AMOS 8 - ALLAH NIHYET MEM TUNGWATU NYA

Amos ngat ningat-hi-ngat tut biei ngat ei bansiti

¹ tuhan Di Ninyeng Jei Bibor bindei ba, dingat ningat-hi-ngat gom kin bu. Dingat bansi gom bitut biei ngat di nggwop kei joti.

² tuhan hig ser da “Amos e, angat mindei i?” Dibuhup “Dingat bansi gom di biei ngat di nggwop kei joti.” Noni pai bida “Tto bou dem mem Ditde limwa mben Israel tu. Diluei dingonti tut hukum di dikes ei yok dip bu bi.

³ Nipou ne tungwatu nya ipai doia ei nibou ndig de ig di kei bibor kei noro tirigi tto bou dima dem ne yahagom ipim bibikiek nimai. Tungwatu nya yoom yo nyahan tut nimai ngut nya bicom-com wai ei nisai bikui sur mpia.”

Mben Israel itug ndei hukum

⁴ Je dino jico kep yo di yuhui mbum bijibindei ba, imai bingwig ei minu dini e, ma jingig jitingou mem dihyet!

⁵ Jikan “Bit bon sibet singon mem pesta di sibon kep njap ndig Bed Jep ningwigsi kan bi. Lewo singon pri tut nituti mem sitri side gandum ba, sibipek mitiei hanyen. Njap nigwam kep ninghuisi cem apig api tun i? Gino tun tu ne sikinyon ei gi sitri mun bisibipek mitiei hanyen. Mpe dima lene sibindei ba, ndigban nibok kak bibor ba, siba kilo nitrowai binai gandum nibuhunti leu binhyepo siris mun bak yo di ikwei pek ndiyok leu sa.

⁶ Misitri gandum di muhum sui kin nibok di kak bibor. Singgok no di nuhui mbum kin no di nuhwap mbum di bit bon ikum ningwam di idahat di nimangti dem sandal can nibok kan bi leu api misiba mitiei biwim yok nok awaga.”

⁷ tuhan di mben Israel ide Allah pai tug hon neheng “Dingon prion ser igyai munti di mbuk bibor dima bi sren.

⁸ Dihyeisi dini mugwa-kwei bibindei ba, tungwatu nya yahagom ingon buhun bibor. Dihyei mun brim bidem minu dini nisurti-nipekti ba, ninjek dip noyam kin Minyei Nil di ugwa-kwei.

⁹ Jei bi ne tto bou dem mem dibindei ba, mpia njap kimbas ei mpia nuhuk pijumti rin ba, mmun ken nggai dihyeisi dini mem mpia njap yo ug ri. Da di tuhan Di Dinyeng Jei Bibor disimbot dat tu.

¹⁰ Midibindei ba, pesta di jibon kep jide njap nindig minoyam kin njap di jingon ngguk tut nimai ba, doia di jiba jingon di llei bipai minoyam kin yo di ipim kep nimai ighyet. Mijikak jibou bijijuk sinsun kron di bindo tut jingon di ngguk bijinok andigpoi kin nitnem di ingon ngguk bram ipmot di nimig gom ngat. Mun di cut igkep je mem njap dima hagom mibindei ba, jingon ngguk bibor.”

¹¹ tuhan Di Ninyeng Jei Bibor pai “Jei bi ne tto bou dem mem diba ninggum di buhun bibor bihwen yok. Tungwatu nya minggum noro inggum tut njita bi. Inggobiau noro inggobiau sut minyei bi. Yoni inggum ba, inggobiau cem tut nihyet di tibim ei duhui him.

¹² Tungwatu nya migya leu nite bei mpia nijjai kikau bipek kin nite bei mpia nibiho lene igya leu nite bei mpia nipriti kikau bipek kin nite bei mpia nicutti cem binggok ser nihyet di tibim ei duhui him. Noro imiap nihyet dima hi bi.

¹³ Mpe dima lene pinai pilei kin sop gwam nitta pilei di inghuisi kwes nya mimbris tut inggobiau.

¹⁴ Yo di yeheng bitug hon mben Samaria ide kwar nya bipai ‘Deheng bitug hon keret Dan ide kwar’ e he ipai ‘Deheng bitug hon mben Bersyeba ide kwar’ e yahagom micut bihigom bikiju hanyen bi sren.”