San Juan 3 - Tüpä Ñe'ëngagwer

Jesús iyavei Nicodemo

¹ Oime ñepëi fariseo Nicodemo serer va'e, a'e mbɨa mborerekwar judío pa'ü pendar ikwaprɨ va'e ite.

² A'e oso Jesús pɨri pɨ̇tü pɨpe, aipo e'i chupe:–Porombo'esar, oroikwa ite Tüpä nde mbouse ore mbo'e agwä eve, esepia ndipoi ete ava oikatu va'e poromondɨisa apo inungar nde ereyapo va'e, Tüpä oyese seko e'ɨ̇se.

³ Jesús aipo e'i chupe:–Supiete aipo a'e ndeu akoi ava ndoyesu pɨasu iri va'e, ndosepiai chietera Tüpä mborerekwasa.

⁴ Nicodemo oporandu aipo e'i chupe:–¿Marä e'ira vo aipo ñepëi ava oyesu pɨasu iri okwakwa pɨpe viña? ¿Oikatu irira pi'ä osɨ avɨterve oike, oyesu iri agwä?

⁵ Jesús omboyevɨ chupe:–Supiete aipo a'e ndeu akoi ava ɨ pɨpe iyavei Espíritu pɨpe ndoyesui va'e, a'e ndoikatui chietera oike va'erä Tüpä mborerekwasave.

⁶ Akoi oyesu va'e oyesupa sui, inungar tuprɨ avei a'e; Espíritu pɨpe oyesu va'e rumo, a'e espíritu ñoite.

⁷ Ereyepɨ'amondɨi rene aipo a'e va'e rese ndeu: ‘Opakatu peyesu pɨasu iri rane itera.’

⁸ Ko ɨvɨtu oipeyu gwemimbotar opakatu rupi ete, yepe sendusa sɨapu, ndikwasai rumo kesui turi iyavei ke'osora. Egwë e'i avei opakatu ava oyesu va'e Espíritu pɨpe.

⁹ Nicodemo oporandu iri chupe:–¿Marä e'i pi'ä aipo evokoiyase?

¹⁰ Jesús omboyevɨ aipo e'i chupe:–¿Nde ni'ä porombo'esar ɨvate katu va'e Israel pendar ereiko, nderesendukwai ete rumo ko nungar mba'e?

¹¹ Supiete aipo a'e ndeu ore oromombe'u mba'e oroikwa va'e, iyavei ore oroiko va'e orosepia ite; pe rumo ndaperoyai ete ore remimombe'u.

¹² Ndache reroyai ete rumo peye añe'ëse mba'e ko ɨvɨ pɨpendar rese, ¿Evokoiyase marä peyera vo che reroya amombe'use mba'e ɨva pendar peü viña?

¹³ “Esepia ndipoi ete ambuae ava ɨvave oyeupi va'e; che gweraño, ava ɨvate katu va'e Ra'ɨrɨ ɨva sui agweyɨ va'e peü.

¹⁴ Inungar Moisés osupi ɨvate mboi ra'anga ɨvɨ iporupɨre'ɨ̇sa rupi araka'e, egwë e'i aveira che, ava ɨvate katu va'e Ra'ɨrɨ rerekosa ɨvate che rupira yuvɨreko,

¹⁵ iyavei opakatu ava che reroyasar vɨrekora tekovesa apɨre'ɨ̇ yuvɨreko.”

Tüpä poroaɨsusa opakatu ava upe narä

¹⁶ “Supiete Tüpä osaɨsu iteanga opakatu ava, sese ombou Gwa'ɨrɨ ñepëi va'e, tokañɨ tëi eme che Ra'ɨrɨ reroyasar yuvɨreko oya, iyavei tovɨreko tekovesa apɨre'ɨ̇ o'esa pɨpe.

¹⁷ Esepia nomboui Tüpä Gwa'ɨrɨ ko ɨvɨ pɨpe ava mokañɨ tëi agwä, a'e rumo ombou ava pɨsɨrö agwä.”

¹⁸ “Ava vɨroya va'e Tüpä Ra'ɨrɨ, nda'ei ete okañɨ tëi va'erä; akoi ava ndovɨroyai va'e rumo, oipɨsɨra kañɨsa yuvɨreko Tüpä Ra'ɨrɨ ñepëi va'e reroya e'ɨ̇sa pɨpe.

¹⁹ Ndovɨroyai va'e rumo, a'e okañɨ tëietera, esepia a'e oyapo mba'e naporäi va'e yuvɨreko, ouse rumo tesapesa supiete va'e ko ɨvɨ pɨpe, a'e ava oipota katu pɨ̇tümimbi va'esave gweko agwä yuvɨreko tesapesa sui.

²⁰ Opakatu ava oyapo va'e angaipa ndosepia potai tesapesa, iyavei ndoyemboyai tesapesa rese yuvɨreko oangaipa mboyekwa potae'ɨ̇save.

²¹ Akoi ava yuvɨrekoi va'e mba'e supi tuprɨ va'e pɨpe, a'e oyemboya tesapesa rese mba'e Tüpä remimbotar oyapo va'e kwa uka agwä opakatu ambuae ava upe.”

Juan Oporoapirämo va'e oñe'ë iri Jesús rese

²² Ko ipare, Jesús oso gwemimbo'e eta rese ambuae ɨvɨ Judea rupi, a'eve sekoi puku raimi oporoapirämo.

²³ Iyavei Juan Oporoapirämo vɨte Enón ve, Salim rerovɨkave, esepia a'eve tuvicha ɨ oime; iyavei a'eve ava yugweru oñeapirämo uka agwä.

²⁴ Ko egwë e'i ete yaposa Juan rokenda e'ɨ̇ vɨteseve.

²⁵ Evokoiyase Juan remimbo'e omboɨpɨ ñepëi judío rese oyeekopɨ-kopɨ va'erä ɨ pɨpe ñeapirämosa resendar sui tëi yuvɨreko,

²⁶ ipare yuvɨraso Juan upe imombe'u:–Porombo'esar, sekoi va'e nde rese ɨai Jordán rovai, sese akoi ereñe'ë oreu, kurïtëi a'e oporoapirämo iyavei opakatu ava yuvɨraso supi.

²⁷ Juan rumo aipo e'i chupe:–Ndipoi chietera ava vɨreko va'e mba'e, Tüpä nombouise chupe.

²⁸ Pesendu tuprɨ akoi che ñe'ë nda'ei Poropɨsɨrösar aiko a'ese, che imbouprɨ tëi aiko senonderä a'e akoi peü.

²⁹ Ñepëi mendasave, akoi vɨreko va'e gwembirekovɨ a'e imevɨ ite; iyavei imevɨ mborɨpar, osenduse a'eve o'ä oyembovɨ'arete iñe'ë renduse. Egwë a'e avei che kurïtëi ayembovɨ'aretera.

³⁰ A'e ni'ä seko ɨvate katu-katuño itera arɨ rupi oiko; che rumo ɨvɨ kotɨ katu aikora ichui.

Ɨva suindar ou va'e

³¹ “Ɨva sui ou va'e ɨvate katu ite opakatu sui. Ko ɨvɨ pɨpe oyesu va'e rumo ko ɨvɨ pɨpendar ite sekoi, a'e oñe'ë ɨvɨ pɨpendar rese. Akoi ou va'e rumo ɨva sui a'e ɨvate katu ite opakatu sui,

³² iyavei mba'e gwembiepia osendu va'e reseño ite oñe'ë; ndipoi ete rumo semimombe'u vɨroya va'e yuvɨreko.

³³ Akoi ava vɨroya va'e rumo iñe'ë, oikwa ite Tüpä omombe'use mba'e supi tuprɨ va'e;

³⁴ supiete akoi Tüpä remimbou omombe'u Tüpä ñe'ë, esepia ni'ä Tüpä omondo ite Espíritu sese.

³⁵ Tüpä osaɨsu Gwa'ɨrɨ, iyavei omondo opakatu mba'e sembiapo agwä.

³⁶ Opakatu ava vɨroya va'e Tüpä Ra'ɨrɨ, vɨreko ite tekovesa apɨre'ɨ; akoi ndovɨroya potai va'e rumo Ta'ɨrɨ, ndovɨrekoi chietera ko tekovesa, a'e rumo oipɨsɨra Tüpä ñemoɨrösa ipirätä va'e ite yuvɨreko.”