San Juan 21 - Tüpä Ñe'ëngagwer

Jesús oyemboyekwa ñuvɨrïo ova gwemimbo'e upe

¹ Ko ipare, Jesús oyemboyekwa iri gwemimbo'e eta upe, ɨpa Tiberia popɨ ɨvɨi. Egwë e'i ko sepiasa va'e:

² A'eve yuvɨrekoi Simón Pedro, Tomás, a'e akoi Gemelo, Natanael, a'e aipo Caná ɨvɨ Galilea pendar, Zebedeo ra'ɨrɨ iyavei ambuae ñuvɨrïo Jesús remimbo'e.

³ Simón Pedro aipo e'i chupe:–Asora pira mbo'a.A'e rumo omboyevɨ yuvɨreko chupe:–Ore avei orosora nde rupi.Yuvɨrasopa, ichui yuvɨro'a ñepëi ɨarusu pɨpe; a'e pɨ̇tü pɨpe rumo nombo'ai ete pira yuvɨreko.

⁴ Ko'ë potase rumo, Jesús oyemboyekwa ɨmbe'ɨ ɨvɨi, semimbo'e eta rumo ndoikwai ete Jesús sekoise yuvɨreko.

⁵ Jesús oporandu aipo e'i gwemimbo'e upe:–Mbɨa chi'ïvä'e, ¿ndapembo'aimi ete vo pira?A'e omboyevɨ yuvɨreko chupe:–Ani ete.

⁶ Jesús aipo e'i gwemimbo'e upe:–Pemondo ɨve pira mbo'asa pe asu kotɨ ɨarusu pɨpe, a'ese pembo'ara pira.Egwë e'i seroya yuvɨreko, ipare rumo ndoikatui ete pira mbo'asa ɨpɨ sui senose agwä yuvɨreko esepia seta iteanga pira imbo'aprɨ ipɨpe.

⁷ Evokoiyase ñepëi Jesús remimbo'e sembiaɨsu katu, aipo e'i Pedro upe:–¡Evokoi ñi'ä yande Yar!Simón Pedro osendu ramoseve ñe'ësa Yar resendar, omonde voi oturukwar, esepia nani tuprɨ sekoi, ovɨapiño ɨpɨve oso ichui.

⁸ Ipare ambuae semimbo'e eta oyemboya ɨmbe'ɨ popɨve yugweru ɨarusu pɨpe, ombotɨrɨrɨ pira re'ɨi seru yuvɨreko, a'e i'amombrɨgwer vɨreko ɨmbe'ɨ popɨ sui cien metros tëi.

⁹ Ogweyɨpase ɨvɨ ätasave, osepia ñepëi tata sendɨ va'e yuvɨreko, i'arɨve ñepëi pira tui, mboyape avei.

¹⁰ Jesús aipo e'i chupe:Peru pira movɨ̇ro pe mbo'a ramo va'e ko'ave.

¹¹ A'ese Simón Pedro o'a ɨarusu pɨpe ipare ombotɨrɨrɨ seru pira re'ɨi tuvicha va'e pira mbo'asa ɨmbe'ɨ popɨve, a'e ciento cincuenta y tres tuprɨ setakwer; yepe seta iteanga viña, pira mbo'asa rumo ndosoroi ete.

¹² Jesús aipo e'i chupe:–Perio tapekaru rane.Ndipoi ete ñepëi semimbo'e oporandu va'e chupe uma a'e sekoi, esepia oikwa ite Yar sekoise yuvɨreko.

¹³ Ichui Jesús oyemboya oso, oipɨsɨ mboyape omondo gwemimbo'e upe; egwë e'i avei pira mondo.

¹⁴ Ko rese Jesús oyemboyekwa mbosapɨ yupagwer gwemimbo'e upe okwerayevɨ pare.

Jesús oñe'ë Pedro upe sekoa'äsa pɨpe

¹⁵ Opase okaru yuvɨreko, Jesús oporandu aipo e'i Simón Pedro upe:–Simón, Juan ra'ɨrɨ, ¿che raɨsu katu vo eve ko yuvɨrekoi va'e sui?Pedro omboyevɨ chupe:–Taa, che Yar, nde ereikwa ite che oroaɨsuse.Jesús aipo e'i chupe:–Esärö tuprɨ ava che reroyasar sereko, esepia a'e yuvɨrekoi ovesami nungar.

¹⁶ Omboyupagwe iri oporandu chupe:–Simón, Juan ra'ɨrɨ, ¿che raɨsu ite vo eve?Pedro omboyevɨ chupe:–Taa, che Yar, nde ereikwa ite che oaraɨsuse.Jesús aipo e'i chupe:–Esärö tuprɨ ava che reroyasar sereko.

¹⁷ Imombosapɨsa rupi oporandu iri chupe:–Simón, Juan ra'ɨrɨ, ¿che raɨsu vo eve?Pedro, ndoyembovɨ'ai tëi esepia oporandu mbosapɨ yupagwer rupi cheraɨsu ite pi'ä oyapave, a'e omboyevɨ chupe:–Che Yar, nde ni'ä opakatu ereikwa mba'e: nde avei ereikwa che oroaɨsuse nderereko.Jesús aipo e'i chupe:–Esärö tuprɨ ava che reroyasar sereko.

¹⁸ Akoi nde chi'ïvä'e katu vɨtese, ereyemonde eiko ereso va'erä nde remimbotar rupi tëi; nde kwakwamise rumo, ereyeyɨvamoatära iyavei ambuae nde mboyemondera, nde reraso aveira ndeso potae'ɨ̇save yuvɨreko.

¹⁹ Ko omombe'use, Jesús oikwa uka marä e'ira Pedro omano kuri iyavei omanosa pɨpe omboeteira Tüpä sereko. Ipare aipo e'i chupe:–¡Erio che rupi!

Jesús osaɨsu katu ñepëi gwemimbo'e yepi

²⁰ Oyevɨse yugweru, Pedro osepia gwakɨkwei ñepëi ouse Jesús rembiaɨsu katu va'e, a'e akoi chini yɨpɨve karusa ipa va'esave oporandu avei chupe: “Che Yar, ¿uma vo nde mondora nde amotare'ɨ̇mbar upe?”

²¹ Osepiase rumo Pedro, aipo e'i oporandu Jesús upe:–Che Yar, iyavei ko upe ¿mba'e vo oimerä?

²² Jesús omboyevɨ chupe:–Aipotase a'e sekove vɨte agwä che yevɨse narä kuri, ¿marä vo ererekora nde? Nde egwataño che rupi.

²³ Sese oikwapa ite ko ñe'ësa seroyasar yuvɨreko ñepëi semimbo'e nomanoi chietera viña. Jesús rumo aipo nde'i chupe nomanoi chietera, a'e rumo aipo e'i: “Aipotase sekove vɨte agwä che yevɨse narä kuri, ¿marä vo evokoiyase nde ererekora?”

²⁴ Ko semimbo'e avei akoi omombe'u mba'e opakatu oikwa va'e, oikwachia avei sesendar. Yaikwa avei mba'e supi tuprɨ omombe'use.

²⁵ Oime avei ambuae mba'e seta Jesús rembiapo; iyavei ikwachiasase ñepëi-pëi rupi viña, ndiyai chietera ko kwachiar pɨpe ikwachiaprɨ ɨvɨ viña.