San Lucas 13 - Tüpä Ñe'ëngagwer

Avɨye katu ite yañekuñarö

¹ A'e arɨ pɨpe avei yuvɨraso ava Jesús repia, a'ese omombe'u yuvɨreko chupe Pilato omboyese'a va'e ñepëi mbɨa Galilea ɨgwar ruvɨ mba'e mɨmba ruvɨ rese a'e aipo vɨropove'ë sereko yuvɨreko.

² Jesús aipo e'i chupe: “¿Pemo'ä ko mba'e tëi oime va'e evokoi mbɨa Galilea pendar upe yangaipa katu rese ambuae gwekwa pendar sui viña?

³ Ani egwë nde'i ete; pe ni'ä ndapeyevɨise Tüpä upe pemano aveira.

⁴ ¿Peroya avei akoi ava dieciocho tuprɨ yuvɨrekoi va'e omanopase oɨ ɨvate va'e Siloé ovɨapise i'arɨve a'e yangaipa katu ambuae eta Jerusalén pɨpendar sui?

⁵ Ani egwë nde'i ete; pe ni'ä ndapeyevɨise Tüpä upe, pemano aveira.”

Yembo'esa ɨvɨra higuera ndi'ai va'e sui

⁶ Jesús omombe'u ko porombo'esa: “Ñepëi mbɨa vɨreko va'e ñepëi ɨvɨra higuera oko pɨpe, oso aipo sepia i'a pi'ä oyapave, ndosekai ete rumo ñepëi i'a.

⁷ A'ese aipo e'i mbɨa oko rärösar upe: ‘Esepia che ayu pɨ'i tëi higuera a reka mbosapɨ aravɨter rupi, ndasepiai ete rumo ñepëi i'a sese yepi. Eyasɨapa voi ete; ¿ma'erä evokoiyase oiporu tuprɨ tëira ɨvɨ ö'a?’

⁸ A'e ɨvɨ rärösar rumo omboyevɨ chupe: ‘Che rerekwar, egwë te'iño vɨte tëi rane ko aravɨter; amboku'ira ɨvɨ chupe ipare amondora ɨvɨ sü va'e mba'e repochi resendar sese.

⁹ Evokoi rese revo avɨyeteramo i'ara; anise ite rumo, ereyasɨa uka ñoitera.’ ”

Jesús ombogwera arɨ mbɨtu'usa pɨpe ñepëi kuña imba'easɨ va'e

¹⁰ Ñepëi mbɨtu'usa arɨ pɨpe Jesús oporombo'e ñepëi oɨ judío ñemonu'äsa pɨpe;

¹¹ a'eve oime ñepëi kuña imba'easɨ va'e dieciocho aravɨter tuprɨ oiko. A'e karugwar omboyeapami sereko, sese ndoikatui opü'a tuprɨ ogwata.

¹² Osepiase Jesús, oñe'ë aipo e'i chupe:–Kuña, kurïtëi erekwera ite nde mba'erasɨsa sui.

¹³ Evokoiyase omondo opo i'arɨve, a'eseve voi kuña oyemo'ɨ̇vi tuprɨ ipare omboɨpɨ Tüpä mboetei oiko.

¹⁴ Oɨ judío ñemonu'äsa rerekwar rumo oñemoɨrö, esepia Jesús oporombogwera mbɨtu'usa arɨ pɨpe, aipo e'i ava upe:–Oime ñepëi ova arɨ mboravɨkɨ apo agwä; a'e arɨ pɨpe peyura peposano agwä, nda'ei chira mbɨtu'usa arɨ pɨpe.

¹⁵ Yande Yar evokoiyase omboyevɨ chupe:–Pe inungar ava oñe'ë ñotëi va'e tekokwer rese yuvɨreko yepi, ¿ndoyorai vo pe pa'ü pendar akoi gweimba tɨvi iyavei gwariku mbɨtu'usa arɨ pɨpe yuvɨreko imboɨ'u agwä yepi?

¹⁶ Ko kuña sekoi va'e, Abraham suindar Karugwar omomba'easɨ va'e dieciocho aravɨter sereko, ¿ndiyai ete pi'ä evokoiyase imbogwerasa mbɨtu'usa arɨ pɨpe viña?

¹⁷ Aipo e'ise Jesús imombe'u, opakatu yamotare'ɨ̇sar yuvɨnochi tëi yuvɨreko ichui; ambuae ava rumo oyembovɨ'año opakatu Jesús rembiapo osepiase yuvɨreko.

Yembo'esa mostaza rä'ɨi sui

¹⁸ Jesús aipo e'i avei: “¿Mba'e rese pi'ä oyoya Tüpä mborerekwasa evokoiyase mba'e rese pi'ä amboyoyara?

¹⁹ Inungar tuprɨ ite mostaza rä'ɨi ñepëi ava oñotɨ̇ va'e oko pɨpe, a'e okwakwa iyetei eteanga o'ä, vɨräi evokoiyase oyapo gwaitɨrä yuvɨreko sese.”

Yembo'esa mboyape mboapeposa sui (Mt 13.33)

²⁰ Iyavei aipo e'i Jesús: “¿Mba'e rese pi'ä amboyoyara Tüpä mborerekwasa?

²¹ Oyoya tuprɨ ko mboyape mboapeposa rese, akoi kuña omboyese'a tuprɨ va'e mbosapɨ sa'ämbrɨ trigo ku'i rese opakatu imboapepo agwä.”

Okendɨpɨ ika'ïmi va'e (Mt 7.13-14, 21-23)

²² Perɨ oso va'e Jerusalén ve, a'e supi Jesús oporombo'e oiko tekwa yakatu rupi tekwa-tekwami rupi aveino.

²³ Ñepëi mbɨa oporandu chupe:–Che Yar, ¿supiete pi'ä movɨrömi tëi oñepɨsɨröra yuvɨreko?A'e evokoiyase omboyevɨ chupe:

²⁴ –Peikwa tuprɨ peike va'erä okendɨpɨ ka'ïmi rupi; esepia aipo a'e peü seta ava yuvɨroike pota tëira, ndoikatu chietera rumo yuvɨreko.

²⁵ Ipare oɨ yar opü'ase okenda mboya, peiko va'e okarɨve, peñe'ë tëira aipo peyera: ‘Ore yar, emboimi tëi oreu.’ A'e rumo aipo e'iñorä imboyevɨ chupe: ‘Che ndopokwai va'e kesui vo peyu.’

²⁶ Evokoiyase pe aipopeye tëira: ‘Orokaru va'e, oroɨ'u va'e avei ni'ä nderese yepi, nde avei ni'ä ore mbo'e ore rokar rupi eve yepi.’

²⁷ A'e rumo aipo e'ira imboyevɨ: ‘Ndaikwai kependar katu vo peiko. ¡Pesɨrɨ che sui, mba'e-mba'e tëi aposar!’

²⁸ Evokoiyase oura yase'osa tekoasɨsa avei, pesepiase rumo Abraham, Isaac, Jacob iyavei opakatu Tüpä ñe'ë mombe'usareta yuvɨrekoise Tüpä mborerekwasave, pe evokoiyase imomboprɨ tëi peikora.

²⁹ Iyavei ava yugwerura norte kotɨ sui iro'ɨ kotɨ sui aveino, arɨ sësa kotɨ sui iyavei arɨ sosa kotɨ sui, a'e evokoiyase yuvɨrogwapɨ va'erä okaru Tüpä mborerekwasave yuvɨreko.

³⁰ Evokoiyase oime kurïtëi ipa tëi yuvɨrekoi va'e tenonde katu yuvɨrekoira, oime avei kurïtëi tenonde katu yuvɨrekoi va'e, a'e rumo ipa tëi yuvɨrekoi va'erä.

Jesús oyase'o Jerusalén rese (Mt 23.37-39)

³¹ Evokoiyase oyepota movɨrö tëi fariseo, aipo e'i Jesús upe yuvɨreko:–Eyepepɨño ave sui, esepia Herodes ni'ä nde yuka pota oiko.

³² A'e rumo omboyevɨ chupe:–Peso tapemombe'u aipo mbɨa agwara nungar tëi upe: ‘Esepia, ko pɨpe iyavei ayi'ive amboyepepɨpara karugwareta vichiko, ambogwera aveira imba'easɨ va'e, kuri ayi'ive evokoiyase amombara chekwaita.’

³³ Agwata vɨteño itera rumo vichiko ko pɨpe, ayi'ive, kuri ayi'ive avei. Esepia ni'ä, ndiyai Tüpä ñe'ë mombe'usar omano kokotɨ tëi Jerusalén sui.

³⁴ “¡Jerusalén, Jerusalén, peyuka va'e Tüpä ñe'ë mombe'usar, iyavei ita pɨpe peyapi-yapi ava Tüpä remimbou yepi! ¡Seta rupi che opomonu'ä pota tëi pe rereko, inungar takura omonu'ä va'e omembrɨ opepovrɨve, egwë a'e pota tëi pe rereko viña, pe rumo ndapeipotai ete!

³⁵ Sese perëtä sekoira seyapɨrä tëi; iyavei aipo a'e peü ndache repia iri chietera peye osupitɨ rane itera arɨ ipapaprɨ aipo pe'esa: ‘¡Imboeteiprɨ yande Yar remimbou tasekoi!’ ”