San Lucas 20 - Tüpä Ñe'ëngagwer

Jesús mborerekwasa (Mt 21.23-27; Mc 11.27-33)

¹ Ñepëi arɨ, Jesús sekoise tüpäro pɨpe ombo'e ava eta omombe'u ñe'ësa pɨsɨrösa resendar oiko, a'ese oyepota pa'i eta rerekwar yuvɨreko Moisés porokwaita rese oporombo'e va'e avei, oyoya tuprɨ mborerekwar tekwa pɨpendar rese,

² aipo e'i yuvɨreko chupe:–¿Ava nde kwaita pɨpe vo ereyapo ko nungar eiko? ¿Ava vo ombou nde mborerekwarä?

³ Jesús omboyevɨ chupe:–Che avei aporandura mba'e rese peü. Pemboyevɨra cheu:

⁴ ¿Ava vo Juan ombou ava apirämo agwä, Tüpä pi'ä ava tëi tie?

⁵ A'ese omboɨpɨ oyeaka a'e ae yuvɨreko: “Yamboyevɨse chupe ko Tüpä ombou va'e, aipo e'ira rumo yandeu: ‘¿ma'erä ru evokoiyase ndaperoyai?’

⁶ Ndayaikatui chietera ava tëi ya'e va'erä chupe, esepia ñi'ä ava yande yukara ita pɨpe yuvɨreko, a'e oikwa ite opakatu yuvɨreko Juan Tüpä ñe'ëngagwer mombe'usar sekoise.”

⁷ A'e rumo omboyevɨ yuvɨreko ndoroikwai ava vo katu ombou Juan oporoapirämo va'erä.

⁸ Evokoiyase Jesús omboyevɨ chupe:–Che avei namombe'ui chira uma porokwaita rupi ayapo ko mba'e.

Oporavɨkɨ naporäi va'e rekokwer sui yembo'esa (Mt 21.31-44; Mc 12.1-11)

⁹ Ichui omboɨpɨ Jesús oñe'ë ava upe, omombe'u ko yembo'esa: “Ñepëi mbɨa oñotɨ̇ uva, omondo ñepëi oporavɨkɨ va'e upe ipare oso amombrɨ rupi oiko.

¹⁰ Koiye katu oyevɨse ou, omondo ñepëi gwembigwai oporavɨkɨ va'e upe imboporandu uva po'oprɨ rese oyeupe narä viña; a'e rumo oinupa-nupaño imboyevɨ yuvɨreko.

¹¹ Ipare iyar omondo iri ambuae gwembigwai; a'e chupe avei iñe'ë-ñe'ë tëi, yuvɨrokwa rokwaño sese imboyevɨ yuvɨreko.

¹² Omondo iri tëi ambuae, oporavɨkɨ va'e rumo oyapicha pichaño seya yuvɨreko.”

¹³ “Koiye ɨvɨ yar aipo e'i: ‘¿Marä a'era pi'ä? Amondora revo che ra'ɨrɨ che rembiaɨsu; avɨyeteramo a'e omboyeroyara yuvɨreko.’

¹⁴ Osepiase rumo oporavɨkɨ va'e, aipo e'i oyeupe yuvɨreko: ‘Ko aipo oipɨsɨra mba'e eta oiko; yayukaño voi ete, ko ɨvɨ evokoiyase opɨtara yandeu narä.’

¹⁵ Evokoiyase vɨnose mba'e mitɨ̇ rëtä sui ipare oyuka yuvɨreko.”“¿Mba'evo peikwa ɨvɨ yar oyapora oporavɨkɨ va'e upe?

¹⁶ Osora oyukapa tuprɨra evokoi oporavɨkɨ va'e, omondora ɨvɨ ambuae eta upe.”Ko renduse, aipo e'i yuvɨreko:–¡Aipo nungar egwë nde'i chietera!

¹⁷ Jesús oma'e sese aipo e'i:–Evokoiyase ¿mba'e vo omombe'u ko Ikwachiaprɨ pɨpe?:‘Ko ita oɨ aposar opaño omombo yuvɨrekoa'e oyeapo ita ovɨräkwä tuprɨ katu va'e rese.’

¹⁸ Akoi ovɨapi va'e ita arɨve, opa tuprɨra imarä; iyavei ita ovɨapise ambuae arɨve, opa aveira omongu'i.

¹⁹ Pa'i eta rerekwar iyavei oporombo'e va'e Moisés porokwaita rese osokenda pota Jesús yuvɨreko a'e arɨ pɨpe, a'e osendukwa ite ko porombo'esa oyeupendar. A'e rumo osɨkɨyeño ite ava sui yuvɨreko.

Porandusa gwarepochi monu'äsa rese (Mt 22.15-22; Mc 12.13-17)

²⁰ Omondo opa'ü pendar ivɨro agwä, inungar ava ndasekoasɨi anga'u va'e, chupe iñe'ë agwä Jesús upe toyavɨ anga'u oñe'ë oyapave viña vɨraso va'erä mborerekwar Roma pendar rovai yuvɨreko.

²¹ A'e oporandu yuvɨreko chupe:–Porombo'esar, ore oroikwa nde ñe'ë iyavei nde porombo'esa supiete va'e, iyavei nderemboyoavɨratɨi ñe'ësa ava upe imombe'u. Nde ereporombo'e mba'e supi tuprɨ va'e Tüpä rekokwer rese.

²² ¿Avɨyera pi'ä oromboepɨ orerekosa mborerekwar Roma pendar upe viña, anichira tie?

²³ Jesús rumo, oikwa voi ete ipɨ'a ñemoñetaraisa vɨreko va'e yuvɨreko, aipo e'i chupe:

²⁴ –Pemboyekwa ru ñepëi gwarepochi cheu. ¿Ava ra'anga vo vɨreko ava rer vo ikwachiaprɨ sese?Omboyevɨ yuvɨreko chupe:–Mborerekwar gwasu mba'e.

²⁵ Jesús aipo e'i chupe:–Pemondora mborerekwar upe mba'e chupendar, iyavei Tüpä upendar mba'e pemondoño ite Tüpä upe.

²⁶ Iyavei ndoyavɨ uka katui ete iñe'ë ava rovake ipɨsɨ agwä, a'e rumo oyeupe imboyevɨse ikiriripa tuprɨño oyepɨ'amondɨisa pɨpe yuvɨreko.

Porandusa kwerayevɨsa rese (Mt 22.23-33; Mc 12.18-27)

²⁷ Ipare oime saduceo yuvɨraso va'e Jesús repia. Saduceo eta rumo ndovɨroyai omano va'e kwerayevɨsa; sese omboyekwa mba'e ko yuvɨreko chupe:

²⁸ –Porombo'esar, Moisés oseya oreu gwembikwachiagwer ñepëi kuimba'e omenda va'e omanose gwa'ɨ e'ɨ̇ seve gwembireko rese, omano va'e rɨvrɨ evokoiyase omendara sembirekokwer rese a'e vɨke'ɨrɨ omano va'ekwer upe narä ta'ɨra oiko.

²⁹ Supiete, oime ñuvɨrïo ova tuprɨ oyesuindar päve yuvɨrekoi va'e. A'e omano tëi gwa'ɨrɨ e'ɨ̇ seve.

³⁰ Imoñuvɨrïosa egwë e'i tuprɨ avei omano.

³¹ Ipare imombosapɨsa omenda sese, a'e tuprɨño avei oyapo ambuae yuvɨreko, ñuvɨrïo ova va'e opa omano yuvɨreko gwa'ɨ e'ɨ̇ seve.

³² Koiye kuña avei omano.

³³ Oimese kwerayevɨsa koiye, ¿uma rembirekorä pi'ä opɨtara ko kuña, ñuvɨrïo ova omendapa tuprɨ yuvɨreko sese?

³⁴ Jesús rumo omboyevɨ chupe:–Ko tekokwer pɨpe, kuimba'e iyavei kuña omenda yuvɨreko;

³⁵ Tüpä oikwara uma yuvɨrekoira teko katuprɨsa pɨpe iyavei kwerayevɨsa pɨpe kuimba'e anise kuña, a'e nomenda iri chietera yuvɨreko,

³⁶ iyavei nomanoi chietera yuvɨreko. Esepia yuvɨrekoira inungar mbigwai ɨva pendar, iyavei yuvɨrekoira Tüpä ra'ɨrɨ okwera yevɨsa rese.

³⁷ Moisés avei ni'ä, oikwa uka kwerayevɨsa yandeu akoi ka'a pa'ü rese sendɨ gwasuse. A'eve yande Yar aipo e'i Abraham Tüpä aiko, Isaac, Jacob aveino.

³⁸ ¡A'e nda'ei omano va'e Tüpä, a'e sekoi oikove va'e Tüpä, esepia chupe opakatu ite yuvɨrekove!

³⁹ Oime Moisés porokwaita rese oporombo'e va'e aipo e'i yuvɨreko:–Supiete aipo ere, Porombo'esar.

⁴⁰ Ndoikatu iri ete mba'e rese oporandu agwä yuvɨreko chupe.

¿Ava suindar pi'ä ou Poropɨsɨrösar? (Mt 22.41-46; Mc 12.35-37)

⁴¹ Jesús oporandu chupe:–¿Ma'erä ru, Poropɨsɨrösar David suindar e'i ava yuvɨreko?

⁴² David teiete ni'ä, gwembikwachia pɨpe aipo e'i:‘Che Yar aipo e'i che Yar upe:Egwapɨ che akato kotɨ,

⁴³ akoi che amondose voi nde amotare'ɨ̇mbarñenopɨ'ä agwä nde povrɨve yuvɨreko.’

⁴⁴ ¿Ma'erä ru evokoiyase Poropɨsɨrösar David suindar sekoi peye, David teiete avei Che Yar e'i chupe?

Jesús oikwa uka Moisés porokwaita rese oporombo'e va'e rekokwerai (Mt 23.1-36; Mc 12.38-40; Lc 11.37-54)

⁴⁵ Opakatu ava osendu iñe'ë, ipare Jesús aipo e'i gwemimbo'e upe:

⁴⁶ “Peikwa katu ko Moisés porokwaita rese oporombo'e va'e sui, a'e oipota ogwata turukwar puku va'e rese yuvɨreko, iyavei oipota oyeupe avɨrave apo agwä okar rupi omboeteisa pɨpe yuvɨreko. Oseka avei gwapɨsa porañete katu va'e gwenarä oɨ judío ñemonu'äsa pɨpe iyavei oseka karusa rendave porañete katu va'e yuvɨreko yepi;

⁴⁷ iyavei vɨrokwa-rokwaño tëi kuña imer mano va'ekwer rëtä yuvɨreko, oarondagwä tëi avei oyerure puku-puku. A'e rumo oipɨsɨra Tüpä ñemoɨrösa ipirätä katu va'e yuvɨreko kuri.”