AMOS 4 - ALLAH NIHYET MEM TUNGWATU NYA

¹ Je di sop timiei minu Samaria e, jimiap kep dihyet! Jinoyam kin sapi Basan niwek di pap-nap kei! Jico kep yo di inghuisi jet bijipos ndiyok leu yo di yuhui mbum nya lene jicuk jijjep bat nya bitin ei pes di jidut kikep mem je cem!

² Da di tuhan Di Dinyeng Jei ne tuhan kwes-kwau rin ba, dipreu ei mem je tu bipia ‘Jei bi ne jide siceu nya miba ngkimom koisi kin simper bikri bibikwop jahagom ug ei jingkiaisi.

³ Yoni mikri je kak ngug tig di lus tu ninggreti di dideu je kikau ug ndam nungug Hermon. Da di tuhan disimbot dat tu.’ ”

Mben Israel ingkek ndok

⁴ tuhan Di Ninyeng Jei Bibor pai “Je di mben Israel e, nnaba jimbut ug ei gumihyep di jikuk je biDa eisi ei minu ndig Betel hak ug leu api ma jibon kep jide sisar ei sirima! Nnaba juug ei hanjop Gilgal bijibrim jingkek mem sisar ei mpia dima cem hak ug! Nnaba jijem mindhe-ndhe kwei mem jide midut nya bikwop njap tekti lene ma jipwoi mun di jikwas tut Da gom leu ningot gom lene nok mbigom mem njap nitindur ningai hak ug.

⁵ Nnaba jikwas roti nok mun di jibikuk je biDa tirigi jipai sigyo hanyen tut Da hak ug. Nnaba jinsi bbet tut gi jipai mijikum ei mun di jibikuk je biDati hak ug. Jo nibreisi bipia jingon llei sut jide midyai dima!

⁶ Dani rino dibindei di ninggum nindig bibor hwen bidem jide minu ndig nya hagom. Noro ninggum dima bindei ba, jigingkwei hanyen ndam Da bi.

⁷ Dani rino dipai ser di mpia but bi tirigi bed di biang mpia ngei pijuk jide njita kioi ei beisi nya. Dibindei ba, biget but ei minu ndig hi lene but ei minu ndig hiter bi. Mpia but ei beisi gom lo, beisi hiter bu mui bingwig.

⁸ Timiei nya ei minu ndig hi di ninggobiau hwen yok di inghuisi jet nya induk yam biyuug ei minu hiter lewo iba ingon com bipia minyei bousi biam ei mpia dima noro minyei dima dem mem yahagom idut bi. Mbro nok gima lo, jigingkwei hanyen ndam Da bi.

⁹ Dibindei ba, hou di dut bibor cut kwei lene hai ceng nya ikieng kep beisi kin ba anggur nghousi kin jide biei ara kin biei zaitun ngohousi bibindei ba, hagom timek bingwig. Mbro nok gima lo, jigingkwei hanyen ndam Da bi.

¹⁰ Dibindei ba, nsuwer ajar di buhun bibor noyam kin gi hi di dipinak ug ei minu Mesir pima hwen je. Dibindei ba, jide pinai pilei nya itug ndei nimai ei pranti leu api jide siceu nya ipos jide kuda pran bingwig leu je. Dibindei ba, jide prak meng yati nya mpung tut nimai ngut di mpiei bibor ei jihwap nsi. Mbro nok gima lo, jigingkwei hanyen ndam Da bi.

¹¹ Dibindei ba, jibihi jitug ndei nimai noyam kin mben Sodom kin Gomora di itug ndei nimai. Yo di ingwes ngun leu jikieti nya noyam kin no di nide bat iteu leu ig di hum yem. Mbro nok gima lo, jigingkwei hanyen ndam Da bi.

¹² Gima rino je di mben Israel e, jei bi ne midikes hukum ei jeni dip. Gima rino ma jitin ei mem jiba joho rok hukum di dikes ei jeni dip.”

¹³ tuhan Nonti rino pai tes nungug kin houa. Noni ndo ningon kanti nya bak tungwatu nya. Noni pai tes mpia njap kin bed mmun cem ba, Noni mbut nyen ei mbigdip di jei bibor nya. Ninyeng rino tuhan Di Sindem Bibor.