San Marcos 9 - Tüpä Ñe'ëngagwer

¹ Jesús aipo e'i iri avei:–Supi ete oimerä amove ko'ave ava nomano vɨtei va'erä, osepia rane itera ouse Tüpä mborerekwasa pirätäsa yuvɨreko kuri.

Jesús ñekuñarö agwer (Mt 17.1-13; Lc 9.28-36)

² Ñepëi ova arɨ pare, Jesús vɨraso Pedro, Santiago, Juan reseve ɨvɨtrɨ ɨvate va'esave oyeupi. A'eve avɨyeteramo tëi oñekuñarö gwemimbo'e rovai.

³ Iturukwar sendɨ iyavei morochi eteanga, ndipoi ete ava inungar ko ɨvɨ pɨpe turukwar oyosei va'e.

⁴ Iyavei avɨyeteramo tëi oyemboyekwa Elías, Moisés reseve Jesús rese oñemoñeta yuvɨno'ä.

⁵ Pedro aipo e'i Jesús upe:–Porombo'esar, ¡avɨyeai ete ko'ave yaiko! Toroyapo mbosapɨ teyupami: ñepëi ndeu narä, ambuae Moisés upe, ambuae evokoiyase Elías upe narä.

⁶ Osɨkɨye tëi semimbo'e yuvɨreko, iyavei Pedro ndoikwaise oñe'ë agwä, aipo e'iño tëi.

⁷ A'e ramoseve, avei ogweyɨ ɨva kɨ'a i'arɨve oyopɨpa tuprɨ yuvɨreko. A'e ɨva sui oyeendu ñe'ësa aipo e'i: “Ko che Ra'ɨrɨ che rembiaɨsu: peyapɨsaka katu iñe'ë rese.”

⁸ A'e ramoseve oma'ese oɨvɨi, ndosepia iri ete rumo ambuae ava yuvɨreko supi, Jesús gweraño ite osepia yuvɨreko.

⁹ Ipare ogweyɨse ɨvɨtrɨ sui yuvɨreko, Jesús aipo e'i gwemimbo'e upe ndapemombe'ui chietera ñepëi ava upe ko mba'e pesepia va'e, pemombe'ura rumo akoi che ava ɨvate katu va'e Ra'ɨrɨ akwerayevɨse voi ete kuri.

¹⁰ Oyeupeño tëi vɨreko aipo ñe'ësa yuvɨreko, a'e rumo oporandu-randu oyeupe marä oya pi'ä aipo akwerayevɨra e'i tëi oiko.

¹¹ Oporandu Jesús upe yuvɨreko:–¿Ma'erä ru evokoiyase Moisés porokwaita rese oporombo'e va'e Elías rane oura tenonde kuri e'i yuvɨreko?

¹² A'e rumo omboyevɨ chupe:–Supi ete ni'ä Elías rane oura, opakatu mba'e moigätu agwä. ¿Ma'erä evokoiyase araka'endar Ikwachiaprɨ pɨpe aipo e'i ava ɨvate katu va'e Ra'ɨrɨ oiporarara mba'e oiko, iyavei vɨroɨröra yuvɨreko no?

¹³ Che rumo aipo a'e peü Elías ou ite, ava evokoiyase opakatu gwemimbotar rupi tëi mba'e oyapo yuvɨreko sese, egwë e'i opakatu yavɨye araka'endar Ikwachiapɨrer pɨpe.

Jesús ombogwera ñepëi chi'ïvä'e vɨreko va'e karugwar oyese (Mt 17.14-21; Lc 9.37-43)

¹⁴ Oyevɨ pare gwemimbo'e rekosave, a'eve osepia ava re'ɨi oyere gwasuse yuvɨreko sese, iyavei oime a'eve Moisés porokwaita rese oporombo'e va'e oiñe'ëpoepɨ-epɨ semimbo'e yuvɨreko.

¹⁵ Jesús repiase rumo, opakatu yuvɨnoñapa yuvɨraso chupe avɨrave apo ovɨ'aretesa pɨpe.

¹⁶ A'e oporandu ava re'ɨi upe:–¿Mba'e rese vo peporandu-randu chupe yuvɨreko?

¹⁷ Ñepëi ipa'ü pendar omboyevɨ chupe:–Porombo'esar, ko aru che ra'ɨrɨ ndeu, vɨreko va'e karugwar oyese nomoñe'ëgätu ukai va'e yepi.

¹⁸ Iyavei igwatasa rupi, ko karugwar avɨyeteramo tëi opokose sese; oitɨ voi ɨvɨve iyavei sendɨrɨyuiyusu, säitere-tere avei kurïtëi nipirätä iri ete. Penosemi karugwar ichui a'e tëi nde remimbo'e eta upe, a'e rumo ndoikatui ete yuvɨreko.

¹⁹ Jesús omboyevɨ chupe:–¡Pe ava ndaperoyai va'e Tüpä peiko! ¿Mbovɨ rupi rutei vo aiko vɨtera pe pa'üve? ¿Mbovɨ rupi rutei ayapo vɨtera vichiko mba'e peü? Peru evokoi chi'ïvä'e cheu.

²⁰ Evokoiyase vɨraso chi'ïvä'e Jesús rovai yuvɨreko. Osepiase karugwar Jesús, oitɨ uka iri chi'ïvä'e ɨvɨve, omboapayere-yere iyavei iyuru rupi sendɨrɨyui gwasu-gwasu.

²¹ Jesús oporandu iyesupa upe:–¿Mba'ese suive tuprɨ vo na e'i oiko?Iyesupa omboyevɨ chupe:–Ichi'ïvä'e suive ite.

²² Seta yupagwer ko karugwar oitɨ uka tatave ɨve avei, yuka pota agwä yepi. Sese ereikatuse, ore pɨtɨ̇vɨïñomi tëi katu eve ore paraɨsuerekosave.

²³ Jesús aipo e'i chupe:–¿Ma'erä ‘ereikatuse ere cheu’? ¡Opakatu che reroyasar upe yaposa ite mba'e avɨye va'e!

²⁴ Evokoiyase chi'ïvä'e yesupa säse pirätä:–Che orovɨroya ite. ¡Che pɨtɨ̇vɨï eve nde reroya katu agwä!

²⁵ Osepiase Jesús ava re'ɨi, oyemboyase sese oñe'ëgäta karugwar upe aipo e'i:–Karugwar noñe'ëi va'e ndayapɨsai va'e, che orokwai epoi ko chi'ïvä'e sui ereike iri eme sekokwer rese.

²⁶ Karugwar säse puku, omoeo'ä tuprɨ chi'ïvä'e. Ipare osë ichui, oseya rumo inungar omano va'e, aipo e'i yuvɨreko, ko chi'ïvä'e omano ite ou e'i yuvɨreko chupe.

²⁷ Jesús rumo, oipopɨsɨ imopü'a; ipare chi'ïvä'e opü'a tuprɨ voi ete.

²⁸ Ichui Jesús oike ñepëi oɨ pɨpe, ipare semimbo'e eta oporandu a'e ae yuvɨrekoise chupe:–¿Ma'erä pi'ä ndoromosë katui ete karugwar ichui?

²⁹ Ipare Jesús omboyevɨ chupe:–Ko nungar karugwar yaikatu senose yeruresa pɨpe ñoite yepi.

Jesús omombe'u imoñuvɨrïosa rupi omano agwä (Mt 17.22-23; Lc 9.43-45)

³⁰ Ichui yuvɨnosepase, yuvɨraso ɨvɨ Galilea rupi. Jesús rumo ndoyemboyekwa uka potai ete ambuae ava upe,

³¹ esepia gwemimbo'e gweraño ite ombo'e. Aipo e'i:–Che ava ɨvate katu va'e Ra'ɨrɨ, imondoprɨ aikora che amotare'ɨ̇mbar povrɨve, che yuka aveira yuvɨreko; mbosapɨ arɨ pare rumo akwerayevɨra.

³² Semimbo'e rumo ndosendukwai ete oyeupe ñe'ësa iyavei osɨkɨye chupe porandu agwä yuvɨreko yepi.

¿Uma pi'ä seko ɨvate katu va'e? (Mt 18.1-5; Lc 9.46-48)

³³ Ipare oyepota tekwa Cafarnaúm ve yuvɨreko. Yuvɨroikese oɨ pɨpe, Jesús oporandu gwemimbo'e eta upe:–¿Mba'e rese vo akoi peyeaka-aka peiko perɨ rupi?

³⁴ A'e rumo noñe'ëi tuprɨ yuvɨreko, esepia perɨ rupi oyeaka yugweru uma ite pi'ä seko ɨvate katura yande pa'ü pendar e'i oyeupe yuvɨreko.

³⁵ Evokoiyase ogwapɨsave, periopa e'i gwemimbo'e opayandepo yovaive ñuvɨrïo va'e upe, aipo e'i avei:–Oimese pe pa'ü pendar oyemboɨvateai va'e, a'e rumo seko ɨvɨ kotɨ katura opakatu sui ava eta pɨtɨ̇vɨï agwä.

³⁶ Ipare oipɨsɨ chi'ïvä'e gwemimbo'e pa'üve seno'ä aipo e'i:

³⁷ –Akoi ava oipɨsɨ va'e ko chi'ïvä'emi nungar che rer pɨpe sereko, che ite che pɨsɨ yuvɨreko; iyavei akoi ava che pɨsɨ va'e, nda'ei che gweraño che pɨsɨ, oipɨsɨ aveira che mbousar.

Akoi nda'ei va'e yande amotare'ɨ̇mbar, a'e yande mboyoyasar sekoi (Mt 10.42; Lc 9.49-50)

³⁸ Evokoiyase Juan aipo e'i chupe:–Porombo'esar, orosepia mbɨa nderer pɨpe omombo va'e karugwar, a'e rumo ndogwatai kurïtëi ore rupi; esepia ore ndoroipotai chupe.

³⁹ Jesús omboyevɨ chupe:–Ani egwë peye, esepia ndipoi ete ambuae oyapo va'e poromondɨisa che rer pɨpe, oikatu va'erä oñe'ërai che rese.

⁴⁰ Sese ndayande amotare'ɨ̇i va'e, a'e yande mboyoyasar sekoi.

⁴¹ Akoi omondo va'e ñepëi ɨgwa rɨru pɨpe ɨ Cristo sui perekose yuvɨreko peü, evokoi nungar oipɨsɨ itera porerekosa oyeupe narä.

Sɨkɨyesara vɨapi e'ɨ̇ agwä angaipa pɨpe (Mt 18.6-9; Lc 17.1-2)

⁴² “Akoi ava omboangaipa uka va'e ko chi'ïvä'emi nungar che reroyasar, iyakatu evokoi nungar ñapɨ̇chisa ita mba'e mboku'isa iyesɨ'o rese paragwasu pɨpe imombo agwä.

⁴³ Sese pepo pe mboangaipa uka va'e peyasɨa peyesui; esepia avɨye katu peikera tekove apɨre'ɨ̇save ñepëi pepo rese, peso rägwer sui ñuvɨrïo pepo rese tata gwasu apɨre'ɨ̇save,

⁴⁴ a'eve akoi uru nomanoi va'e, iyavei tata ndogwei va'esave.

⁴⁵ Pepɨ pe mboangaipa ukase, peyasɨa avei peyesui; esepia avɨye katu ndape pɨndugwei peike tekovesave, ñuvɨrïo pepɨ rese peike rägwer sui tata gwasu ndopai va'esave,

⁴⁶ a'eve akoi uru nomanoi va'e, iyavei tata ndogwei va'esave.

⁴⁷ Pe resa avei pe mboangaipa ukase, penose ite peyesui; esepia avɨye katu peike ñepëi pe resa rese Tüpä mborerekwasave ñuvɨrïo pe resa rese tata gwasu apɨre'ɨ̇save pe reike rägwer sui.

⁴⁸ A'eve akoi uru nomanoi va'e, iyavei tata ndogwei va'esave.”

⁴⁹ “Esepia opakatu ava imboe'ësara tata nungar pɨpe.

⁵⁰ Sese yukrɨ avɨyeai ete; nase'ë irise rumo, ¿ndayaikatui chira imoe'ë iri agwä? Peiko katu yukrɨ nungar mba'e tuprɨ pɨpe peyeupe narä.”