggai bicig gandum ngan. Lene mem gima dibicut mun di bon ninyeng bi nya hagom bingwig leu jikieti lene midimpu je ei ngkiai nya inggreti.

¹⁰ Ditde limwa nya di ibon kep sisar ipai biyam ‘Allah misindui sut ba, mun di buhun bibor micut igkep nye bi.’ Noro ningat ne yoni mitug ndei nimai ei pranti.”

Allah mipindi mben Israel ei nidipti bu

¹¹ tuhan pai “Ei nidipti bu ne midipindi Daud ninyeng tak kepti di tti tu di noyam kin ig di nggun ba, kei hanyen. Dikinding ngug tig di krop ttai minu dima binoyam kin ngug tig gi nitimiei hanyen.

¹² Mben Israel inyeng mitak kep minu Edom nikenti lene inyeng bitak kep minu di nipou yo dinyeng tak kep tug hon Ditde nisindemti hagom. tuhan di bindei ba, mun dini yok hagom pek kep mem yok simbot dat tu.”

¹³ tuhan pai “Ei nidipti bu ne nijam di biang ninnum keisi mibindei ba, gandum ngat ningat didiyam. Nipou tirigi ikos gandum nintam di len bigyo ne nikioi mikieng hanyen eisi. Nipou tirigi ikimut ba anggur ngat ei mun di ibikimut ningat eisi bingwig bigyo lene hiter mibiang ningat hi kin bu kwei lene nok gima bijo ninno bijo kikau. Ba anggur ngei mitinnim kwei leu nungug him nya bibiam kwei leu nungug tou nya cem.

¹⁴ Midipindi Ditde limwa nya ba, ibong kei igwam kei hanyen. Yoni miwin ide minu di tti tu nya bibong ser ide ig cem. Ita ba anggur nghousi bidut ningei lene igyai miai leu api ipuk ningat bigyem kep inggum hanyen bu.

¹⁵ Midikes Ditde limwa nya hanyen ei itimieisi di diyai biyok nipou su lene bit bon hi hom yok hanyen kan bi. Da di tuhan di jide Allah disimbot dat tu.”