AMOS 1 - ALLAH NIHYET MEM TUNGWATU NYA

Nitriti

¹ Srat dini tut Amos di nitimieisi leu minu ndig Tekoa. Noni ne gembala di nyohou domba nya ba, noni cem nabi hi ri. Ari bingwam can nipou tirigi dihyei ugwa-kwei nindig bibor bigyo ba, Nibou Ndig Uzia ninyeng tak kep mben Yehuda lene Nibou Ndig Yerobeam di Yoahas nipmot ninyeng tak kep mben Israel leu api Allah mbot kep tut mun di mipek kep mem mben Israel hagom bak Amos.

² Amos pai “tuhan yau-yau nyen kwei leu Nide Mbigdip di Sion. Nihyet di tibim kwei leu minu ndig Yerusalem noyam kin kru di nisu bong di bindei ba, abris nghousi kin minta ei Mbigdip Karmel hagom mui bingwig.”

Allah mikes hukum ei mben di gahai nya dip Siria

³ tuhan pai “Timiei minu ndig Damsyik ibon sisar ninyen leu api ide sisar dima bindei ba, midikes hukum ei yok dip. Lewo iba imbuk bibor bibon mben Gilead.

⁴ Gima rino midipinak hum di cig-cai ug ei Nibou Ndig Hazael de ig nibou ndigti. Hum dima miyem tentara nibousi di igya coi nya di Nibou Ndig Benhadad ngot ba, hagom timek bingwig.

⁵ Midinggek dimbou pmem ei ngug tig di bikrop ttai minu ndig Damsyik nya bidicok tut timiei Mbang Briep Awen bingwig leu itimieisi leu api midikuk nibou ndig mben Bet-Eden bidicug ninyeng di jei leu noni. Midibindei ba, ide siceu nya ikat mben Siria bikri yok kikau ug ei minu Kir.”

Filistin

⁶ tuhan pai “Timiei minu ndig Gaza ibon sisar ninyen. Ide sisar bindei ba, dikes hukum ei yok dip. Lewo ikat timiei minu mien ngot nya bikri yok ug ei ingkiaisi leu api itri yok nok awak bak mben Edom.

⁷ Gima rino midipinak hum di cig-cai ug ei ngug tig di bikrop ttai minu ndig Gaza leu api hum dima miyem ide tentara nibousi di igya coi nya cem.

⁸ Midibindei timek limwa nya kin nibou ndig ei minu ndig Asdod kin Askelon nya bidicug inyeng di jei leu yok. Midikes hukum ei minu ndig Ekron dip leu api mben Filistin nindigsi nya yahagom imai bingwig.”

Tirus

⁹ tuhan pai “Timiei minu ndig Tirus ibon sisar ninyen. Ide sisar bindei ba, dikes hukum ei yok dip. Lewo itunggwei sut nipreu di ipreu kep timiei minu mien nya tut ningon kwes kin yamti bikri yok ug ei ingkiaisi ei Edom.

¹⁰ Gima rino midipinak hum di cig-cai ug ei ngug tig di bikrop ttai minu ndig Tirus leu api hum dima miyem ide tentara nibousi di igya coi nya cem.”

Edom

¹¹ tuhan pai “Timiei minu Edom ibon sisar ninyen. Ide sisar dima bindei ba, dikes hukum ei yok dip. Lewo ingondut ide bat mben Israel bi noro iba ingon di sibui birop biyok tug hon pran di ikon bit yok kikau.

¹² Gima rino midipinak hum di cig-cai ug ei minu ndig Teman leu api hum miyem timiei minu ndig Bozra ide tentara nibousi di igya coi ba, hagom timek bingwig.”

Amon

¹³ tuhan pai “Timiei minu Amon ibon sisar ninyen. Ide sisar bindei ba, dikes hukum ei yok dip. Lewo tirigi ikon pran bit timiei minu Gilead ba, ibipos ide dihyei hanjop nsi hi kin bu leu yok lene israt sop mben Gilead di inghop tu nya ba, inghop tigwau bimai ug.

¹⁴ Gima rino midipinak hum di cig-cai ug ei ngug tig di bikrop ttai minu ndig Raba leu api hum dima miyem ide tentara nibousi di igya coi nya cem. Mpe di tentara nya ighyet sra tut pran ne pran dima dem kep nok sigau di cut a.

¹⁵ Ide siceu nya mikat nibou ndig kin yo di inyeng jei nya yahagom ei minu dima bikri yok ug ei ingkiaisi. Da di tuhan disimbot dat tu.”