AMOS 7 - ALLAH NIHYET MEM TUNGWATU NYA

NINGAT-HI-NGAT TUT HUKUM LEU TUHAN Amos ngat ningat-hi-ngat tut hai ceng nya

¹ Mpe di gom bu ne tuhan Di Ninyeng Jei Bibor bindei ba, dingat ningat-hi-ngat gom. Dingat lo, niabiati tungwatu nya ilen minta kwei mem nibou ndig lene tuhan pai tes hai ceng ningot ndig tirigi minta nikioi hei hanyen bu.

² Dingat lo, hai ceng nya igyem mun di ngun bikwop ninyeng hagom ei minu dima leu api dipai biNoni “tuhan Di Ninyeng Jei Bibor e, ma akos ser Ade limwa nya ide sisar! Lewo imien ba, inghuisi wei bibor cem. Notou ingwes ngun i?”

³ Lene tuhan luei ningonti bipai “Mun di angat dima micut igkep yok bi.”

Amos ngat ningat-hi-ngat tut hum

⁴ tuhan Di Ninyeng Jei Bibor bindei ba, dingat ningat-hi-ngat gom kin bu. Dingat lo, Noni tin ei mem gima ba hukum bikes hum ei Nide limwa nya dip. Hum dima sror biyem muk ngeisi ei dihyei jou bibie leu api sindi sror biyem dihyei ninjek dip cem.

⁵ Lene dipai “Cobi! tuhan e, ma abindei ba, hum kes hon bisror bu au! Lewo Ade limwa nya isindem bi ba, inghuisi wei bibor cem. Notou ingwes ngun i?”

⁶ Lene tuhan luei ningonti bipai “Mun di angat dima cem micut igkep yok bi.”

Amos ngat ningat-hi-ngat tut kuk di ibinai nipijumti

⁷ tuhan Di Ninyeng Jei Bibor bindei ba, dingat ningat-hi-ngat gom kin bu. Dingat lo, Noni ya kui dring di itap di iba kuk nai tut mun di huk pijum kei binai. Noni krau kuk nai tut mun di huk pijum kei dima ei nindati,

⁸ bihig ser da “Amos e, angat mindei i?” Dibuhup “Dingat kuk di ibinai nipijumti.” Lene Noni pai bida “Diba kuk dini biki Ditde limwa nya ingon lewo inoyam kin dring di pijum kei dini bi. Midiluei dingonti tut hukum di dikes ei yok dip bu bi.

⁹ Midibindei sar gumihyep di Ishak de nintun him yamti di bram yam nya ingkwei-ngkwei nyen kep mem gima ibon midut eisi nya. Mben Israel ide gumihyep di kwes-kwau nya mitti bingwig. Midicok tut yo di intun nibou ndig Yerobeam him yahagom.”

Amos buhup Amazia nipai kep noti

¹⁰ Amazia di nok imam ei minu ndig Betel sok nihyet bak Nibou Ndig Yerobeam di ninyeng tak kep mben Israel bipai “Amos kin ade limwa nya yuhum yam nsi mem na di Andigpoi. Noni ba nihyet di tri tut bikes ningon bak ade limwa nya leu api bindei ba, minu dini timek bingwig.

¹¹ Noni pai bipia na di Andigpoi mporo akon pran bit ade siceu nya leu api atug ndei nimai apino siceu dima yok mikat mben Israel bikri yok ug ei ingkiaisi.”

¹² Amazia pai bak Amos “He na di nabi e, ma angkwei hanyen ug ei minu Yehuda ba, atri tut ahyet ei minu dima! Ma asindui sut yo dima ba, igyai amuhup bina!

¹³ Ma atri tut ahyet ei minu ndig Betel bu au. Lewo nibou ndig bet minu ndig dini ei mem nonti ba, gini ne nibousi mem noni kin nide limwa nya dima ikuk yok eisi ri.”

¹⁴ Amos buhup “Dani ne no di nabi di ditri tut dihyet rin lo, diyok dingon mem gima dibiyai dimuhup bi. Dani ne no di gembala kin no di nyohou biei ara cem ri.

¹⁵ Noro tuhan yai da leu ditde midyai nok gembala leu api cuk da leu binhyepo duug tri tut nihyet bak Nide limwa di mben Israel.

¹⁶ Gima rino ma angig atingou mem nihyet di tuhan pai bina. Apai bipia suar di kes hon biditri tut dihyet ba, dibinggek mben Israel au.

¹⁷ Gima rino tuhan pai bina di Amazia atnem minok sop di nibou buwei di hwou-hwou nyen bidem simpak ei minu dini. Amunggwom bat nya mitug ndei nimai ei pranti ba, ade siceu nya mikwas ade minu dini tut yam. Mporo nanti ayaijoti ug hon nohonti ei angkiaisi. Leu api siceu nya mikat mben Israel bikri yok ug ei ingkiaisi ei ting bibor leu itimieisi.”