Romanos 1 - Tüpä Ñe'ëngagwer

Pablo ma'endu'asa Roma pendar Jesús reroyasar upe

¹ Che Pablo, Jesucristo rembigwai aikwachia ko che ñe'ë peü. Tüpä che poravo Jesús ñe'ë mombe'usar che reko agwä, ñe'ësa poropɨsɨrösa resendar mombe'u agwä.

² Tüpä ni'ä yɨpɨsuive omombe'u uka ko ñe'ësa ava oñe'ë mombe'usar upe Ikwachiaprɨ maräne'ɨ̇ pɨpe araka'e.

³ A'e ñe'ësa Tüpä Ra'ɨrɨ Jesucristo resendar, a'e ava gwekosa pɨpe ite oyesu ou mborerekwar gwasu David suindar;

⁴ okwerayevɨse Espíritu maräne'ɨ̇ pɨpe, a'ese opirätäsa pɨpe omboyekwa tuprɨ ite Tüpä Ra'ɨrɨ gwekosa. A'e ni'ä yande Yar Jesucristo.

⁵ Jesucristo rer pɨpe aiko kurïtëi iñe'ë mombe'usar, ipɨtɨ̇vɨï agwä avei, opakatu ɨvɨ rupindar vɨroya va'erä iyavei oyapo va'erä semimbotar yuvɨreko.

^6-7 Pe Roma pendar peiko va'e, pe avei senoiprɨ ipa'üve peiko Jesucristo rese peiko va'erä, pe ni'ä Tüpä rembiaɨsu peiko oipota avei pe reko katuprɨ agwä oyeupe narä. Peipɨsɨ katu porovasasa teko tuprɨsa yande Ru Tüpä suindar, yande Yar Jesucristo suindar avei.

Pablo oso pota Roma ve Jesús reroyasar repia

⁸ Che yɨpɨndar yande Yar Jesucristo rer pɨpe, avɨye ndeu a'e Tüpä upe pe rese, esepia opakatu ɨvɨ rupi ñe'ësa tuprɨai pe rese Tüpä reroyasa pɨpe.

⁹ Iyavei Tüpä oikwa pe rese arɨ rupi che yeruresa, chupe ite ni'ä mba'e ayapo opakatu che pɨ'a pɨpe, amombe'u Ta'ɨrɨ resendar ñe'ësa avɨye va'e vichiko,

¹⁰ iyavei ayerurese aporandu ite Tüpä upe pe pɨri che so agwä rese yepi.

¹¹ Esepia che aso pota ite Espíritu suindar mba'ekwasa mondo peü pe pɨtɨ̇vɨï agwä toyemovɨräkwä tuprɨ katu yuvɨreko che yapave;

¹² che aipota ñepëi-pëi yañepɨtɨ̇vɨï katu agwä Tüpä rese yareko va'e yeroyasa pɨpe.

¹³ Che rɨvrɨ eta, che aipota peikwa va'erä seta rupi aso pota tëi pe pɨri yepi, kurïtëi rumo ndaikatuiño vɨte ite. Che rumo aipota oime va'erä che poravɨkɨsa sui espiritu rese oyemovɨräkwä katu va'e pe pa'ü sui yuvɨreko, inungar ayapo opakatu ambuae tekwa rupi.

¹⁴ Che kwaita ni'ä opakatu ava upe che ñe'ë agwä, tekwa pɨpendar yuvɨrekoi va'e upe iyavei ndayarakwa vɨtei va'e upe, imba'ekwa va'e upe anise nimba'ekwai va'e upe avei.

¹⁵ Sese pe Roma ve peiko va'e upe avei ayemongere'ɨ̇ voi ete ko ñe'ësa pɨsɨrösa resendar mombe'u agwä.

Jesús ñe'ëngagwer Tüpä pirätäsa sekoi

¹⁶ Che nachi ete ko ñe'ësa pɨsɨrösa resendar avɨye va'e sui, esepia a'e Tüpä pirätäsa opakatu seroyasar pɨsɨrö agwä, judío rane yɨpɨndar, ipare opakatu ambuae ava-ava tëi avei.

¹⁷ Supiete ko ñe'ësa omboyekwa Tüpä ava reko mbokatuprɨsa: Oyese yande yeroyasa pɨpeño ite egwë e'i yandeu. Esepia Ikwachiaprɨ araka'endar aipo e'i: “Akoi ava seko katuprɨ va'e Tüpä reroyasa pɨpe sekoira tekovesa apɨre'ɨ̇sa pɨpe.”

¹⁸ Supiete ni'ä Tüpä omboyekwa itera oñemoɨrösa ɨva sui opakatu ava vɨroyasare'ɨ̇ upe, ndasekoporäi va'e upe avei, mba'e gwembiapoai sui ndoikwa uka potai va'e ko ñe'ësa supiete va'e ambuae ava upe yuvɨreko.

¹⁹ A'e oikwa tuprɨ tëi mba'e Tüpä suindar yuvɨreko, esepia Tüpä ite ni'ä omboyekwa chupe;

²⁰ egwë e'i ete Tüpä rekokwer ndoyekwai va'e oyekwa rumo mba'e sembiapo pɨpe. Supiete yasepia mba'e sembiapokwer ɨvɨ apo ramo suive oime va'e rese, sese yaikwa a'e Tüpä ite sekoi iyavei ipirätäsa apɨre'ɨ̇ va'e. Sese ava angaipa viyar ndiyai, eñemosaño tëi rane oreu e'i va'erä yuvɨreko chupe.

²¹ Yepe oikwa tëi Tüpä yuvɨreko viña, nomboetei rumo Tüpä sekosa rese avɨye ndeu nde'i avei yuvɨreko chupe. Iyavei ipɨ'añemoñeta mba'e egwë e'i tëi va'e rese, ipɨpe sui mba'e ndosendukwa katu iri ete yuvɨreko.

²² Yepe ore mba'ekwa vai e'i tëi viña, ndoikwai ete rumo mba'e ipɨpe yuvɨreko;

²³ esepia Tüpä nomanoi va'e seko porañete va'e mboetei rägwer sui, omboetei ava okañɨ tëi va'e ra'anga iyavei vɨräi, opakatu mba'e mɨmba, mboi tëi avei omboetei yuvɨreko.

²⁴ Sese Tüpä opoiño ichui toyapoño mba'e gwemimbotarai yuvɨreko e'i chupe, iyavei oyapo ite mba'e poromochisa gwasu oyeupe oyemboetei e'ɨ̇sa pɨpe yuvɨreko.

²⁵ Mba'e supiete va'e Tüpä suindar, reroya rägwer sui temirä tëi vɨroya katu yuvɨreko, iyavei Tüpä mboyeroya rägwer sui omboetei katu mba'e sembiapokwer tëi yuvɨreko. Tüpä ite rumo nomboetei yuvɨreko.

²⁶ Sese Tüpä opoi ete ichui, toyapoño poromochisa mba'e tëi gwemimbotarai pɨpe yuvɨreko oyapave. Evokoiyase kuña avei kuimba'e rese gweko rägwer sui yuvɨrekoi oyese ae;

²⁷ kuimba'e avei kuña rese gweko rägwer sui yuvɨrekoiño avei oyese ae iyavei oipotaraiño ite evokoi gweko raisa yuvɨreko. Evokoi nungar aposa sui oyemomarä a'e ae yuvɨreko.

²⁸ Esepia ndoikwa potai ete Tüpä yuvɨreko, a'e evokoiyase opoi ete ichui toyapoño ayase mba'e ndipotasai va'e gweko raisa pɨpe yuvɨreko oya chupe.

²⁹ A'e evokoiyase yuvɨrekoi opakatu mba'e-mba'e tëi pɨpe, oyemboagwasa-gwasa tëi va'e kuimba'e, kuña avei, ambuae ava mba'e oipotarai iyavei oyapo mba'e-mba'e tëi ava upe. A'e oñemoɨrö ambuae ava mba'e potaraisave tëi, oporapichi, ivava serai, iporombopa serai, ipɨ'añemoñeta ava reko momarä agwä tëi iyavei ima'echiröiai ipɨpe yuvɨreko.

³⁰ Iyavei ambuae ava rese oñe'ërai tëi yuvɨreko, a'e Tüpä amotare'ɨ̇sar yuvɨrekoi, vɨroɨrö avei ava, oyemboɨvateai, oyeekomboɨvateai tëi avei oñe'ë pɨpe yepi; oseka-seka tëi mba'e naporäi va'e gwembiaporä, nomboyeroyai avei oyesupa yuvɨreko,

³¹ ndoyapɨsaka potai ete, nomboavɨyei avei oñe'ëngagwer, ndosaɨsui avei ava, iyavei ndoiparaɨsuerekoi ete ava yuvɨreko.

³² Oikwa tëi yuvɨreko Tüpä omondose porokwaita evokoi nungar aposar mokañɨ agwä; ipare rumo, oyapo vɨteño ite mba'e tëi, iyavei ambuae ava oyapose mba'e tëi ovɨ'areteño sepiase yuvɨreko.