San Lucas 19 - Tüpä Ñe'ëngagwer

Jesús iyavei Zaqueo

¹ Jesús oike tekwa Jericó pɨpe ogwata oiko.

² A'eve ñepëi sekoi kuimba'e mba'e yar Zaqueo serer va'e, mborerekwar sekoi gwarepochi rerokwasar Roma pendar upe narä.

³ Ko oikwa pota tëi Jesús, ndoikatui rumo sepia, esepia seta iteanga ava iyavei Zaqueo ndipukuimi ete.

⁴ Evokoiyase oña tenonde oso, tasepia ite oyapave, oyeupi ɨvɨra rese ɨvate öi senonerä supi Jesús oñokwära oso.

⁵ Evokoiyase Jesús oñokwase oso supi, oma'e ɨvatekotɨ aipo e'i chupe:–Zaqueo, egweyɨ poyava, esepia ko pɨpe asora nde rëtäve apɨtara nde pɨri.

⁶ Zaqueo ogweyɨ voi, oipɨsɨ Jesús vorɨvetesa pɨpe.

⁷ Osepiase rumo, opakatu ava vɨroɨrö Jesús yuvɨreko aipo e'i, oso opɨta ava yangaipa va'e rëtäve tëi.

⁸ Zaqueo opü'a aipo e'i Yar upe:–Esepia che Yar, amondora iparaɨsu va'e upe amboya'o tuprɨra imondo mba'e areko va'e; mba'e añomi va'ekwer avei, ayapɨrasa katu-katura irugätu rupi imboyevɨ agwä.

⁹ Jesús aipo e'i chupe:–Ko pɨpe oyepota pɨsɨrösa ko oɨ pɨpe, esepia ko mbɨa avei sekoi Abraham suindar.

¹⁰ Esepia ava ɨvate katu va'e Ra'ɨrɨ ou ko ɨvɨ pɨpe ava okañɨ tëi va'e pɨsɨrö agwä.

Gwarepochi sui yembo'esa

¹¹ Ava osendu Jesús ñe'ë yuvɨreko omombe'use ko mba'e resendar, a'e evokoiyase omombe'u ñepëi porombo'esa, esepia ni'ä köimi ete sekoi Jerusalén sui, a'e rumo ipɨ'a ñemoñeta Tüpä mborerekwasa oyepotara revo kurïtëi e'i yuvɨreko viña.

¹² Aipo e'i ava upe: “Oime mbɨa imboyeroyaprɨ, oso amombrɨ ambuae tekwa ve, a'e omoingera mborerekwar ɨvate katu va'erä yuvɨreko ichui oyevɨra ou.

¹³ Oso agwä renonde rumo, oicho'opa uka opayandepo yovaive tuprɨ gwembigwai, a'ese opa omondo ñepëi-pëi upe seta gwarepochi aipo e'i: ‘Peporavɨkɨ ko gwarepochi rese imboeta agwä che yevɨse narä.’

¹⁴ Ava sekwa pendar rumo ndoyambotai yuvɨreko, evokoiyase omondo sakikwei ñe'ësa mombe'u agwä ava yuvɨreko chupe aipo e'i: ‘Ndoroipotai rumo ko mbɨa ore rerekwar gwä sekoi va'erä.’ ”

¹⁵ “A'e rumo oike ite mborerekwar ɨvate katu va'erä, ipare oyevɨ gwekwave oso. Oyepotase ou, oñe'ëpa gwembigwai upe a'e chupe akoi omondo va'e gwarepochi, ikwa agwä mbovɨ-mbovɨ pi'ä oyapokatu ñepëi-pëi yuvɨreko oyave.

¹⁶ Yɨpɨndar ou va'e aipo e'i: ‘Che rerekwar, nde gwarepochi oyemboeta opayandepo yovaive rupi cheu.’

¹⁷ Mborerekwar ɨvate katu va'e omboyevɨ chupe: ‘Avɨye ite; nde ereiko mbigwai avɨye va'e: nde kwaita ko nde poravɨkɨsa chi'ïmi va'e eremboavɨye ite, sese ereikora opayandepo yovaive tekwa gwasu pendar rese añeko agwä.’

¹⁸ Ipare voi ambuae ou chupe aipo e'i, ‘Che rerekwar, nde gwarepochi oyemboeta opayandepo rupi avei cheu.’

¹⁹ Aipo e'i tuprɨ avei chupe: ‘Nde ereikora poyandepo tekwa pendar rese añeko agwä.’ ”

²⁰ “Ipare ambuae ou aipo e'i chupe; ‘Che rerekwar, ko nde gwarepochi. Aipokeño turukwarmi pɨpe sereko;

²¹ esepia che asɨkɨye ndesui, nderekate'ɨ̇aise mba'e rese, ereipɨsɨ mba'e nderemondoisave iyavei eremonu'ä mba'e ndereñotɨ̇isave.’

²² Evokoiyase mborerekwar ɨvate katu va'e aipo e'i: ‘Mbigwai ndasekoporäi va'e, nde ñe'ë sui aikwa nde rekokwer. Ereikwa ni'ä mba'e rese che cherekate'ɨ̇ai, aipɨsɨ mba'e namondoi va'e save amonu'ä avei mba'e nañotɨ̇i va'e save no,

²³ ¿ma'erä evokoiyase che gwarepochi ndererasoi gwarepochi apokatusave imoï, a'ese eremboyevɨ katura che yevɨse cheu viña?’

²⁴ Aipo e'i a'eve yuvɨreko va'e upe: ‘¡Perokwa gwarepochi ichui pemondo akoi opayandepo yovaive tuprɨ vɨreko va'e upe!’

²⁵ A'e rumo aipo e'i yuvɨreko: ‘Ore rerekwar, ¡a'e rumo ovɨreko evokoi opayandepo yovaive tuprɨ avei i'arɨve!’

²⁶ Evokoiyase mborerekwar ɨvate katu va'e omboyevɨ chupe: ‘Amombe'ura aipo peü akoi vɨreko va'e mba'e, chupe imondosa katura, iyavei ndovɨrekoi va'e mba'e, ichui serokwaño itera mba'e vɨrekomi va'e.

²⁷ Akoi che amotare'ɨ̇mbar ndache potai va'e mborerekwarä yuvɨreko, peru ko'ave peyukapa che rovai’ ”

Jesús oike Jerusalén pɨpe (Mt 21.1-11; Mc 11.1-11; Jn 12.12-19)

²⁸ Jesús aipo o'e pare, ogwata vɨte oso Jerusalén ve.

²⁹ Vɨrovɨse tekwa Betfagé iyavei Betania yuvɨraso, ka'a serer va'e Olivos rese, a'eve omondo ñuvɨrïo gwemi-mbo'e,

³⁰ aipo e'i chupe:–Peso ko tekwamive yande rovaindarve, peyepotase a'eve pesepiara gwariku ñapɨ̇chimbrɨ imo'ä, ndoyeupi vɨtei va'e yuvɨreko sese. Peyorañora seru.

³¹ Akoi oporanduse yuvɨreko peü ma'erä vo peyora, aipo peyera chupe Yar oiporu pota.

³² Semimbo'e eta yuvɨraso osepia ite opakatu mba'e omombe'u va'e Jesús yuvɨreko chupe.

³³ Oyora vɨte seve gwariku, iyar oporandu yuvɨreko chupe:–¿Ma'erä vo peyora?

³⁴ A'e rumo omboyevɨ yuvɨreko:–Esepia ko ore Yar oiporu pota.

³⁵ Ipare omondo okupeaosa gwariku arɨve, vɨraso Jesús upe ipare omboyeupi i'arɨve yuvɨreko.

³⁶ Jesús gwata rupive-pive, oipɨpira ava oturukwar perɨ rupi yuvɨreko.

³⁷ Ovɨrovɨse ɨvɨtrɨ Olivos sui ogweyɨ agwä oso, opakatu ava seroyasar supi ogwata va'e omboɨpɨ sapukai yuvɨreko vorɨvetesave mba'e poromondɨisa sembiapokwer rese Tüpä upe.

³⁸ Aipo e'i yuvɨreko:–¡Sovasaprɨ sekoi Mborerekwar ɨvate katu va'e ou va'e yande Yar rer pɨpe! ¡Mba'e tuprɨ toime ɨvave iyavei imboeteiprɨ Tüpä tasekoi!

³⁹ Evokoiyase oime amove fariseo eta ava pa'ü rupi aipo e'i yuvɨreko:–Porombo'esar, eñe'ëgäta nde rupi ogwata va'e upe.

⁴⁰ Jesús rumo omboyevɨ chupe:–Amombe'u peü ko ikiririse, ita rumo säse pirätära yuvɨreko.

⁴¹ Oyepota senimise tekwa Jerusalén ve, a'e tekwa repiase Jesús oyase'o sese,

⁴² aipo e'i: “¡Ko arɨ pɨpe nde avei eresendugwase teko katuprɨsa viña! Kurïtëi rumo ereñemi tuprɨño iyavei nderesepiai chietera.

⁴³ Oimerä rumo arɨ imombe'uprɨ naporäi va'e ndeu kuri, nde amotare'ɨ̇mbar omboyerera sambɨpe imopü'a yuvɨreko, iyavei oyere tuprɨra opakatu rupi-rupi tëi ovava ndeu,

⁴⁴ iyavei ndemokañɨpa itera yuvɨreko. Oyukapa aveira ava nderekwa pendar, ndoseyai chietera ñepëi ita ambuae arɨve ndeu, esepia ndereikwai ete Tüpä ouse nde pɨri nde pɨsɨrö agwä.”

Jesús omboatɨrö tüpäro pɨpe (Mt 21.12-17; Mc 11.15-19; Jn 2.13-22)

⁴⁵ Ko ipare, Jesús oike oso tüpäro pɨpe a'eve omboɨpɨ mba'e mondosar mombopa okarve,

⁴⁶ aipo e'i ava upe:–Ikwachiaprɨ araka'endar pɨpe aipo e'i: ‘Che rëtä sekoira yeruresa rëtä’, pe rumo imondarai va'e rëtä nungar tëi pereko.

⁴⁷ Arɨ yakatu Jesús oporombo'e tüpärove, iyavei pa'i eta rerekwar, Moisés porokwaita rese oporombo'e va'e iyavei tekwa rerekwar yuvɨrekoi va'e oseka tëi marä ya'era yuka uka oya yuvɨreko.

⁴⁸ Ndoikatui ete rumo mba'e apo yuvɨreko chupe, esepia opakatu ava oyapɨsaka iporombo'esa rese yuvɨreko.