Tito 3 - Tüpä Ñe'ëngagwer

Vɨroya va'e kwaita opakatu yuvɨreko

¹ Ko rese emoma'endu'a opakatu oyapo va'e rese mborerekwar gwasu iyavei ambuae mborerekwa-rekwarmi, toyapo tuprɨ mba'e iyavei toyuvɨrekoi mba'e avɨye va'e apo agwä.

² Toñe'ë-ñe'ë tëi eme ambuae ava rese yuvɨreko, toyuvɨrekoi tuprɨ iyavei poroaɨsusa pɨpe, tomboyekwa avei gweko mbegwesa opakatu ava upe yuvɨreko.

³ Esepia yɨpindar yande avei ndayande mba'e kwai ndayande poreroyai; okañɨ va'ekwer tëi yaiko iyavei yaiko mbigwai tëi opakatu mba'e yande remimbotar apo pɨpe. Yaiko mba'e tëi pɨpe yamotare'ɨ̇mbrɨ, yandeyeupe ae-ae yayeamotare'ɨ̇.

⁴ Ipare rumo Tüpä yande Pɨsɨrösar omboyekwa gweko tuprɨsa oporoaɨsusa opakatu ava upe,

⁵ yande pɨsɨrö, nda'ei rumo yande repiapo avɨyesa sui, a'e rumo vɨreko oporoaɨsusa yandeu narä, omoatɨrö iyavei ombopɨasu yande rekokwer Espíritu Maräne'ɨ̇ pɨpe.

⁶ Yande Pɨsɨrösar Jesucristo rupi ombou Espíritu Maräne'ɨ̇ yandeu,

⁷ ipɨpe yande rekoai sui yande renose yande reko ɨ̇vi tuprɨ agwä, oporoaɨsusa pɨpe toipɨsɨ ko tekovesa apɨre'ɨ̇ gwemiarö yuvɨreko oya.

⁸ Aipo ñe'ësa supiete va'e, che aipota eremañekora sese, vɨroya va'eño Tüpä yuvɨreko mba'e apo tuprɨ agwä. Ko evokoiyase mba'e avɨye va'e ite oiporu va'erä opakatu yuvɨreko.

⁹ Ereyepepɨra rumo opakatu ko nungar mba'e sui, ko ñe'ësa araka'endar yepoepɨ tëisa sui, ko ñemoɨrösa iyavei vavasa Moisés porokwaita resendar sui tëi. Evokoi nungar yapoprɨ ndovɨrekoi ete mba'e avɨye va'e.

¹⁰ Oimese ava omboya'o va'e tüpäro pɨpe, eñe'ë yɨpɨndar chupe iyavei ñuvɨrïo yupagwer; nandereroyaise ite, emombo evokoi sui,

¹¹ peikwa itera evokoi ava oyavɨ va'e gwekokwer yepi a'e ae oyemokañɨ va'e oangaipa pɨpe oiko.

Añekosa tuprɨra ava rekokwer eta rese

¹² Che oromondose akoi Artemas ve anise Tíquico ve, eyemongere'ɨ̇ katu ereso va'erä Nicópolis ve che repia agwä, esepia asopota ite apɨtu'u a'eve so'ɨ̇sa va'e rärö.

¹³ Eipɨtɨ̇vɨï nde katugwer rupi mba'e moigätusar Zenas Apolo avei, a'e chupe emondo mba'e semimbotar evokoiyase toyuvɨraso tuprɨ ogwatasa rupi tipane eme mba'e chupe yuvɨreko.

¹⁴ Iyavei ambuae ñe'ësa reroyasar eipe pendar toyembo'e avei yuvɨreko mba'e tuprɨ apo agwä iyavei ava mba'e chupe ipane va'e pɨtɨ̇vɨï agwä, evokoiyase sekokwer avɨye itera yuvɨrekoi.

Ma'endu'asa ipa va'e

¹⁵ Opakatu yuvɨrekoi va'e ko'ave che pɨri omondo oma'endu'asa yuvɨreko ndeu. Iyavei emombe'u che ma'endu'asa yande mborɨpar iporeroya va'e upe. Tüpä taperovasa eipeve opakatu.